ninanesto
ninanesto
vakantio.de/ninanesto

Cartagena

Veröffentlicht: 08.03.2018

Cartagena

Jo mir hend e komischi Busnacht hinder eus. Eigentlich isch alles normal verloffe. Ich bin jedoch den irgendwenn so halbe us em Schlof grisse worde wos vo hine im Bus lut "ahalte" gruefe hend. Ich bi nid drus cho und biz hessig worde das die am Morge am 3 ase umeschreiet. Ungefähr 20 Minute spöter hend mir jedoch aghalte und es paar sind usgstige. Ich bin au go luege. Hine het 1 Schiebe gfählt. Sie hend eus welle usraube z'mitzt im Niergendwo. Sie hend en riesige Stei ufd Schiebe gschosse und die isch den usegheit, drum hend all gruefe ahalte, obwohl dass zimmlich sdümmscht isch was me mache cha z mitzt im Wald. Janu, isch ja gad namal guet gange, het den halt bizeli zoge wäret em fahre.

Am Busbahnhof vo Cartagena hend eim d’Taxifahrer wieder nur welle verarsche mit de Prise, mir hend also en öffentliche Bus gno wo pumpevolle gsi isch, Kind sind ie cho und hend trommlet und gsunge ect. 

Cartagena isch e herzigi Stadt mit vorstellbarem Karibikfeeling, oder sogar scho biz wie Kuba.

 Farbigi Hüser, Havana Clubs, Cigarre Bars und ganz viel Blueme ade Hüser. 

Es isch 33 Grad gsi. Mir hend den zerstmol Mittagsschlöfli gmacht im klimatisierte Dorm und sind spöter ad Walking Tour. Das Altstädtli isch echt mega schön. Mir hend interessanti Pirate Gschichte erfahre.

 am Schluss hend mir sogar no en hammer Sunneuntergang uf de Stadtmure vo Cartagena dörfe gnüsse.

 Am Tag spöter sind mir den los uf euse Inseltrip. Vo dem chönd ihr im nächste Blog "Isla Rosario" meh lese, ich seg nur türkisblaus Meer, wissi Stränd und Karibikfeeling pur. Nach dem Inseltrip sind mir den retour nach Cartagena mit em Boot.

Mir sind wieder is gliche Hostel wills eus so guet gfalle het. Mir hend den de Obig verbrocht mit Sache plane. Ich Volltrottel han de Flug vo Kolumbie nach Panama jedoch anstatt am 09.03.2018 am 09.04.2018 buechet! Die vom Hostel hend eus den mega gholfe das irgendwie abzkläre was mir jetzt müend mache. Euse Flug het 150 Dollar pro Person kostet. D Agentur het tatsächlich verlangt das mir 250 pro Person zahlet zums Datum ändere! Janu, noch etliche Telefon han ich mich dezue entschlosse zum en neue Flug bueche und de im April sause loh, isch am eifachste.

Mir sind den am nöchste Tag mit eme Shuttlebus nach Santa Marta gfahre. Mir hend det den e unerwarteti Entscheidig troffe das mir öppis machet wo mir vorher niemols denkt hetet das mir das machet ;-) dezue meh im Santa Marta Blog.

Next Stop: Santa Marta

Bis bald

Ernesto y Muriel

Antworten

Kolumbien
Reiseberichte Kolumbien
#oldtown#altstadt#cartagena#kolumbien#colombia#southamerica#südamerika#travel#wanderlust