O'ahu, Hawaii

Hawaii, O'ahu - Honolulu, Waikiki Beach

Mir sind vo Vancouver mit em Uber richtig Flughafe gfahre. Mir hend en nette Fahrer verwütscht wo sogar het chöne rede, gitz nid viel :-D Natürli isch er en Toyota Prius gfahre, wie 50% vo allne Uberfahrer - De Rest fahrt en Tesla, Model 2. Mir hend eus denn guet unterhalte mit ihm und wo er ghört het, dass mir mit Westjet flüget het er nur gmeint "ah denn mömmer ja nid pressiere, die hend immer Verspötig". Uf eusem Check-In Dokument isch aber sogar gstande das mir 10 Minute früehner flüget.. 

Mir hend na s'letztmol im Tim Hortons zuegschlage bevor mir Kanada verlönd, die gitz nämlich nur in Kanada - Guet gsi. Jo, was söll ich sege, schlussendlich sind mir mit 1 1/2 verspötig losgfloge :-D Es isch uf Hawaii scho dunkel gsi wo mir zum Landeflug agsezt hend. De Flughafe in Honolulu isch eigentlich sehr offe (nid viel Fenschter) und es isch scho schöö warm gsi wo mir richtig Gepäckband gloffe sind. Nachdem mer üsi Köffere gholt hend (zimmli schnell gange) simmer is Hotel gfahre, wo ich für die erste 5 Nächt buecht gha ha. S'Vierteli isch ez nid meeega amächälig gsi. Bim Check-In het de Typ so gar kei Luscht gha. Mir sind zum Zimmer gloffe - en ganz lange, düschtere und muffige Gang entlang - de Teppich isch au wüescht gsi und het eus mit "Aloha" begrüesst... Ich ha scho schlimms gahnt, ha aber extra nüt gseit. Im Zimmer acho bini denn richtig entüscht gsi - Es isch füecht gsi, sehr alt und es het Hoor vo anderne Lüt gha - eifach nid so wie es Hotel muess si während de Honeymoon (und au sust nöd). Es het meh wieder chli Hostel-Vibes vo Südamerika geh, det hend mirs aber gwüsst das es so cha si. Aber für de Pris dörf da nid si. Ich ha denn direkt agfange Google wegere Alternative. Am Morge hani denn de Muriel gseit "Mir mönd do use". Sie hets zwar nid ganz so schlimm gfunde wie ich (will sie ebe Südamerika im Hinterkopf gha het, dass es mir det ab und zue sogar schlimmer gha hend) aber sie isch au nid unglücklich gsi zum wechsle. Mir hends denn am Morge chöne kläre, dass mir nur ei Nacht hend müsse bleche und sind denn nachem z'Morge verduftet :-D

Eigentlichi Start Hawaii Honeymoon 

So, dass Ereignis ghört zwar dezue aber vergessemer ez wieder, will jetzt eusi Honeymoon uf Hawaii so richtig agfange het. Mir hend es super Hotel direkt am Waikiki Beach gfunde. Es isch sogar s'erste Hotel ide Stadt gsi (1904 glaub ich). Mir sind ane gloffe und es isch eifach hammer schön gsi:

Wo mir ie cho sind ischs genau wie usse, zum verliebe gsi. Es isch au alles offe, höchi Rüm und alles wiis und sehr schö igrichtet. Me merkt halt, das isch es nostalgischs Hotel.

Am Check-In ahcho han ich denn biz de Hundeblick ufgsetzt und han dem Typ verzellt, dass eusi Honeymoon uf Hawaii "ganz schlimm" gstartet het und mir entüscht sind vom letzte Hotel und mir hoffed, dass es da besser isch... "NEI, das dörf nid si, ich will nid das eue erst Idruck vo Hawaii schlecht isch, ich ha eu es speziells Zimmer und es Willkommens-Gschenk". 

Ich ha via Booking eigentlich s'günstigste Stadtzimmer buechet (Das isch scho tür gsi). Mir hend denn aber es Upgrade becho mit Meerblick und e Kategorie höcher, ohni Ufpriis. Nei, das isch nid schmarotzere - das isch d'Honeymoon Karte usnutze :-D

De erste Tag hend mir denn mehrheitlich mit am Pool chille, chli esse, is Meer gumpe und gnüsse verbrocht. 

Dur da, dass mir ez es Mariott Hotel gha hend, hemmer gwüsst, dass mir defür nid für 200 Dollar pro Person chönd go z'Nacht esse. Honolulu isch halt wie New York City, eifach alles drü mol so tür wie bim Rest. Mir hend aber dur eusi Südamerika Reis schochli Tricks kennt, wie me günschtiger cha esse - Go det ane wo d'Locals essed. Das hend mir denn au gmacht und so cha me au guet für 20-25 Dollar pro Person esse und nid wie bide Restaurants ade Beach für 50-60 Dollar ufwärts.
Mir hend schlussendlich ime würkli schöne Ikaufszentrum gesse.

