Jasper

D'Muriel het mer uf de Hifahrt nach Jasper no gseit, dass sie vor 8 Jahr ca. 70% vo allne Tier wo sie in Kanada gse het, in Jasper gseh het. Ich ha denn nur ghofft, dass nach de Waldbränd nid all Tierli gflüchtet sind. Mir sind denn a de erste Waldbränd verbi gfahre und ca. 2 Kilometer vor Jasper het d'Muriel bereits gruefe "Ahaaaalte". Und am Strosserand hend mir bereits die erste Wapitis gseh grase.

Als aller ersts sind mir is Visitor Center gange da mir zerstmol hend müesse wüsse, was alles offe het und was no gschlosse isch ufgrund vo de Waldbränd. Zuesätzlich isch d'Frog im Rum gstande, ob mir en Campingplatz im nächschte Dörfli (ca. 35 Minute weg) oder in Jasper es Hotel nemed (Campingplätz im Dorf müend zerst neu ufbaut werde). Ich ha denn de Chlapf normal, wie ide Schwiz parkiert - Isch denn aber anschinend nid guet gsi will mir hend die erst Verwarnig ade Windschutzschiebe gha, da me in Kanada nid uf de Gegefahrbahn (Entgegegsetzti Fahrtrichtig) parkiere dörf. Ich ha nur 65 Dollar glese und bi grad gstiege :-D aber isch ja nur e Verwarnig gsi, findi no nett.. Ufallfäll sind mir ja vorher im Visitor Center gsi und es het sit dere Wuche eigentlich alles wieder offe bis uf die einti Canyon. Wieder offe will sie alli gföhrliche Bäum wo abknicke und ufd Strosse gheie chöntet abgsäget hend. De nächschti Campground wer denn in Hinton gsi, 50 Min Fahrt. Denn hend mir schnell entscheide, dass es schläuer isch, es Hotel z'neh. Einersits sind mir grad im Dörfli und unterstütztet so d'Lüt und zuesätzlich mömmer nid immer sowit fahre.

Bild Strofzettel (wird nahgliferet)

Mir hend eus denn es Hotel gsuecht und d'Muriel isch ie und het eus es super Zimmer klar gmacht, s'Stichwort Honeymoon het zoge :-D S'Wetter het dütlich zue tue sit mir Lake Louise verloh hend und drum hets eus nüme wit wegzoge. Mir hend ihchecket und sind denn was Feins go esse.

Am nächste Morge hend mir usem Fenster glueget und es isch immer na bewölkt gsi aber mit vereinzelte blaue Fetze am Himmel wo d'Sunne dure druckt het. Mir hend eus uf de Weg richtig Maligne Lake gmacht. Mer hend natürli en kurze Halt bim Starbucks gmacht will ich na en..... rotet mol..... Pumpkin Spiced Latte ha welle.. Ich glaub da Züg macht süchtig.. De Weg zum See isch e "one-way" Stross gsi, sprich du fahrsch ue und fahrsch de glich Weg wieder abe. Was mir bim uefahre nanig gwüsst hend, isch das mir praktisch all Tier ah dem Tag werdet gseh, wo mir wönd gseh. In Jasper (Rund 1'100 M.ü.M) sind mir denn bi Plustemparature gstartet und hend die 40Km richtig See in Ahgriff gno. Je witer obe mir gsi sind desto kälter ischs worde und es het denn irgendwenn sogar agfange schneie und wiis werde. Als ersts hend mir wiit weg en Hirsch mit eme riese Gweih gseh, de hend mir aber nid chöne fötele willer z'wit weg gsi isch. Denn sind mir am erste vo zwei See acho, de Medicine Lake. De het aber fast kei Wasser gführt. Ufem Grund hets aber viel Spure gha und mir hend gwerweisslet, vo wellne Tier.

Biz witer vorne hend mir denn es paar Auto gseh stoh und hinde dra es paar Tierli.. Es sind Reh gsi :) Und sie hend nid würkli viel Stress gha zum d'Stross schnell z'überquere..

Mir sind irgendwenn witer gfahre und ich seg de Muriel "Als nöchschts gsehnd mir en Elch". Es isch kei 3 Minute gange, do isch vo witem öppis bruuns uf de Stross ghocket.. Was isch es gsi? En Eeeeeeelch. De het wie verruckt s'Salz vo de Stross gschlecket.

Schoo ihdrücklich, en Elch ih freier Wildbahn mol z'gseh.

Nachdem mir de Elch na gueti 20 Minute chli beobachtet und natürlich au fotografiert hend, sind mir witer richtig Malgine Lake gfahre. Mir sind ez selbstverständlich umso vorsichtiger gfahre wills anschinend doch viel Tierli ume het. Bis zum See hend mir denn aber kei Glück meh gha und es isch nüt meh uftaucht. Mir hend parkiert und ich ha döt ufem Parkplatz en ältere Herr gseh, wo bizeli verwirrt um sin Van gloffe isch und öppis gsuecht het. Was ich au gseh ha: dass er e Kamera mit eme riese Objektiv gha het und Tarnhose.. Ob das echt en Wildtierfotograf gsi isch? Mir nennet ihn jetzt mal Buddy. D'Muriel isch denn zu ihm ane und het en gfroget, ob er de Elch uf de Stross au gseh het.. Er het drufabe gseit "Ah, s'Wibli? Für d'Wibli halt ich nüme ah, nur für de Bulle" (- mir Ahfänger..). Denn hets ahgfange, ei Räuberpistole noch de andere und es isch würkli intressant und amüsant gsi, zum em zuelose. D'Muriel het denn gfroget ob er weiss wie de Vogel heisst:

