Maui

Maui

Mit e bizeli Wehmuet, dass mir de Wauzi nid hend chöne adoptiere, sind mir an Flughafe gfahre. Ich ha gmerkt, dass ich vergesse ha zum de Platz uswähle und ha ghofft, dass mir en Fensterplatz (Ja, de hani scho ide Schuel gha) hend. Mir sind viiiieeeel z'früeh am Flughafe gsi (2h vor Boarding) will die Inlandflüg sowas vo easy sind, dass me nid gross Vorlaufzit brucht. Det wo eus de Uberfahrer uselah het, isch me denn ca. 10 Meter ih de offni Flughafe ie gloffe und het quasi "dusse" s'Gepäck ufgeh. Grusigerwis muss me denn bim Security Check immer d'Schueh abzieh und ide Socke oder no schlimmer, barfuess, durelaufe. Darum immer mit Schueh dur de Security Check :-) Irgendwenn ischs denn as Boarding gange und mer hend gmerkt, dass es fast kei Lüt do het. Bim in Flüger laufe het eus d'Stewardess nu gseit "Ihr chönd hocke wo ihr wänd, ich schloh eu rechts vor will ihr det am meiste gsehnd - und gönd chli hindere damit s'Gwicht chli besser verteilt isch". Somit hend mir eusen Fensterplatz gha - aso ich, d'Muriel sitzt nid gern am Fenster.

In Maui glandet hend mir den uf de Gaston gwartet, bis er eus de Jeep brocht het. Mir hend wieder Bext, dass Familieunternehme gwählt. Er isch zwor z'spot gsi (17:15) aber trotzdem e schöni Uhr ;-D

Irgendwenn hend mir denn de Chlapf becho und sind is Hotel gfahre.

Aso ich muss scho sege, die Jeep gfallet mir immer meh und machet echt Spass zum fahre. 

Uf Maui ischs luschtigerwis extrem schwierig gsi, es geignets Hotel z'finde. Sie hend mega viel Appartements wo Eigetümer vermietet. Die sind aber viel ime schlechte Zuestand (Schimmel, dreckig etc.) darum hend mir eigentlich es Hotel welle. Es cools Hotel isch aber wieder teuer.. Ich ha denn es einigermasse bezahlbars gfunde und ha die erste beide Nächt buecht (will mir erst am letzte Tag uf O'ahu es Hotel buecht hend und mir beidi fasch e Stund gsuecht hend ischs mir denn irgendwenn zblöd worde und ha da eifach buechet). Nachdem mir ide Lobby acho sind und ich de Name gseit ha het sie nu biz verwirrt dri gluegt und gfroget, ob mir evtl. uf en andere Name buecht hend. Denn hend mir grad schnell no de Honeymoon Joker drigworfe und gseit "Nei mir sind sit paar Wuche verhürotet und hend de glich Name".. "Ouuuuu Gratuliation".... :-D Aber mer hend denn trotzdem usegfunde, dass ich am 4. Dezember anstatt 4. November buechet ha... Da isch mir ez au na nie passiert. Sie hend aber natürli was chöne mache und hend eus es sehr schös Zimmer chöne organisiere, inklusive Present:

Damol leider ohne "Mrs Schweiz" :-D

Am nächschte Tag hend mir denn eher en Ruhige gmacht und hend nachem z'Morge chli am Hotelpool chillt. Nachem Mittag hets eus denn aber glich na an Strand zoge. Mir sind am spötere Nomittag gange und hend denn denkt "evtl. chömmer na en schöne Sunneuntergang luege". Wered em sünnele, lese etc. hend mir au schöne Vögeli chöne zuelose.. die einte hend en Maaaaaais gmacht..

Spöter hend mir denn en wahnsinns Sunneuntergang chöne gnüsse:

Het sich also glohnt zum warte

Am Tag druf hend mir endlich mol welle go Schnorchle und darum hend mir au nachem z'Morge direkt d'Schnorchel-Sache gmietet und sind denn nach Empfehlig vom Schnorchel-Shop an bestmögliche Strand. Er het eus nid z'viel versproche..

