Banff

Veröffentlicht: 13.10.2024

Banff

Tag 1 – Ufbruch vo Calgary nach Banff

De Morge het natürli mit eme feine z’Morge gstartet – Mir dönd sehr gern, wenn mir Hotels innere Stadt buechet – ohni z’Morge bueche da es soo viel cooli Locations git zum z’Mörgele.. Nachem Esse hend mir denn üsi siebe Sache packt und hend s’Gepäck abgeh. Mir hend nämlich no e Mission gha: Dä Ussichtspunkt vo Calgary. Mir hend aber gwüsst, dass mir am 12:45 spötischtens bim Hotel mit em Uber mönd losdüse, dass mir pünktlich am 13:30 bim Camper sind will mir das Zitfenster hend müesse im vorus bueche. Vom gmüetliche Losschlendere ischs denn immer meh zum Laufschritt worde wills doch en Rieme gsi isch zum Laufe und Zit drängt hät. Nebst em schnelle laufe hend mir aber doch die unglaublich schö Kulisse chöne gnüsse.

Vo dem schöne Pärkli us sinds denn na ca. 150 Stägetritt bis zum Ussichtspunkt gsi – Ich kenn öpper wo ez nid meeeega Freud a dene Stägetritt gha het.. :-D Dobe acho hend mir en eimolige Usblick über Calgary gha – S’grüene respektive goldige vom Park mit dere Skyline im Hintergrund, wahnsinnig schön.

De Uber het eus denn relativ zügig am Hotel usglade – Mir hend s’Gepäck gschnappet und sind in nächste Uber igstige  Am 13:29 simmer uf de Platz gfahre, wie sichs ghört als Schwizer *stolz*.. Nacheme kurze Checkin und de erfolgslose Versüech vom Vermieter, üs no irgendwelchi Zuesatzchabis aztrülle simmer denn an Camper ane gloffe.

Nachdem sie üs alles namal erklärt hend (isch nöd wenig), wenn welli Knöpf druckt mönd werde und ih wellere Reihefolg s Abwasser gleert werde muss hend mir denn agfange üs im Camper izrichte und alles z verstaue. Irgendwenn hets denn gheisse «Please start the engine» und mir sind los gfahre. Muss scho säge, de Chlapf lauft würkli no guet – me cha aber defür au zueluege wie Tanknodle abe goht.. De gueti Benziner suft ca. 40 Liter uf 100km – aber er isch geil und de 5.7 Liter schnurlet wie en grosse. Mir sind denn richtig Banff gfahre (ca. 1 h 30 Min) und d Landschaft isch immer schöner worde – Kanada wie usem Bilderbuech.

In Banff acho simmer zerstmol go poschte – Prislich öppe verglichbar mit de Schwiz. Au da gilt: Gang nöd mit Hunger go poschte……

Nachem Ikaufe hend mir den üsen Camper parkiert und sind richtig Städli gloffe.. Es isch würkli es speziells Städli und me het immer Blick uf riesigi Berge und idyllischi Landschafte. Es isch aber bedütend kälter als in Calgary und drum simmer nid allzulang am bekuntschafte gsi, sondern ziemlich bald ine Brauerei go z’Nacht esse.

Nachem Esse hend mir ufem Campingplatz icheckt und hend ziemlich bald pfuuset, nochdem mir namal de Hirnschmalz aktiviert gha hend zum d Heizig etc. izstelle :-D

Tag 2

Am Morge bini wie uf Nodle ghocket willi die schö Umgebig ha welle gseh. Ich ha mir kurz en Kaffi gmacht und bi wie en alte Familievater mit em Kaffi ide Hand, Trainerhose und em Gilet um de Camper gschliche und ha d’Ussicht gnosse.

Nachem z’Mörgele hend mir d’Wanderschueh agleit – Ja, damol hets nid klappet wo d’Muriel gseit het «ou, ich ha d’Wanderschueh vergesse» damit mir nid gönd go wandere – Nei mir sind z Calgary natürli welchi go poste…. :-D Mir hend ah dem Tag de berüehmti Tunnel Mountain Trail welle mache. De Camper hend mir chöne stoh loh und sind z’Fuess ca. 25 Minute gloffe bis de Trail agfange het. Au do wieder e molerischi Landschaft.