Er hets denn gseit und het gfroget, ob sie es guets Foti mache will.. Kurzerhand nimmt er sis Handy füre und loht Lockrüef laufe. Sie sind denn würkli chli nöcher cho, aber nid so nöch wie gwünscht. Er luegt eus ah und seit "Ich mach ez öppis wo überhaupt nid erlaubt isch, s'Rüefe ellei git e Buess vo bis zu 2'000 Dollar, vom Füettere fanget mir ez gar nid erst a". Er het denn en Toast gholt und denn ischs öppe 5 Sekunde gange und öppe 8 vo dene Vögel sind um üs ume gsi, ufem Autodach und uf em Kopf und uf de Hand vom Buddy - uh huere herzig. Sogar en riese Raab isch deher z'stiefle cho. D'Muriel het denn e super Foti vo ihm gmacht mit em Vogel uf de Hand und het en denn gfroget, ob er da Foti will und hets em zeiget. Er relativ schnell und troche "Nei, und ich wött au nid das da Foti jemols öppert gseht". Fotografiere loh het er sich aber und da het en anschinend nid gstöret - ich glaub eifach er het chli s'muffe becho weg de 2'000 Dollar. Vermuetlich kennt me ihn ide Gegend :-D (Ich due ez s'Bild gschider nid do ie). Mir hend also gwüsst, es muss na en Bulle ume ha wo also Königsdisziplin vo de Elche isch zum Fotografiere - Challenge Accepted.

Mir sind denn chli um de verschneiti See gloffe und hends eifach gnosse.. Soguets gange isch, will de Muriel ihres Zäh-Schlottere immer lüter worde und's doch langsam chalt worde isch.

Und natürlich het d Eichhörnliflüschterin Muriel wieder die herzige Teiler aglockt und gfötelet.

Mir hend eus denn irgendwenn wieder uf de Rückweg gmacht ide Hoffnig, dass mer doch namal en Elch atreffet..

S'Glück isch uf eusere Site gsi - Mir hend sogar e Mama Elch mit Baby Elch gfunde..

Witer richtig Jasper hend mir denn auno die berüehmte "Mountain Sheeps" gseh.. Wieso Schöf weissi au nid, sind für mich eher Geisse.

Irgendwenn sind mir denn im Hotel acho und hend das "Glück" mol müesse verarbeite. Hend doch viel gseh ah eim Tag, meh wie sit em Afang in Banff und Lake Louise zemme. Mir hend also no super fein z'Nacht gesse und sind denn ab id Federe.

Am nächschte Tag bim z'Morge hets eus denn glich kei Rueh loh und mir hend d'Locals gfroget "WO SIND D'BÄRE"? Sie hend eus denn chli erklärt wo das mer die finde chönnted und wos als letzst gsichtet worde sind. Nach dem aber die eint verzellt het, dass ihren Fründ chürzlich vome Bär heibegleitet worde seg wo er am Bike gsi isch, ischs eus nüme so wohl gsi. Sie hend eus denn netterwis en Bärespray usglehnt und mir hends denn also versuecht.

Mir sind denn chli an Rand vo Jasper gfahre, wo überigens scho voll Halloween herrscht:

Döt ahcho hemmer denn eh 1 1/2 stündigi Wanderig gstartet. Vermuetlich wer sie nur 1 h gsi aber mir sind bi jedem Grüschli stoh blibe will mir eus fast id Hose gmacht hend, dass de Bär eus ahgrifft. Ja, vermuetlich z'fest Angscht gha und de Bär het denkt "Nei, da dueni denne nid ah". Darum hend mir leider kei Erfolg gha - Schön isch es trotzdem gsi:

Mir hend eus nachher entschlosse, namal zum Maligne Lake z'goh und det evtl. usem Auto en Bär z'finde - De Papa Elch isch schliesslich au na uf de Bucket List gsi. Laaaaaang isch nüt cho und denn ufsmol - TADAAAA:

Papa Elch ih sinere volle Pracht. Er isch halt eifach fuul im Wald glege und isch nid gloffe darum hets zerst au kei guets Föteli geh will z'viel Äst und Bäum im Weg gsi sind. Irgendöppert isch denn frecherwis bizli id Nöchi.. Wered mir aber am wandere gsi, weremer au ah ihm verbi gloffe.. vo dem her..  Dobe ahcho hend mir relativ schnell wieder gcheert wills doch scho biz spoht gsi isch. Do hemmer altbekannti ufem Heiweg gseh, wo glaubs Freud am Salz gha hend, wo am Camper klebet het.

In Jasper selber hend mir na chöne zueluege, wie die zwei junge Wilde enand gjaggt und gspielt hend:

Danke Jasper - Tiermässig bis ezt s'absolute Highlight gsi.

Am Tag druf hend mir denn na am Morge die agsammlet Wösch gmacht und sind ahschlüssend vo Jasper richtig Vancouver gfahre.

Als nöchschts chunt en Blog mit mehrerne Ortschafte ih eim. Das will mir ab jetzt ufem Weg nach Vancouver sind und teilwis nur haltet zum Pfuse. Viel gitz denn mengisch nid zum verzelle und darum machemer grad es paar zemme :-) Ihr werdets gseh, git doch na paar cooli Storys.

Nöchschti Stopps: Clearwater und Kamloops