Autofahrt Lake Louise -> Jasper & de Waldbrand

Autofahrt vo Lake Louise nach Jasper und d'Waldbränd vo Jasper

Eigentlich schribemer bime Locationswechsel kein Blog, aber da mir uf dere Autofahrt vo knapp 3h relativ viel erlebt hend, lohnts sich zum en eigete Blog z'schribe, respektive d'Bilder z'teile :)

Mir sind ca. am 9ni abgfahre, da mir nid so en grosse Zitdruck gha hend. Mir sind devo usgange, dass mir kein Campground in Jasper weg de Waldbränd finde werdet und sowieso ines Hotel müend.

Über die Waldbränd würi gern e biz meh ushole, da üs das würkli under d'Hut gange isch:

Waldbränd Jasper Juli 2024

D'Waldbränd vo Jasper sind es dramatischs Ereignis gsi wo d'Region stark prägt hät. Darum verzellet mir eu kurz was drüber: Im Juli 2024 het 5km usserhalb vo Jasper en Blitz igschlage und het ufgrund vo de Trocheheit en Waldbrand usglöst. Dur da, dass es ebe so troche gsi isch und en starche Wind gange isch, het das Für innerhalb vonere halbe Stund Jasper erreicht. Die 20'000 Touriste und 25'000 Iheimische hend sich zum Glück rechtzitig chöne in Sicherheit bringe. Rund 1'000 Fürwehrlüt sind ih kurzer Zit im Isatz gsi. Sie hend aber teilwis de Kampf gege die bis zu 100 Meter hohe Flamme müesse ufgeh. Schlussendlich sind ca. 32'000 Hektare dichte Wald abbrennt- -> Als Orientierig: De Kanton Schaffhuse het guet 30'000 Hektare -und die sind zerstört. Das isch s'gröschte Für wo ih dem Nationalpark gwüetet het (ih de letzte 100 Jahr). Leider isch au 35% vo de Stadt selber abebrennt. Obwohl en Waldbrand en Teil vom natürliche Lebenszyklus vo Wälder isch, schädigt so en Brand vo dere Grösseordnig d'Tier- und Pflanzewelt erheblich. Gemäss Park Canada het sich zwor en Grossteil vo de Tier (Wapitis, Grizzlybäre und diversi Vogelarte) durch ihren natürliche Instinkt ih Gwässer und id Höchi chöne rette, aber ihre Lebensrum ih dem Gebiet isch halt zerstört worde. Mir hend jedoch bereits viel Wapitis und grösseri Hirscharte ih de zerstörte Flächi gseh aber vieli hend s'Gebiet gwechslet

Wie gseht d'Regenartion us?

1) Kurzfristigi Erholig (1-2 Jahr)
Direkt nach em Brand isch de Bode riich a Nährstoff da d'Äsche und die verbrennte Materialie in Bode idringed. Innerhalb vom erste Jahr wachset somit wieder Gräser, Krüter und chlineri Pflanze. Wildtier wie Grizzlybäre, Wölf und Hirsch gönd relativ schnell wieder is Gebiet zruck da sie de sich erholende Pflanze folget. S'Gliche gilt fürd Vögel und Nagetier, sobalds halt wieder chli Bäum hend wos chönd Niste und Schutz sueche.
2) Mittelfristigi Erholig (5-10 Jahr)
Innerhalb vo 5-10 Jahr wachset die erste Strücher und Bäum wie Kiefern und Espe da die Bäum sehr gern Liecht hend und drum schneller wachse chönd - Erst nachher wachsed die restliche Bäum wie Fichte etc. Bis denn werdet au die meiste Tierarte wieder stabil zruck si da d'Nahrigsquelle wie Beeri, Same und klini Bütetier wieder vermehrt verfüegbar sind.
3) Langfrischtigi Erholig (20-50 Jahr)
De Wald wird wieder viel dichter und artericher. Kieferwälder und Mischwälder fanget ah sich wieder durezsetze und wird noh und noh s'Landschaftsbild vom typische Wald vo de Rocky Mountains zruck becho. Somit stabilisiert sich au s'Ökosystem. De Lebensrum vo de Tier und Pflanze wird allmälich wieder stabil. D'Population vo Raubtier und Bütetier kehrt wieder zu normale Wert zruck.
4) Langfrischtigi Uswirkig (50+ Jahr)
Die vollständig Wiederherstellig wies vorher gsi isch cha bis zu 50 oder sogar 100 Jahr goh. Alti Baumarte wie Douglasie und Fichte wachset sehr langsam und bruchet somit chli me Ziit.

