ninanesto
ninanesto
vakantio.de/ninanesto

Isla Grande - Rosario

Veröffentlicht: 08.03.2018

Isla Rosario

Mir sind z Fuess an Hafe vo Cartagena und hend nu gwüsst das mir irgendwie ufs "Paraiso Secreto" Areal uf eini vo dene viele Inslene vo Rosario Islands müend. Mir hend kei Ahnig gha wie, eifach mol goh. Uf em Weg het mich den irgendeini mit eme Büechli ide Hand agsproche ob mir ufs Boot müeset, ich hanere den erklärt wo ane und sie het gmeint jo das passt, mitcho. Mir sind dere den nogloffe. Mir hend vor em Igang zahlt und den hends irgendwo eusi Näme itreit, es isch alles chli schnell gange. Sie het denn öppis gseit und isch devo. Mir sind i dem ihgrenzte Hafe gsi mit ca 200-300 anderne wo uf die Insle hend welle. Mir hend kei Ahnig gha mit wellem Boot, da ca 20 gwartet hend. Mir hend en kurze Moment scho s Gfühl gha das mir uf em Schwarzmarkt glandet sind und die mit eusere Kohle ab isch. Ja schlussendlich sind mir ane ghocket. Es paar sind mit ere Liste ume gloffe und hend chli Näme ufgrueffe. 

Die Bööter fahret jo nur zwüsched 9:00 & 10:00, aso hetz irgendwie müese klappe. Irgend ein Joggel het den mol Ernesto Paudnakka Y Muriel grueffe. Baumann chönds demfall nid usspreche, mir sind den tatsächlich dra cho und sind nach wenige Minute warte richtig Isla Grande unterwegs gsi mit eme Speedboat. Und das isch es Speedboat gsi. Richtig schnell sind mir über die Welle gfahre und zwüschetdure für en kurze Moment für paar Meter gfloge. Mir sind immer meh ufs offne Meer cho und s Wasser isch immer meh türkisfarbig und klarer worde. Mir hend den binere grosse Touristeinsle aghalte und hend die einte use loh. De Strand pumpevolle mit Liegestüehl und Lüt. Trotzdem traumhaft schöns Meer und me het wit abe gseh. 

Mir sind den witer gfahre und uf eusi chli Insle cho. Mir hend den ame chline Strand ahgleit und sind usgstige. Es isch e Hostelahlag mit 7 gliche "Eifamiliehüser". 

Mit gaaanz viel Wauzis
Mir zahlet do 20 Franke pro Nacht und hend en eigne Privatstrand. Es isch echt cool gsi. Ide Mitti hetz no en Pool gha mit Rutschbahn und e eigeti Bar wo me übertürets halbguets Esse becho het. 

Jo, d Hauptstadt vo dere Insle isch es Dorf mit ca 30 Blech/Beton Hüttene, die meiste ohni Strom. Dem entsprechend tür sind au d Lebensmittel gsi oder die einte wenige Restaurants wos gha het. Wen mir da gwüsst hetet, wäret mir no recht go poste vorher in Cartagena.

 Mir hend den halt glich ikauft und hend günstig aber guet kochet. Ah jo, natürlich hend mir viel z wenig Bargeld debi gha, mir hend irgendwie nid dra denkt zum no Geld use lah. En Geldautomat hetz natürlich keine gha.

Im Hostel acho het eus d Dayana in Empfang gno. E 24 jöhrigi, lustigi und fründlichi Dame us Medellin wo für 6 Mönet do schaffet. Mir hend sie gfroget wo mir den was poste chönd und sie het den gmeint "mmh isch scho biz spot, ich koch sus für eu, chönd mit mir esse"! Mir sind den uf die Mittag an erste Strand, ca. 45 Minute Fuessmarsch. Mir hend de Negro, euse schwarze Labrador vom Hostel mitgnoh. 

Wo mir mitte Weg a dem Dörfli acho sind, isch de Negro ufsmol wie e Rakete ab. Er isch 4 Saue no gseklet. 

Ich ha den lut gruefe "Neeeegroo nooo noo"! Jo, chli blöd das 80 % wo uf dere Insle schaffet zimlich schwarz sind und de eint oder ander het mich den au biz blöd agluegt. 

Die sind au doof dem Hund so en Name z geh. Ufallfäll hend mir den zum Strand gfunde und es isch en Traum gsi.

Und am Negro hets au sehr gfalle

Immer wieder sind chlini Böötli ane gfahre und hend frische Lobster debi gha. De hends den umetreit und hend en de Lüt verkauft für me oder weniger 10-20 Franke. 

Ich ha den au eine gno und 30 Minute spöter hani en guete Lobster mit Ris und Salot becho. Am Abig sind mir den retour und hend no de Sunneuntergang vom Steg us glueget mit de Dayana. 

Dennoch sind mir id Kuchi und hend agfange koche. Es isch denn echt guet worde und mir hend gseit das mir am nöchste Tag kochet.