Am nöchschte Tag hend mir endlich eusen Jurassic-Park-Jeep dörfe fasse. 

Mir hend en bime Familieunternehme gmietet und de Sohn vom Chef het de Sitz in O'ahu gführt - s'Hauptgschäft lauft nämli in Maui. Es isch so unkomplitziert gsi und de Willy isch de hammer gsi. Er het eus denn au grad na es paar Tipps uf de Weg geh. Es wer zwar nid planet gsi, aber somit hend mir bereits en Ort zum z'Morge esse gha und en Wasserfall zum besichtige.
De Jeep loht sich super fahre. Er het au erst 2000 Kilometer druf gha. Dur da, dass mir aber XXL Offroad Pneu druf gha hend und entsprechend wenig Luftdruckt und e weichi Fäderig, dass es nid so schloht über d'Löcher, isch es am Ahfang ungwöhnlich schwammig gsi zum fahre. Und das Auto het en Ischlag gha, unglaublich. Me het sozege uf de Stell chöne chere. Ich glaub mis Rennvelo het de schlechter Ischlag. Mir sind denn als ersts ines Tea-House am Rand vo Honolulu, wo de Dschungel scho agränzt go Zmörgele.

Es isch hammer gsi und au wieder chli wie me ide schwiiz wür sege "urchig" igrichtet.

D'Muriel het Pancakes gha und ich eis vo de beschte Açai vo mim Lebe.

Nachem esse hend mir nur öppe 5 Minute müesse fahre, bis mir parkiert hend für de Wasserfall. Dur da, dass eus en Student Tipps geh het, hetter halt au gseit wo me gratis cha parkiere und nid die tüüüüre Parktickets löse müend. Mir hend somit ime Vierteli ide Nöchi parkiert. Usgstiege hani nur es "jöööööööööö-ööööö" ghört. Ich ha gwüsst, en Busi, en Hund oder sus es Baby-Tierli isch ume. Es sind denn Baby-Entli gsi wo de Muriel fast ufd Kamera gumpet sind :-D

Ich ha gfunde es isch schlau mit Flipflops die Wanderig z'mache. Ha denn schöö gfluecht und öppe eine wo eus entgegegloffe isch het uf mini Flipflops zeiget. Uf em Weg zum Wasserfall, wo nid het wölle Ende, sind mir no ame Hollywood-Filmset verbi gloffe. 

Sie dreiet ih dem Nationalpark grad d'Echtverfilmig vo Moana mit em Dwayne Johnson. De hend mir aber leider nid gseh. De Weg zum Wasserfall isch unglaublich schö gsi.

De Wasserfall selber hend mir denn nach 50 Minute erreicht. De het eus ezt nid so us de Socke ghaue aber de Weg selber ischs allemal Wert gsi. Ihr chönds eu chli vorstelle wie ide Masoalahalle - nur ischs ide echte Natur. Glichi Luftfüechtigkeit und halt alles viel grösser und offe, leider aber ohni Äffli.

Mir hend nach dem Wasserfall na zwei Stops uf em Plan gha: Ho'omaluhia Botanical Garden und de Byodo-In-Tempel.

Mir sind denn s'erstmol so richtig umd Insle gfahre und hend eus es Bild vo dere schöne Nautur chöne mache - Ich meine da isch de Usblick vo de Schnellstross:

Mir sind denn au scho ziemlich gli i dem Botanische Garte acho und so bisch ih de Park ie gfahre (Het schochli was vo Jurassic Park, oder?):

S'Wetter schloht sobald vo de Küste weg bisch so schnell um und meischtens ischs Wolkeverhange - Machts aber au chli us, findi.
Mir sind denn dur de Park gfahre / gloffe und hend die Natur gnosse.

Nach 100'000 Planze und Zeugs sind mir in Richtig Tempel gfahre. De Byodo-In Tempel isch en 1:1 Nohbau (komplett ohni Nägel) us Uji in Japan. De Tempel hends 1968 zur 100-jährige Gedenkfiir vo de erste japanische Iwanderer errichtet.

Isch no speziell wend so im Ami-Hawii Mood bisch und denn do so en Tempel atriffsch. Es isch extrem ruhig gsi, teilwis isch Musig im Hintergrund gloffe. 

Es het au en riese Gong gha wo all paar Minute abgange isch - s'erstmol hani fast en Herzkasper gha.

