Lake Louise

Lake Louise

Am Morge bevor mir abgfahre sind, hend mir no schnell in Tim Hortons müesse – en guete Tag startet in Kanada mit eme feine «Pumpkin Spiced Latte» :) Ih dere Zit hani na s’Wlan gnutzt zum de Blog ue lade und d'Muriel zum paar Bilder fertig z'bearbeite. Me hend relativ bezite welle in Lake Louise si will es het genau ein einzige Campground wo no offe isch und det heissts «First come first served». Bedient isch de Campground au nüme. Mir sind somit kurz vorem 12i acho und hend denn eigeständig üsi Reservation und Quittig usgfüllt – S’Geld mu me in en Briefumschlag due und is Hüsli gheie.. Nachher dörfsch der en freie Platz ussueche wo no kei selber gschribeni Quittig am Sichererigschaschte hanget und dir denn de Platz reserviere, speziell :) Es het jedoch no gnüegend Platz will vieli nid witer wie Banff gönd. Dezue chunt, dass Jasper leider grossi Waldbränd gha het und dete au na einiges zue het und entsprechendi Unsicherheit herrscht – Die meiste restliche Touris hocket sowieso ih de Hotels – Ihri schöne Instagram Kleider wos debi hend würed ja au dreckig werde uf em Campground – Mengmol frogsch di scho was die Lüt studiered, wenns mit wisse Hose und Turnschüeli d’Bergseee etc. bsuechet.. Aber du, hauptsach sie hend es schös Föteli. Und für Ihre Föteli dönds au d’Empathie (wenn bi de einte überhaupt vorhande) ganz vergesse und stönd gern mol 5-10 Minute lang vor eim ane obwohl me grad es Föteli het welle mache.. Denn werdet denn schnell mal 50-100 Selfies gmacht.. Ih so Moment würed mir eus wünsche, dass sie Schwizerdütsch würed verstoh, denn würdeds nämli ufd Site goh.. 

Nachem «ihchecke» sind mir grad als ersts is Touriste Info Center gange wo mir bim verbifahre gseh hend – mir hend na 1-2 Froge gha (wege Jasper). Hend eus na überleit wa mir sus na wend froge und d’Muriel het denn na wegem Highlight vo Lake Louise – em Lake Moraine gfröget, ob mer mit em eigete Camper cha ue fahre wills so viel Shuttle Büs gha het.. Zum Glück het sie da gfroget will d’Antwort vo de nette Frau isch gsi: «Hend ihr scho es Shuttle Ticket? Wenn Nei, mönders jetzt gad löse will de Zuegang zum See isch nurno Morn offe und nacher bis im Juni gschlosse». Hettemer nid die Idee gha zum kurz is Touri Center z’goh, hettemer eus de See chöne as Bei striche, was würkli schad gsi wer wie ihr spöter chönd gseh ;-) Es git genau vier Busunternehme wo det ue dörfet fahre. Die erste drü sind schomol komplett usbuechet gsi. Bim letzte hets na paar wenigi Plätz gha. Ich ha grad sofort s’Handy gno und ha üs Tickets gschnappet. Es het zwor gemäss Homepage nuno 1 Platz am 6:35 gha.. Ich ha denn aber denkt «neeeeei, mir sind zwei». Ha denn eifach zwei agwählt und per Zuefall ischs gange. Ich ha dere Sach aber nid traut und bi denn bim Busunternehme kurz go nofroge. Er het denn gmeint «lucky you».. Sie heget na schnell en zweite Bus freigschalte und mer hend dete gad na zwei Plätz becho.. Ja, s’Schicksal het welle, dass mir de bezauberndi See gsehnd, Merci.