Es isch zimlich lustig gsi.

Am nöchste Tag hend mir eigentlich namal s gliche Programm gmacht wills eifach schön gsi isch. Ich ha den Taucherbrille vo de Dayana mitgno und ha welle go schnorchle. Mmhh chum los gloffe bin ich mit de Flipflops inen Stei mit em grosse Zeche und de het denn gad biz blüetet. Nid gad guet wend naher is Salzwasser wetsch mit Sand ect. Leck het da weh due. Ich bin denn an Strand ghumplet und mir hend halt eifach chli gsünnelet. 

Am Abig hends es Openair Kino igrichtet und mir hend en Film underem Sternehimmel glueget mit de warme Karibiknachtbrise.

Am Tag druf hends mir den halt nomol probiert mit em schnorchle. Es het zwor bizeli weh due mit em dicke Zeche id Flosse aber ich ha den ufd Zäh bisse. Es isch ganz cool gsi jedoch hend mir nid gnueg wit use chöne will allpot Boot zimlich schnell dure gfahre sind. Und irgendwen hend mir nüme witer chöne weg de Strömig. Jo, in Brasilie dozmol hend mir die grössere Riff gseh, isch aber glich cool gsi.

 Vorallem vieeeel wärmer. S Wasser het sicher 23 Grad gha oder me. Mir sind denn gege de Mittag retour und hend was gesse.

Ab em 16:00 hend mir es Kayak reserviert gha. Es het ganz viel Lagune uf dere Insle. Und alles isch voll mit Mangrove, mit ganz viel Wurzle oder Äst wo ist Wasser raget. 

Mir hend die zwei Kayak richtig Steg treit und hends is Wasser gheit. 

De Typ vo de Vermietig het eus den erklärt wo das mir jewils d Lagune verloh müend und durch de dünn Verbindigs-"Tunnel" zu de nöchste Lagune findet. Chum los paddlet hend mir alles wieder vergesse. Mer isch zimlich schnell worde, wenn me im richtige Rythmus paddlet het. Mir sind den durch die erst Öffnig in Mangrove-Tunnel gfahre und es isch e super Stimmig gsi. 

Die letzte Sunnestrahle vom Tag hend dur die Bäum gschune. Gar nid eifach gsi im Teils sehr enge Kanal z paddle. Mir sind insgesamt durch 3 Lagune paddlet und am Schluss durch e Öffnig ufs offne Meer use. D Sunne isch scho tüfer am Horizont gsi. Mir sind richtig Meer uswärts paddlet und hend eus vo de Strömig triebe loh. S Wasser isch "Seich"warm gsi und me het bis an Grund abe gse. Ich ha den de Muriel ihres Kayak ghebet das mit zemme blibe sind und sie het für die recht Richtig gluegt, zu de Sunne. Mir hend en mega schöne Sunneuntergang erlebt und sind aschlüssend richtig Ufer zruck. 

Direkt vor em Hostel hend mir jo en Privatsteg gha, vo wo us mir denn d Kayak retour treit hend.

Am Abig sind mir den ufs Dorffest mit em gsamte Hostel. Ja, traditionell isch halt do de Hahnekampf. Das hends do au gha und es sind vo allne Insle rundume alli mit ihrene Hähn do ane cho zum kämpfe. Eus hetz halt überhaupt nid gfalle aber e Erfahrig ischs gsi. Wür jedoch nüme goh. Lustig isch aber gsi wie ernst die Iheimische das gno hend. Und wie sie abgange sind weret em Kampf, wie ame Spitze-Boxkampf wos um de WM Titel goht. Mir sind aber nach 2-3 h wieder retour und hend na chli gjasset.

Es isch den au scho de letzt Tag cho. Mir hend en hauptsächlich demit verbrocht zum d Insle chli z fotografiere. 

D Perla, en andere Hostelhund isch 4 h lang mit eus mitcho. Zwüsched dure isch sie de Saue nogseklet, irgendwo in Busch ie und sus devo. Mir hend sie zum Teil nüme gse wo sie id Mangrove gumpet und irgendwo devo gschwumme isch. 

Nach 10-15 Minute isch sie aber immer wieder a eus verbi grennt und het mega Freud gha das sie eus wieder gfunde het. Wo mir bim einte  Strand e Pause gmacht hend isch sie jedoch froh gsi.

 Geg de Mittag sind mir mit em Boot abgholt worde und sisch retour richtig Cartagena gange. Es het grausam Welle gha und mir sind eigentlich 3/4 vom Weg ide Luft gsi. Vollgas über die Welle kesslet, het de Captain wenig intressiert das es eus fast use gschellet het. Jo das wers gsi mit eusem Abentür uf de Isla Grande. De Rest findet ihr im Cartagena Blog.

Next Stopp: Santa Marta


Bis bald


Muriel y Ernesto

Antworten

Kolumbien
Reiseberichte Kolumbien
#islarosario#islagrande#kolumbien#colombia#südamerika#southamerica#travel#wanderlust