Ja, das wer so s'Gröbschte. Das wer jetzt endlich mol es Thema, woni gern ide Schuel eh Arbet und en Vortrag drüber ghalte het.. Jänu :)

Zruck zu eusere Autofahrt vo Lake Louise nach Jasper:

Mir sind wie gseit ca. am 9ni abfahre. Ufem Weg sind mir a jenschte Sehenswürdigkeite dra verbi gfahre und bi de einte hend mir denn au aghalte. De ersti Stop isch bim Peyto Lake gsi. Mir sind scho relativ höch gsi, ca. 1'800 Meter über Meer und somit isch de kurzi Spaziergang vo 15 Minute relativ streng gsi. Bi de Ussichtsplattform acho hend mir denn en sehr schöne Usblick über de Peyto Lake und s'Valley gha: 

Berge sind do scho ziemlich wiis gsi und Temparature sind tüüüüüf abe gheit:

S'Wetter het mit em Verloh vo Lake Louis kehrt und es isch chalt und grusig worde.. Es het immer wieder gregnet und denn wieder trochni Phase geh. Die wechselndi Wetterlag het aber au zunere ganz mysthische Stimmig gführt und ich muss ehrlich sege, dass het die Autofahrt no spektakulärer gmacht. Somit hets au cooli Bilder vo unterwegs geh:

Ufem Höhepunkt vom Weg nach Jasper sind mir uf 2'250 Meter über Meer gsi und natürlich hets dete denn au gschneit. Üsi Snowflake (Name vom Wohnmobil) het denn au nüme ganz eso schnell möge de Berg uf "renne" :) Dobe acho hend mir na schnell bim Gletscher aghalte.. 

Leider het me nid viel gseh und ue laufe het üs au biz agurkt da es würkli chli es "Sauwetter" gsi isch.. Nachem dobe acho ischs natürli zwungenermasse wieder s'Loch ab gange. Chum im Nationalpark acho hend mir s'erste abbrennti Tal entdeckt. Es isch relativ gross gsi, öppe so gross wie s'Skigebiet Laax. Do hend mir nanig gwüsst was in Jasper selber uf üs zuechunt..

Kurz vor Jasper hend mir na bime chline Wasserfall halt gmacht:

Hunger hemmer gha und drum hend mir denn ufem Parkplatz de Generator agworfe und eusi restlich Pizza vom Vorabig ide Mikrowelle warm gmacht.. Do hend die Touris schööö gstunet wo mir z'Mitzt im nirgendwo heissi Pizza gesse hend. Nachem schnabuliere sind mir uf Jasper ie gfahre und denn isch eus de Kinnlade abe.. Sowas hend mir na nie gseh. Doch ihdrücklich und ufe Art schö aber mit ere unglaubliche Wehmuet hend mir die riesige verbrennte Flächene aglueget.

Mir sind denn als ersts is Touriste Infocenter gange und hend eus mal erkundigt was alles scho wieder offe het und was nid. Eis muessi na schnell erwähne: De Highway Alberta 511 (es git nur ei Strass) wo vo Lake Louise nach Jasper führt, het erst sit ca. 4 Wuche wieder offe. Solang isch die Stross sit em Juli zue gsi. Einersits hets na Bränd gha, Gluetnäster und d'Förschter hend die abbrennte Bäum direkt nebet em Highway müesse fälle damit die nid irgendwenn uf es Auto krachet. Aso bis kurz bevor mir gange sind hend mir nidmol gwüsst ob mir überhaupt uf Jasper chönd. Mir sind somit nid die erste, aber sicher under de erste Touriste gsi wo Jasper wieder bsuecht hend.. Und da het me au gmerkt. D'Lüt hend Freud gha wos eusen Camper gseh hend, ah de Fassade vo de Läde, Kaffis etc. stoht "Welcome back, we are open again". Leider hend aber na all Campgrounds zue da einersits d'Infrastruktur abebrennt isch und anderersits d'Lüt anders z'tue hend als sich umen Campground zkümmere.. Somit hend mir eus denn es Hotel gsuecht. Mir sind also direkt ide Stadt und müend nid jede Tag 1h bis zum nöchschte Campground usserhalb vo Jasper fahre und zuesätzlich unterstützed mir mit eusem Cashflow d'Stadt.

So, de Rest gitz denn im Blog Jasper :-))