E witeri Attraktion wo nuno ein Tag offe gha het isch de Takakkaw Wasserfall (wie cool isch da zum «Takakkaw» z’schribe und uszspreche :-D) – Wieso de jetzt denn zuemacht gsehdner au nachher, für üs völlig nochvollziehbar.. Drum hend mir de abrocheni Tag und s’Kaiser Wetter gnutzt und sind richtig Jasper und denn Golden gfahre – Ja ich weiss, ihr hend kei Ahnig wo da isch (ussert d’Xenia) aber es tönt guet für de Blog. Nachdem die im Touri Center zwei mol gfroget het we lang euse Camper isch (er isch 23Ft.) und maximum 23Ft. zue glah sind, hani denn bim ue fahre au gmerkt wieso. Es isch immer enger worde und denn simmer ufe Kurve zue gfahre wo d’Muriel öppe 3 mol hinderenand gfroget het «Chömmet mir do ue? Chömmet mir do ume?». Danke minere Motorfahrer Usbildig im Militär ischs denn aber mit 2 mol Zrucksetze guet gange.Wenni mir aber vorstelle, die Strecki bi Schnee oder Glätte z'fahre, denn lieber nein.. Es goht nämlich au ordentlich s'Loch ab.. und de Winter chunt baaald..

Chrüze het mer aber garantiert nüme chöne. Wo mir dobe acho sind, hets aber na 2-3 Camper gha wo die maximal erlaubti Längi à 23Ft. (wo bim Igang ageh isch) ziemlich locker agluegt hend, die sind um die 28-30Ft. lang gsi. :-D aber sie sind ja dobe acho - well done, oder so.

Ufem Parkplatz het eus denn gad als ersts en schöne blaue Vogel (en Diademhäher) begrüesst.

Nachdem 30igste sehr geile Bild wo d’Muriel abdruckt het sind mir witer richtig Wasserfall gloffe. De Trail führt ame Gletscherfluss no und dete het mer s’erstmol das hellblaue, würkli sehr geile, Gletscherwasser gseh, hammer.

Witer vorne simmer denn schlussendlich am Wasserfall acho – Ufem Bild wirkt er halt nid so riesig, isch er aber gsi.

Zruck bim Camper hend mir en erschreckende Ablick gha: en öppe 26 Meter lange Reisecar isch det obe ufem Parkplatz gstande. Ich ha denn grad zu de Muriel gseit «never ever». Wo denn d’Chauffeurin usgstiege isch hend mir sie müesse go froge, wie zum Tüfel sie do uecho isch. D’Muriel het sich gfroget, obs evtl. na e anderi Stross do ue het. Ich ha nu denkt, cha ja nid anderscht mögli si. Nachdem aber d’Passagier usgstige sind und ihre all «well done, great job» etc. gseit hend, isch de Fall klar gsi, sie het de Bus tatsächlich die Stross ue gwürgt. Sie hets eus denn erklärt (so wie sie’s eus verzellt het au öppe zum 10’000igste mol). D’Stross isch wie Zickzack oder e Handorgle – Sie fahred denn ganz führe ide erste Kurve, nacher tönds de Retourgang ie und fahred wieder ganz zruck ih die nöchscht Kurve und sobalds wieder ganz hine sind tönds wieder de Fürschigang ie und fahred ue, clever.. Asetze hetets bi dere Längi nid chöne.

Es isch so schös Wetter gsi drum hemmer denkt mir mached grad na en schöne Bergsee, de Edmerald Lake. Er isch au ih dem Gebierge gsi drum het sichs grad au namal ahbote. Nach guete 20 Minute sind mir am See acho und dur da, dass es scho ca. 16:00 gsi isch, sind au scho viel Bsuecher weg gsi. Ich meine, mir hets ja scho paar mol d’Sproch verschlage uf dere Reis (D’Muriel kennts teilwis scho, will sie bereits im 16ni gsi isch) aber bi dem Ablick verständlich, oder?

Oder das? (Nid nur bim Ablick vo minere wunderschöne Frau)

Es tuet so guet, die Bilderbuech Natur wo mer do hend ufzsuge und Energie z’tanke. 

