Hope und Vancouver

Hope

De Tag ah dem mir de Camper hend müesse abgeh isch nöcher gruckt und daher hend mir au müesse witerzieh. Mer hend na ein "vorige" Tag gha und da hend mir eus direkt was vor Vancouver gsuecht. Do isch eigentlich nurno s'Städtli Hope übrig bliebe. D'Muriel het do scho vor einige Johre mol en Stopp gmacht daher het sis guet in Erinnerig gha.

Es isch vom eher offene Tal den immer enger und d'Berge sind höcher worde. Hope isch denn würkli chli iklemmt zwüsched de Berge gsi. Es het es biz was vom Tessin gha. Dete acho hend mir wieder zerst müesse en Campground sueche wo no offe gha het um die Johreszit. Mir hend denn aber relativ schnell eine gfunde und ich wür sege vom Campground ellei, ischs eine vo de schönschte uf eusere Reis durch Kanada gsi. De Stellplatz isch zwüsched riese Tanne gsi und mer hend Strom und Dumping Station direkt am Platz gha. 

D'Muriel het denn de Herr bim Check-In gfroget ob mer do in Hope was cools mache cha und er het denn nur kurz glachet und gseit "Nöd würkli - De Canyon isch immer no im Ufbau will er 2022 bime Hochwasser zerstört worde isch". Da hend mir au gmerkt wo mir richtig Hope cho sind - Es hät nämlich so usgseh wie im Tessin nach em grosse Erdrutsch.. Nur mit em Unterschied, dass sie im Tessin innert Rekordzit alles wieder ufgstellt gha hend. Wobi, isch ih de Schwiz eigentlich au e rechti Usnahm weni grad so nohdenke. Jo, mir hend trotzdem halt zwei Nächt buechet will mir am letzte Morge mit em Camper direkt ad Rückgabestell gfahre sind. Am Abig selber hend mir no chli Reste-Fresse im Camper gmacht und hend eusi Vorrät gleert. Am Tag druf hend mir aber de Canyon glich na welle go aluege.

Uf em Weg hets uralti riesigi Bäum gha - Und au d'Blätter sind entsprechend gross gsi :-D Jo, d'Muriel isch au nid die gröscht aber da Blatt isch würkli riesig gsi.

Bi dem Weg hettis immer wieder alti Isebahn Tunnels gha aber leider hend mir nur eine chöne mache will de Rest no gsperrt isch.

 Schön isch es trotzdem gsi.

Mir hend eus denn namal uf de Weg is Städtli gmacht zum das au na aluege. Irgendwie isch mir das au bekannt vor cho und denn ufsmol ischs mir in Sinn cho: Do het am Rambo sis Schlamassel agfange.

Mit dem lästige Sheriff:

Es het au überall no Holzfigure gha will do mol d'Weltmeisterschaft im Skulpture-Schnitze mit de Motorsagi stattgfunde het.

Nachdem mir denn na was chlises gesse und die letzte Sunnestrahle ih dem Dörfli gnosse hend, sind mir zuruck uf de Campingplatz - Mir hend ja schliesslich na alles müesse klar Schiff mache zum de Camper abgeh und üsi siebe Sache packe. 

De Obig und de Morge druf hend mir denn au genau das gmacht und sind drufabe uf Vancouver gfahre. D'Übergob het würkli super funktioniert und isch mega unkomplitziert gsi - mir hend lediglich en chline Ufpris müesse zahle will mir 320 Kilometer meh als buechet uf de Uhr druf gha hend. Isch aber die richtig entscheidig gsi nid meh Kilometer im Vorus z'bueche will es het nur 800-Kilometer-Packet geh. Schweren Herzens hemmer denn üsi Snowflake abgeh - Isch en guete Camper gsi über die letzte drü Wuche.

Vancouver

Mir hend eus richtig Big City, Vancouver gmacht, wo mir sit längerer Ziit nun wieder e richtig guets Hotel hend dörfe neh.

Scho grad chli was anders wie im Camper. Me muss kei Wasser spare, isch nüme so eng und vorallem gwagglets nid immer wend vo A nach B laufsch. Und de Spruch "Mir sind imfall ide Honeymooooon" funktioniert würkli - Danke Luce und Tanja für de Tipp.

Es stoht zwor "Dear Mr. Baumann & Mrs Schweiz", aber fascht... Demfall bin ich ezt mit de Mrs Schweiz unterwegs :-D Obwohl sie für mich ja scholang mini Mrs Schweiz isch.

Am Abig sind mir denn na was Feins go esse und hend eus na die berüehmt "Steam Clock" ahglueget. Die wird mit Wasserdampf betriebe und immer wieder, glaubs all halb Stund, gits es Pfifkonzert wie vonere Dampflock. D'Uhr isch aber sehr ungnau gsi drum het me sich nid a de richtige Zit chöne orientiere.. Viellicht gitz drum nid meh vo dene :-D

Am nöchschte Morge hani mir was ganz speziells überleit. Ich ha gmerkt wie de Tierli- und insbesondere de Busi-Entzug langsam dramatischi Usmass ahnimmt.. Desswege hani mir halt es Katze-Kaffi gsuecht und au gfunde.

Nachdem de Busi-Hunger wieder einigermasse gstillt isch gsi, sind mir chli durch die herbstlich Stadt gschländeret und ich bi no sponti zum Habibi go d'Hoor schnide.. Blöderwis isch grad es Champions-League Fuessball Spiel gloffe und de guet Barber het denn gluegt und glichzitig mir d'Hoor gschnitte.. Ha so fescht ghofft das es keis Eigegoal git und ich denn mit ere Halb-Glatze muss ume laufe..

Am Abig hend mir was ganz bsundrigs vorgha.. Wies de Zuefall het welle isch ah dem Samstig de ersti Supercross-Weltmeisterschaftslauf in Vancouver gsi. Das hend mir eus natürlich nid chöne entgo loh.

Isch wie Motocross nur Indoor und viel mehr technisch mit Sprüng etc.

Ja, das wer somit üsen Abschluss vo Kanada gsi. Am Tag druf sind mir an Flughafe wo mir denn 5h richtig Honolulu gfloge sind.. Ah ja, mir Fuchsige-Füchs hend na es FedEx Päckli id Schwiz gschickt mit all eusne warme Kleider wo mir nüme bruchet. Danke Dave für de Support :-D Es isch zwar biz es Ghetto gsi bis da Päckli mal ahgno worde isch, will die guet Dame öppe 5 mol nachdem mir e Frog beantwortet hend sie gseit het "Ou we are not allowed to do this".. Irgendwie isch sie denn aber nid drumume cho, zum s'Päckli entgegezneh :-D Am Fritig ufd Post due und am Zistig druf bereits ide CH abglieferet worde. Not Bad.

So, somit wird de next Post wärmer, denn üs erwartet 30 Grad, blaue Himmel, Strand etc... Freu Freu!

Next Stop: Hawaii, Waikiki Beach, Honolulu