Ehrlichgseit hani de Trail nur schnell flüchtig uf Maps aglueget und er isch denn tatsächlich steiler und länger gsi als agno.. Nach öppe 1/3 vom Weg isch es Eichhörnli wie verruckt a eus verbi grennt und het en Köpfler de Hang ab gmacht – Erstunt dem Eichhörnli noglueget hend mir per Zuefall er Herde Reh entdeckt – D’Muriel het super Föteli chöne mache – Bi erstunt wie wenig Angscht die Tier vo eus hend – Vorsichtig aber nid so schüch wie bi eus. Ich hoffe de Bär isch denn doch namal chli schücher druff…

Mir sind knapp 1 h unterwegs gsi und hend denn so Usblick dörfe gnüsse:

Oder so:

Nachere Stund ue laufe, unzählige Lüt uf ihres «Hi there» mit üsem «Grüezi» z’grüesse, ide Hoffnig das sich evtl. doch no en Schwizer do ane verirrt het, sind mir dobe acho und hend denn zerstmol uf dene rote Stüehl es Päusli gmacht, trunke und d’Ussicht igsoge.

S’Zruck laufe isch massiv schneller gange will es abwärts gange isch, mir Hunger gha hend und s Wetter het ufgrisse und de strahlend blaui Himmel isch fürecho – Mir hend ja na es Ziel hüt gha: de Lake Minnewanka.. Nachem z’Mittag und eme kurze Verdauigsschlöfli sind mir denn richtig Lake Minnewanka, e ca. 20 minütigi Autofahrt. Es isch de ersti vo vielne See und au de mit de am wenigste spektakuläre Farb… aber me sött ja au easy afange  Defür isch d’Kulisse umso beidruckender gsi – es isch eifach riiiiieeeeesig.

Tag 3

D’Muriel isch die Nacht all 1-2 h wach gsi, Grund: Am Abig vorher hets richtig viel Nordliecher gha (wo mir blöderwiis verschlofe hend). Leider sinds ih dere Nacht nüme so cho wie en Tag vorher.. Am 6i am Morge het d’Muriel denn aber uf de Webcam vo Banff gseh, dass sie doch no chömmet. Express hend mir alles abbroche und sind zum See gfahre. Det acho ischs aber leider scho wieder verbi gsi – Jänu, anders mol  Ufem Weg zruck zum Campingplatz hend mir denn ame chline Seeli aghalte und hend dete z’Morge gesse, hend ja alles debi  Dank am Generator hend mir au immer Strom zum Kaffi und Toast z’mache, würkli praktisch.

Nacher het aber d’Muriel doch namal e Mütze schlof brucht bevor mir am Namittag denn zum Johnston Canyon gfahre sind. Es isch lang dur de Wald gange und mir sind praktisch s'einzig Auto gsi. Dete acho ischs aber en ziemliche Massetourmismus gsi - Mir sind jedoch denn acho wo die meiste wieder gange sind - schö antizyklischs verhalte :-D Es isch denn immer schö duruf gange - Highlights vo dere Wanderig sind zwei Wasserfäll gsi - Eimol en chlinere und eimol en grössere. Theoretisch het me no chöne witer laufe aber mir hend denn nachem zweite Wasserfalls umtrüllt. Es isch es traumhafts Liecht gsi und mir sind durch so Wägli gloffe:

Und denn ziemlich gli bim erste Wasserfall acho:

Ufem Weg hend mir immer wieder Eichhörnli gseh - D'Muriel cha dene eifach nid wiederstoh... :)

Nacheme wili simmer denn bim Wasserfalls acho und hend de Ablick dörfe gnüsse:

Nachher hemmer eus denn wieder uf de Weg zruck zum Camper gmacht, nach 200 mol halte will irgend es Eichhörnli über de Weg gloffe isch oder es herzigs Pilzi am wachse gsi isch, hend mirs denn au gschafft :-D

Ufem Heiweg richtig Banff hend mir denn na me spezielle Ussichtspunkt müesse halte - Es isch eifach unmöglich ah so Orte eifach verbi z'fahre und nid z'halte: