Calgary

So, lang ischs gange bis es en neue Itrag geh het - Hürote, da het me zerst no müesse..

Packstress

Nach eme traumhafte Hochzit isch de gross Stress cho - Nach ere kurze Erholigsphase direkt nachem Hochzit hend mir gmerkt, dass de Fokus ellei dötdruf gsi isch und nid uf eusere 6 Wuche lange, bevorstehende Reis durch Kanada und Hawaii.. entsprechend sind mir is struggle cho :) Am Mentig hend mir als ersts eusi Busis id Ferie gschickt - Die liebe Schwiegereltere lueget denn sicher prächtig - ich hoffe d'Luni isch noher nid chugelrund - bettle cha si nämlich...

Denoch het de gross Packstress agfange.. am 1 am Morge sind mir denn au mol fertig gsi und ich ha ah eusem traditionelle Flughafetaxi (Danke Papi) mitteilt, dass anstatt 05:30 06:30 abfahre au ganz okey wer :D Gesagt getan hend eus mini Eltere an Flughafe brocht und mir hend üsi Reis nach Calgary atrette.. Sehr wenig Schlof, Zitverschiebig, unbequemi Sitz im Flüger und namal wenig Schlof - Ich weiss zwor nid wie sich en Zombie afühlt aber viel schlechter denki nid.. Am 15:00 in Canada und 21:00 Schwizerzit sind mir denn in Calgary glandet wo eus en Fahrer persönlich und kostelos abgholt het - Yes, Kanada het nur so uf eus gwartet.. Sehr agnehmi 20 Minute spöter het eus denn de Fahrer vorem Hotel usglade.. Nochdem er aber nach em Usstige kei eizige Türe meh het chöne ufmache zum s'Gepäck uslade und denn relativ zügig uf de Fahrersitz ghocket isch hani schnell Herzrase becho willi gmeint ha "so, de macht sich ez mit em Gepäck usem Staub"... Ha na schnell s Nummereschild gfötelet und ufs beschte ghofft.. Er het denn aber die 20 Kilo schwere Gepäckstück müehsam via Hintersitz füre grisse :D Drum hets denn Trinkgeld geh..

Mir hend denkt es isch schlau schnell aneligge... nach 3 h ischs denn 20:00 gsi und ich ha denkt es wer na gschid was go esse damit mir nid am 03:00 mit chnurrendem Mage verwachet.. D'Muriel het au gwüsst das es schlau isch, wo ich aber provokativ gfroget ha "entweder ez ufstoh und sus löschi ab und mir schlofed witer" hets nur gheisse "ablösche"... ha sie aber denn glich na zum Hotel us brocht :D

Es guets argentisches Stake House hets sölle si und das isch es au.. 

Vo Dry Age zu Ribs und Burgers hets alles gha.. ich ha mir es feins New York Strip Steak gönnt und d'Muriel - 3 mol dörfeder rote ? ? ? - Pommmeeeees...

 Es isch sehr sehr geil gsi und mir sind gsättigt und z'friede is Bettli..

Tag 2:

Am Morge relativ früeh sind mir beretis los und hend fein z‘mörgele 

Es isch doch no chüehl gsi und mir sind froh gsi, hend mir e Jacke ahgha.. Nacheme Zitli laufe sind mir ame Cowboy Lade verbi gloffe wo d'Muriel im 2016 mit de Xenia en Cowboy Huet drin kauft het.. Natürli het sie au damol nid chöne wiederstoh und het sich e richtig cooli Jacke (wo ich empfohle ha :)) gönnt..

Fun Fact: Ich glaub in Calgary het chum öpper en Regeschirm - Warum ich uf die Idee chume? In Calgary gits sogenannti "Sky Walks" - Das heisst, dass praktisch jedes Hochhus mit ere "Brugg" verbunde isch.. 

Somit chasch blöd gseit dur die ganz Stadt ohni eimol a die frisch Luft z'go - Mit some Plan chasch dich orientiere :D Richtig lustigi Idee..

Wenn me viel Lauft het me au viel Hunger - Meh laufe meh Esse - ganz nach mim Gusto, will Calgary het kulinarisch sehr viel z'büte.. Mir sind denn am Mittag ine Food Hall wos vo vielne Länder chli was gha het - Ob Tacos, Korea Fried Chicken bis hin zum Tschingge Frisbee hets alles gha.. Ich ha mir Korean Fried Chicken gönnt.. me isch ja nur eimol in Koooo äääh Kanada..

Impressione

Do eifach na es paar Idrück vo eusne (bisher) 12'000 Schritt dur Calgary ame sunnige Herbsttag - so schö..

Nachere Pause im Hotel sind mir denn na go z‘Nacht esse. D‘Gegend isch eher chli abgläge gsi und s Restraunt vo usse het so usgseh, als ob de Gordon Ramsay mol mösst verbi cho und die chli zemme falte aber dinne ischs denn würkli positiv schö gsi und s Esse fein. Am letzte Tag in Calgary sind mir relativ bezite ufgstande, fein go z'Morge esse und hend denn uscheckt. Da mir nochli Zit gha hend (will de Camper erst exakt am 13:30 cha bezoge werde) sind mir denn namal chli dur d'Stadt gschländeret und hend eus unteranderem en schöne Ussichtspunkt aglueget. Vo do obe het mer en schöne Blick über d'Skyline vo Calgary.

So, jetzt machemer eus mit em Uber uf de Weg richtig Camper und fahred denn die erste Kilometer vo eusere Kanada Reis nach Banff.

Next Stop: Camper schnappe und ab nach BANFF, Rocky Mountains