Am nöchste Tag hend mir en Abstecher uf die ander Site vo de Insle gmacht - Für das isch mer so ca. 1h 30Min unterwegs. Unteranderem hend mir eini vo de gröschte Ananas-Plantage aglueget.

Die berüehmti Dole-Plantation isch ca. 1920 eröffnet worde und het bis 1950 über 90% vom Ananaskonsum weltwit abdeckt.

Mir hend eus denn fürs Zügli und de Garte entschiede.. Okei, ich muss zuegeh, eveeeentuell het do d'Tourischte Falle biz zuegschlage. S'Zügli isch herzig gsi und cha me mache... muss me aber au nid - s'gliche gilt für de Garte. Do isch ezt de Botanisch Garte wo gratis gsi isch 100 mol besser gsi - Mir hend aber glich Freud gha.

Nachdem mir die Farm aglueget hend und es langsam heiss worde isch, hend mir eus uf d'Suechi nacheme Strand gmacht. Wills sowieso scho so en schöne Tag gsi isch, hend mir natürlich am Strand no e Schildkrot gseh wo am pfuuuse gsi isch.

Leider hets a dem Strand mega gwindet und drum simmer eis witer an Waimea Bay Beach. Um ehrlich z'si - dete hets genau glich gwindet. Aber es het det es luschtigs Phänomen gha: De Strand isch relativ grad gsi. Wennd aber is Wasser hesch welle, ischs ca. 3 Meter s Loch ab (Höheunterschied). Dur da, dass es denn so gwindet het hets au recht Welle gha. Wend somit is Wasser bisch hets eim immer ca. 5 Meter is Meer use grisse und denn kurzi Zit spöter mit de nächschte Welle wieder as Land gspüelt und du hesch nix müsse mache, nur triiibe loh. Aso isch mer immer wieder ue an Strand gspüehlt worde und denn het eim s'Meer wieder use zoge - da isch so luschtig gsi. Mir hend da sicher 30 Minute lang gmacht und hend ei Freud gha. Ich het das no X Stunde lang chöne mache.

Ah ja stimmt, es isch übrigens de 31.10.2024 gsi, was ih de USA Halloween bedütet. Leck isch da luschtig gsi. Einersits sind im Restaurant all Bedienige verkleidet gsi und me het s beschte Kostüm dörfe wähle:

Und ich meine, in Honolulu lauft eh scho viel, aber was a dem Obig alles uf de Stross gsi isch isch krass gsi - so e riesig Menschemengi. D'Hauptstross isch zwar nid gsperrt gsi, aber uf beidne Site vom Trottoir voll mit Lüt. Es isch kein offizielle "Umzug" gsi wies mir ade Fasnacht kennet, aber dLüt sind trotzdem uf de rechte Site ue gloffe und uf de andere Site wieder abe gloffe - und es sind 95% verkleidet gsi. Mir sind denn au chli mitgloffe und sind teilweis stoh blibe und hend eus kaputt glachet über die einte Kostüm - echt orginell.

Am nöchschte Tag hend mir eifach en schöne Beach Day gmacht - Glaubs am schönschte Strand vo O'hau

Am Abig ufem Heiweg hend mir na ame ganz spezielle Ort halt gmacht, ime Tierheim. Die wo am Hochzit debi gsi sind hend ja vo de Prophezeiig "MAUI" ghört. Mer hend denkt "chum mer gönd eifach mal go luege". Ja, blöderwis hend mir eus würkli inen Wauzi verliebt, wo mir denn au Tag spöter, nach de "Nacht drüber schlofe" namal sind go aluege. Mer hetet en mitgno.. aber leider sind eus z'viel Stei in Wäg gleit worde. Mit de nötige Impfige hets e Problem geh und die Lüt im Tierheim hend üs leider nid würkli unterstützt und darum ischs eich nid mögli gsi, ih de verblibende Zit de Wauzi id Schwiz z'hole. Wäremer Ami's wers keis Problem gsi. Ich hoffe sie het ez es guets Plätzli.

Am letzt Tag hend mir namal en Beach/Pool Tag gmacht und sind denn spöter an Flughafe. Nach 7 Täg uf O'ahu flügemer ez nach Maui  - Die Insle isch ca. 30 Minute Flugzit weg und sött theoretisch chli weniger touristisch si wie O'ahu. Mir flüget jewils mit de Airline Southwest - es Flugticket uf e anderi Hawaii Insle kostet immer um die 80 Dollar inklusive Gepäck. Isch echt e super Airline - Neui Flüger, fründlichs Personal und sie sind pünktlich ;-)

Nöchschte Halt: Maui