Nebscht de Schildkrot hets hunderti vo andere Fisch gha - es isch mega gsi :) 

Nachdem mir langsam aber sicher gnueg Sunne für de Tag gha hend, simmer zruck is Hotel, hend eusi Sache gholt und sind ih die nöchscht Unterkunft gfahre. Dasmol ischs biz was speziellers gsi: E grossi alti Villa (Bungalow) mit 5 Zimmer. E Reception hets keini geh, me het online buecht und het irgendwenn denn en Code becho - Mit dem het mer d'Igangstüre und Zimmertüre ufbrocht. Wo mir denn richtig Igang gloffe sind hend mir dur de Garte müsse hindes Huus laufe und nur scho da isch mega schö gsi.

De Igangsbereich het denn eso us gseh: 

(Vo det us hets 5 Türe gha ih die jewilige Zimmer.)

Also recht stylisch. Die Villa ghört anere Ärztin wo das ganze mit Liideschaft nebether pflegt und lebt.

Nachdem mir ih de Unterkunft eine feine z'Morge gha hend, simmer denn mit em Jeep richtig Iao Valley gfahre. D'Insle Maui het zwei Gebirge: Bim einte ischs eher chli trocke und det isch en ehemolige Vulkan druf und bim andere ischs eher grüen und det sind mir ez ane. Sobald me halt richtig Regewald fahrt ischs meistens wolkeverhange. Bi de Uefahrt hend mir denn so e Ussicht gha:

Im Valley hine acho hets denn am End vo de Stross es Hüsli mit ere Barriere gha und de Herr wo det ine ghocket isch het gfroget, ob mer e Reservierig hend - natürli nöd. "Ja die mönder online löse und wenner do ine wend parkiere kostets 10 Dollar extra". Denn hani gfroget obi au ade Stross usserhalb vo de Barriere cha parkiere und er het nur gmeint "logisch"... Aso wieso zahle wenn me 5 Meter nebet dra cha gratis parkiere? Blöderwis hets ih dem Valley fast kei Netz gha.. Sie hend eus denn gseit bi wellne 2 Quadratmeter de "bescht" Empfang isch. Es het denn zwor usgseh als ob ich irgendwelchi Yoga-Üebige mache debi hani nu de bescht Empfang gsuecht :-D Es het denn nach ca. 5 Minute klappet und ich han scho welle zum Hüsli laufe, do het en ältere Herr gfroget ob ich ihm cha helfe.. Mir hend ihm denn 2-3 Sache zeiget und sind langsam devo gschliche - Kei Luscht gha uf e witeri Yoga-Session. Dinne hemmer en mega schöne Blick uf die grüen bewachsene Berge gha:

Bim umelaufe hend mir gmerkt, dass es en chline Trail het wo Fluss ufwärts führt  - dem simmer denn au noh.

Es het sich au glohnt, will es het praktisch kei Touriste meh gha (Jo, mir hend eus au gfroget ob das echt legal isch) und mir sind gfühlt de Dinos immer nöcher cho..

Es het sich also glohnt - Sogar en private Natur-Pool hets gha.

Am nöchschte Tag het was grosses uf eus gwartet - Oder besser gseit, was höchs.. Euses Ziel ischs gsi, im Haleakala Nationalpark go Sunneuntergang luege. S'Ding isch, dass me bi 0 Meter über Meer (Nachfolgend M.ü.M. genannt (Ja, d'Diplomarbeit het mi prägt)) uf insgesamt 3'055 M.ü.M. uefahrt und das innert kurzer Zit. Da hend mir grad Flashbacks a Südamerika becho und was cha passiere, wenn me in kurzer Zit so höch ue goht. Mir hend gwüsst "Vorsicht ist geboten". Mir sind um die 14:00 los gfahre und hend eus ime Vierteli bizeli verfahre, wo mir denn es total verschwitzts und nervöses Ross uf de Stross entdeckt hend, wo schiinbar vorem gschlossne Tor gstande isch und ie het welle. D'Muriel, d'Pferdeflüschterin isch denn muetig zum Ross ane. E Nochberin isch zum Glück au no dusse gsi und denn hends es irgendwie gschafft, dass Ross ie z'bringe. Chum ischs Tor ufgange isch de Cheib losgsecklet - ha glaubs nanie e Ross gseh so schnell renne - Ab ums Huus ume und hine s'Loch ab. Entweder hets hine dra e Stuete gha oder Fresse/Wasser.. Ufallfäll hets en Termin gha.

