Clearwater und Kamloops

Nach em Kleiderwäsche sind mir ufbroche richtig Vancouver - mit es paar Zwüschehält. S'Wetter het sich würklich vo de rauhe Site zeiget und es isch sehr wechselhaft gsi. Es isch aber nid unbedingt schlecht will es git denn ganz e spezielli Stimmig zum durch d Rocky Mountains z'fahre.

Eigentlich hettemer welle bim Mount Robson übernachte aber leider hend die Campgrounds all zue gha und s'Wetter het eim au nid grad so ihglade zum irgendwo im Caco usse z'schlofe.

Im Blog vo Jasper hemmer ja vom Adler verzellt wo devo gfloge isch - Jetzt hemmer en gfunde und chöne bestuune. D'Muriel het ufsmol gruefe "Halt - Adler".. Leider han ich nid chöne halte wills grad en Lastwage hinder eus gha het. Mir hend scho übers umchehre gredet und zack - Namal zwei Stuck gseh und denn hemmer eifach aghalte (uf em Highway).

De Cheib isch na ziemlich gross. Nachere guet drüstündige, relativ nasse und stürmische Fahrt sind mir denn in Clearwater acho. 

Nachdem bi Mount Robson und Valemount alles zue gsi isch, simmer halt zuegfahre was schlussendlich e gueti Entscheidig gsi isch.. Will bimne Campingplatz het mes au schlechter chöne treffe:

Eus het sogar d'Sunne begrüesst und denn hemmer gwüsst, es isch guet do :-D Die beide nächschte Täg simmer recht ruhig und chillig ahgange und sind höchschtens mal is Dörfli go poste und sind chli um de See gstiflet.

Und ufsmol hets überall Adler gha :-D

Und au irgend en andere Vogel - Ich glaub es isch en Reiher, oder Reto?

Am letzte Tag hemmer denn na einigi Wasserfäll in Ahgriff gno. Ahgfange hemmer mit em Helmcken Fall. Mir sind bis uf es anders Auto eifach ellei det obe gsi. Es isch e ca. 45 minütigi Fahrt e Stross duruf gsi. Gemäss Google hani eich nid so en grosse Wasserfall erwartet. Wo mir denn aber de Trail hindere gloffe sind und ich langsam s Rusche ghört ha hani gmerkt, dass es was grössers isch.

s'Wetter het ufgrisse und mir hend de schö blau Himmer wieder zruck gha.

Me gsehts zwor nid mega guet aber de Wasserfall het e rechti Usbuchtig überd Johrhundert gmacht. Det wo de Wasserfall ufschloht ischs wie usghölet gege hindere. Und wenn me dobe e Tanne aluegt merkt me d'Dimensione - Er isch würkli riesig gsi.

Und me het sich sogar ah dem Wasserfall gratis chöne Schnäuz mache lah

Do hani so Freud gha, dass ich grad en Freudesprung ha müesse mache (Wie es jungs Reh).

Ufem Weg hets natürli au wieder die gha:

und luschtigi Pilzli

Als nöchscht hemmer so chli en hobby Rhyfall agluegt, de Dawson Fall:

Und zum Schluss na de Tripple Decker Hamburg.....äääh Fall.

Me gsehts nid guet aber er het halt wie drü Stöck wo er abe chunt. Nach dem Wasserfall hemmer gnueg Wasser gseh falle und mer hend eus uf de Weg zur vorletzte Destination in Kanada gmacht - Hope. Für die wo nochli wänd chnoble.. Die ältere under eus (Und do zehli all ab 30i mit) hend die Stadt schomol ime Hollywood Klassiker gseh. Paar Hints: Es goht um en amerikanische Patriot, er isch ellei unterwegs gsi, er het en eckelhafte Sheriff ahtroffe, isch guetussehend gsi (glaubs) und het en schwarze Chruselchopf gha.. Meh segi nööd.

Ah ja, im Titel stoht ja na "Kamloops". Das isch na en Zwüschestopp gsi zum d'Fahrt chli z'verkürze. De einzig Campingplatz wo aber offe gha het isch mitte im Industriegebiet gsi und de Chef dete isch eus au biz unheimlich gsi.. Darum simmer am Abig ane gfahre, hend d'Läde abe lah, sind am Morge ufgstande, hend d'Läde wieder ue lah und sind ab nach Hopes gfahre. Mir hend nid mal es Bild gmacht.

Next Stop: Hope und Vancouver