Mer hend eus wieder richtig Lake Louis ufgmacht und hend per Zufall gseh, dass es en chline «look out» Platz gha het, mit paar wenige Autos ufem Parkplatz und em Name «natural bridge».. Mir sind scho paarmol so positiv us em nüt überrascht worde, also hend mir denn aghalte und da isch s’Resultat vo dem spontane Stop gsi:

Was ide Schwiz e Hauptattraktion isch, isch do en spontate Stop am Strosserand:

Am Abig hend mir denn es Restaurant gsuecht, was uf de ersti Blick in Lake Louise gar nid so eifach isch. Banff isch z.B es herzigs Städtli mit eme Zentrum wos jensti Restaurant und Läde het. Do bestoht de Dorfkern useme Touri Center und es paar Lebesmittelläde und Kaffis und chlineri Restis wo meh für Take Away denkt sind. D’Restis sind denn luut üsere Recherche ide Hotelalage verteilt. Die sind aber ade lange Hauptstrosse wo meh grüeh we verbaut sind verteilt.. chas nid richtig beschribe, ufallfäll komisch, irgendwie hends do nid so e guets Konzept gha wos das Dörfli erbaut hend und ez denkets vermuetli «chunt au nüme drufa, isch halt so». Mir sind is erst beschti «Hotel-Restaurant» wo eus agsproche het und mer hends grad ziemlich guet breicht. Es isch ja Thanksgiving Weekend gsi und denn nimmt me natürli mol so en Truthan wos immer ide Ami-Film uftischet.. Ich ha scho Angscht gha das de Cheib furztroche isch, ischer aber überhaupt nid gsi. Dezue hets Herdöpfelstock geh und irgend en Kanadische Itopf wo us Bohne, Wurst und Brot bestoht, leckeeeeeeer.

Früeh is Bett hemmer müsse, will am 05:30 het de Wecker gschället. Ich ha denn döt mini Ehema-Husma Pflicht wohr gno und ha eus Sandwich gmacht und Kaffi und Tee id Thermoskanne gfüllt – Ih dere Zit het d’Muriel defür s ganze Foti-Equitment parat gmacht und het ihri 20 Schichte à Kleider agleit, wills um de Gführpunkt gsi isch. Ca. am 06:25 simmer denn bim Treffpunkt acho und hend de Camper parkiert. Ich bi ganz erstunt gsi, dass e «10 uf 10 Meter» grossi Wulldecki uf mim Rucksack glege isch.. Ich lueg d’Muriel ah und sie luegt mich ah… «jo, mitneh, isch kalt». Nachere ca. 5 Minütige Diskussion, dass au s Badtüechli langet, han ich denn mit Schrecke festgstellt, dass es bereits 06:31 isch.. «Scheisse mir mönd los» (De Shuttle fahrt am 6:35 los, ob mit eus oder ohni eus).. Es het denn e gmüetlichi lockeri Joggingeinheit geh und mer hends no rechtzitig gschafft, ohni Wulldecki..  (Sorry Schads). Am 7ni simmer denn bim See acho und hend zerst na paar Stägetritt müesse ue laufe und hend denn grad chli warm gha. Nachher hend mir eus es Plätzli gsuecht und hend zerst de See/Berg ich de «Dunkelheit» mit Sterne dörfe gnüsse:

Und spöter denn bi Sunneufgang:

Da isch mit Abstand de ihdrücklichsti und schönschti See woni bis ez gseh ha. Nid nur vo de Farbe her sondern au d'Landschaft und die Rueh wos det obe gha het.. Me het immer s’Gfühl, dass da wo me gad gseh het nid cha toppt werde, aber Kanada schaffts jedes mol ufs neue.

Chline Fun Fact no: Für die wo wönd wüsse, wie ich amel euse Blog schribe (Darum wird er so autenthisch und ehrlich):

Am nöchschte Tag ischs denn nid so mega schös Wetter gsi und mer hend mol chli nüt gmacht, Blog gschribe und gspielt... unteranderem het mir d'Muriel s'Yatzi erklärt.. Ich ha spezielli Fähigkeite vo Hand z'Würfle... :-D Han denn aber trotzdem verlore :-(

Und mir sind na de Lake Louise go aluege..Chli weniger spektakulär will me mit em Auto eigentlich dra here cha fahre und rund um de See hends sozege e Autobahn teeret damit die wiisse Instagram-Schüeli nid dreckig werdet vo all dene Influencer - Will do obe isch au s'berüehmte (und tüüre) Fairmont-Hotel. 

Wos natürli au wieder herzigi Vögeli (Kieferhäher) gha het :-D

Als nöchschts gits en chline "Zwüscheblog" vo de Autofahrt vo Lake Louise nach Jasper.. Vo dere gits nämlich viel z'brichte und zum zeige.. :)

Next Stop: Jasper