Mir hend denn no amne Foodtruck schnell was ghabberet und sind losgfahre. Mit gnüegend Zit zum au na zwüscheddure es Päusli z'mache und sich wieder a die Höchi zgwöhne simmer los. Me hets nid gmerkt wie schnell meh die Höhemeter zruck gleit het - Aber mengmol het mer abe gluegt und denkt "Da chönt ez au usem Flugzüg si".

Irgendwenn simmer denn bim Hüsli acho (Da isch ca. 400 Höhemeter vor em höchschte Punkt gsi), dete het me denn müsse Ihtrit zahle. Plus isch gstande, dass sie nur e gwüssi Azahl Lüt ielönd.. Super, stell der vor chesslisch det ue und denn segets "Ha ah - isch volle".. Mir sind denn churz ime Mini-Stau gstande und hend gwartet, bis die 10 Autos vor eus dure sind. Wo mer rechts use gluegt hend, hemmer gmerkt, dass mir bereits über de Wolke gsi sind und da isch no speziell gsi:

Zum guete Glück hends eus dure lah und mir sind witer ue gfahre. Irgendwenn simmer ume Kurve gfahre und mir hend eifach uf de Strass es Auto ufem Dach gseh.. Die zwei Lüt sind aber scho dusse gsi und unverlezt - Das wo mir grad gseh hend. Mir hend gfroget ob mir ihne chönd helfe und sie hend gmeint seg alles "guet" sie heget bereits 911 aglüte - Mir hend ihne denn Cola, Wasser und Trubezucker geh und sind miteme mulmige Gfühl witergfahre aber mer hetet würkli nid chöne meh für sie mache. D'Sunne isch langsam tüüfer gsi und s'goldige Liecht isch cho - Grad rechtzitig. Mir hend s'Auto parkiert und hend eus en Platz gschnappet.

Für mich persönlich isch da de schönschti Sunneuntergang gsi wo ich je gseh ha. Wenn me luegt wie rechts une s'Land so chli würkt und wie tüüf une d'Wolche sind. Es isch aber sauchalt gsi :-D

Chaaaalt aber schöö - sehr schöö aber au seeeeeehr chaaalt.. Mir hends denn bis am Schluss gnosse.

Uf dem Hügel obe hets au na es Observatorium.. Anschinend cha me guet Sterne beobachte. Leider hani das luuute Schlottere ufem Bifahrersitz nid chöne überzüge zum blibe.. Aso mol, d'Muriel het denn na 2-3 Bilder gmacht aber dozmol ide Atacama Wüeschti hets krässer usgseh.. Ich bi au nid unglücklich gsi zum abefahre will da het scho müed gmacht.

Am Tag druf isch s'nöchschte Abentür agstande: Road to Hana.. Da isch en Weg de Küste nah (Uf de einte Site gohts s'Loch ab und chunt denn bald s Meer und uf de andere Site isch de Berg (Haleakala). Insgesamt sinds 100 Kilometer vom Startpunkt bis zu Hana und total 620 Kurvene (pro Weg)..

Ufem dene 100 Kilometer gits einiges z'gseh drum muss me vo Ahfang ah sini Favourite markiere, sus bisch 7 Täg unterwegs wend überall haltisch. Blöderwis isch nach Hana d Stross gsperrt gsi aso hemmer denn wieder müsse umtrülle.. Also 200 Kilometer und 1240 Kurvene.... Arosa isch en Witz degege (Ussert musch mit em Militärvelo ue).

De ersti Stop isch en Bambus-Dschungel gsi.

Wo mir denn vo ca. 200 Mugge gstoche worde sind..

Dur da, dass es so viel Stopps git, verteilts sich relativ guet. Es het do aso nid würkli viel Lüt gha. De nächschti Stop isch en Botanische Garte gsi wo me mit em Auto het chöne abfahre und ah drü Möglichkeite hets Parkplätz gha und me het chöne usstige und chli go erkunde.

Ich chönt soooviel cooli Bilder ie due aber die zeigemer eu lieber mal bime Chueche-Kaffi-Diashow-Spiel-Sunntig-Namitag?

Mir sind denn witer gfahre und hend na a 2-3 Stelle aghalte (Wasserfäll etc.). Schlussendlich sind mir denn in Hana acho und hetet na 2 grossi Highlights gha: Blacksand Beach und Redsand Beach. Bim Blacksand Beach acho hends wieder sone blödi Reservation wölle. Ich ha denn kurz bim chere gwartet und d'Muriel het Googlet ob mer nid irgendwie anderscht an Beach chunt (Reservation isch immer für de Folgetag drum hemmer nid vor Ort no chöne reserviere). Und schö het die alt mit em Megafon hine füre bäget "Guys mooove on". "Jooooojoo scho guet, mir hauet jo scho ab"... Bim Redsand Beach hets anderscht usgseh - Det het me eifach irgendwo im Quartier chöne parkiere und quasi über de Haag gumpe.. De Beach isch nämlich offiziell nid offe.. Det het sichs aber sehr glohnt, au wenn de Weg chli tricky gsi isch..

Ganz speziell das Grüen vo de Pflanze und de roti Sand mit em türkisblaue Wasser.

Das isch denn au üsen letzte Stop gsi und mir hend eus uf de Retourweg gmacht.

Nudelfertig ide Unterkuft acho hend mir gschlofe wie Babys.. Streng aber sehr schö gsi!

Am Tag durf hend mirs welle ruhiger ago loh und mir sind namal an en schöne Beach, hend eus Schnorchelzeugs und Sunneschirm usglehnt und sind los. Ah dem Beach acho wo de Typ vom Schnorchel Lade empfohle het, hend mir es Plätzli gsuecht. Leider hets ziemlich Wind gha.. D'Muriel isch denn ziemlich schnell ab und het sich bi de nöchschte Hotel Alag öppis z'Esse gholt (vilicht.. Pommes?). Ich ha mittlerwile euses Plätzli grichtet.. D'Muriel wer besser nid gange.. Chum han ich de Schirm ufgstellt heeeeeets mir de Schirm umd Ohre gjassed, ume glitzt und isch devo. Ich ha de denn irgendwie chöne hebe und ih dere Zite hets beidi Tüechli devo gwindet - Die hani mit em Fuess chöne hebe.. Es isch ALLLEEEEES voll Sand gsi und das nach 10 Minute am Strand - Leck fast duredreiht. De eint oder ander wo kein Schirm ghaa het, het sich denn dezent is Füschtli glachet und dem einti Ma wo sinere Frau de Hiwis geh het, dass sichs lohnt zum mir zueluege, hani denn zuegwunke.. So quasi "ha scho gmerkt das ihr eu über mich luschtig mached"..

D'Muriel isch denn irgendwenn mit ihrer Portion Pommes und eme chüele Ice-Tea deherzlaufe cho "Alles guet"?....... :-D Aber hey, zum schnorchle ischs super gsi... Het wieder Schildkrötli gha und viel Fischli.. Wo ich aber relativ wiit usse gsi bi, isch mer en riese lange Fisch entgegecho mit eme hässige Gsicht... Bi no nie so schnell gschwumme wie do.. Am 17:01 simmer bim Schnorchel-Shop acho "Am 17:00 machemer zue".. Wit und breit kein Mensch meh ume - Do sinds denn wieder pünktlich wenns um de Fyrobig goht.. Blöderwis isch de Shop ca. 60 Minute vo eusere Unterkunft entfernt gsi.. Am nöchschte Tag isch euse Flug uf di nöchst Insle gange, somit hemmer kei Bock gha zum extra namal 2 h Auto z'fahre. Mir hend denn de gflickti Schirm und s'Schnorchelzeugs bime Autoteilihändler abgeh und hend det gfroget, ob mir morn de Typ vom Schnorchelshop dörfet verbi schicke das z'hole.. Wiederwillig hends denn irgendwenn gseit "aso guet"... es het defür au was id Kaffi-Kasse geh. Mir hend niemeh was ghört, vo dem her isch voomuetli alles guet gange (hend am Morge via Zentrale vom Schnorchelshop Bscheid geh).

Am Tag druf sind mir somit entspannt an Flughafe, hend s'Auto wieder abgeh und sind denn richtig Kauai. Eusi letzt Insle bevors wieder uf O'ahu goht.

Nöchschte Halt: Kauaui