ninanesto
ninanesto
vakantio.de/ninanesto

Santa Marta

Veröffentlicht: 21.03.2018

Santa Marta

Santa Marta lit a de Karibikküste und rundume gitz einiges zum gseh und erlebe. Mir sind mit em Shuttle Bus zu eusem Hostel gfahre. A de Reception hend mir denn en Ordner mit ganz viel Aktivitäte gse. Unteranderem dass me s’Tauchbrevet für ganz wenig Geld chan mache. Mir hend das eigentlich überhaupt nid planet gha aber es wer grad e super Chance. Kolumbie isch eine vo de günstigste Plätz uf de Welt zum die Taucherlizens z’mache. D’Muriel het jedoch nid gad chöne jo sege, will sie mit 12i amene Schnupperkurs nid so e gueti Erfahrig gmacht het. Mir hend den eus beid chli informiert, bi Bekannte, im Internet und bi andere Reisende. Jo, mir hend den e Nacht drüber gschlofe. Am Tag druf sind mir direkt is Büro vo dere Tauchschuel gange und hend mit de Lüt det namal gredet. Es isch es mega cools Team gsi. Bsitzer sind es Ehepaar gsi vo Kolumbie. Mir hend sie den gfroget wie das isch, d’Muriel heg mol Panik gha wo sie jung gsi isch. Sie het den gmeint „Du chunsch ganz sicher kei Panik über, ich versprichs. Es sind scho so viel do gsi wo das Problem gha hend, keine vo dene het jedoch effektiv Panik gha“! Mir sind denn so verbliebe, dass wen d’Muriel de Kurs nid cha abschlüsse, denn muen sie nur soviel zahle wie sie au profitiert het vom Kurs. Mir hend eus den entschlosse das mir das Ahgebot ahnehmet. Mir hend also eusi Nächt im Hostel verlängeret und am nöchste Morge am 8:30 hend mir wieder im Büro müesse si für die erst Theorie. Mir hend müesse 3 h lang es seeeeeehr langwiligs Video übers Tauche uf Englisch luege. Aschlüssend hend mir e Prüefig gha, d’Informatione het me im Video mitbecho. Irgendwie chunt mir das bekannt vor, vo de Schuelzite. Egal, mit chli logisch überlegge hend mir eigentlich s’Meiste selber chöne usfülle. Mir hend wiedermol en super Koch im Hostel gha, wo me Prisgünstig het chöne esse. 

 Denoch hend mir denn namal bizeli Theorie gha und den sind mir mit em Auto zum Hus vo de Bsitzer gfahre. Eusi Instrukteurin isch e 32 jöhrigi Östricherin gsi. E mega cooli, dass hets eus gad namal biz eifacher gmacht, da mir uf Dütsch hend chöne kommuniziere.

 Bim Hus acho hends en Pool gha. Mir hend s’erstmol die Taucherusrüstig müesse für eus parat mache und aschlüssend alegge. Mir hend den ganz viel Üebige im Wasser müesse mache. U.a. vo de Erstluftversrogig ufd Notluftversorigig wechsle, wie me s’Wasser us em Mul usebringt, was passiert wenns eim d’Tauchebrille vom Kopf risst und so wiiter. Letsteres isch unteranderem für eus die schwierigscht Ufgob gsi. Me mues trotzdem dur s Mul schnufe, d’Nase isch jedoch im Wasser willd jo kei Taucherbrille me ahhäsch und den muesch ufpasse das nid dur d’Nase das Wasser ischnufsch. Bi mir ischs gad so knapp gange, d’Muriel het meh Müeh gha zum nid dur d’Nase ischnufe. Mir hends jedoch den gschafft. D’Brille komplett mit Wasser füllle unterwasser und den s’Wasser wieder usebringe isch au eher unagnehm gsi. Mir hend jedoch alles gschafft und hend den wieder zruck is Büro chöne. Dete acho hend mir natürlich nomol en Theorie Teil gha und namal e schriftlichi Prüefig. Am 19:00 hend mir entlich Firobig gha.

Am nächste Tag am 7:00 hend mir wieder müesse atrabe. Mir sind s’erstmol ufs Meer use gfahre. Uf em Weg zum Tauchplatz hend mir den euses Taucherequipment grichtet. Es isch no relativ frisch gsi. Mir sind in Tayrona Park gfahre zum go tauche. Mir hend innere Bucht aghalte. Es isch alles schneller gange als es eus recht gsi isch. Pluuumps bisch im Wasser gsi. Es isch zimlich kalt gsi und nervös sind mir au gsi. Wo sie eus den s’erstmol s Handzeiche geh het das mir abe gönd het s’Herz scho agfange schneller schloh. Mir hend alli Üebige vom erste Tag im Pool auno im Meer müesse absolviere. Eifach uf 6 Meter Tüüfi. Mir sind mit de Knü im Sand knünlet und hend die Üebige gmacht. Mit de verschiedene Handzeiche het sie eus gseit weli Üebig dra chunt. Mir hend die zum Glück alli mit Bravour bestande.

Normalerwis het me zwüschet 2 bis 3 Tauchgäng a je 35-50 Minute. Mir sind den noch em erste wieder ue und hend e chlini Pause gmacht. S’usstiege mit dene 20 Kilogramm uf em Rugge sind gar nid mol so eifach. Bim zweite Tauchgang gönd mir den anstatt die 6 Meter bis uf 12 Meter abe. Pluuumps sind mir schowieder dinne gsi. Mir sind scho einiges weniger nervös gsi. Mir sind direkt abe und hend de richtig Druckusglich güebt. Ich has mit schlucke gschafft, han immer beid Händ frei gha. Mir sind abe uf 12 Meter und hend die wunderschöne Koralleriff agluegt, die 1000 verschiedene Fisch, jede het e anderi Farb gha wie de vorherig. Moräne, Seeigel, Barracuda, Seetüfel, Meerjungfraue und vieles meh hend mir gse. 

Mir hend e Sicht vo ca. 20 Meter gha. Mir sind denn langsam uftaucht und hend de ersti Tag hinder eus brocht. Mit Vorfreud uf de nächsti Tag sind mir denn is Bett.

Am letzte Kurstag sind 18 Meter Tüüfi uf em Programm gstande. Mir sind richtig Bucht gfahre. Damol hend mir dörfe zu zwei Schiffs-Wrack go tauche. Mir sind wieder is Wasser und abtaucht. Schnell hesch die erste Umriss vo dem riesige Holzschiff gse. Es isch ide Mitti abenandbroche und mir hend chöne dure tauche. Ich ha amigs recht müesse ufpasse, d’Muriel isch meistens direkt ob mir gsi oder direkt vor mir und het mer d Flosse halbe um de Kopf gschlage. 3-4 mol heti fast die Üebig „Brille weg vom Kopf“ müesse wiederhole well sie mir die fast mit de Flosse weg gschlage het :-D D’Sicht isch leider schlechter gsi wie am Tag vorher. Aber sind glich ca. 15 Meter Sicht gsi. Mir hend den die 18 Meter erreicht und hend no e letzti Üebig müesse durefüere. E Taucherboie ufblose underwasser und den ad Oberflächi stiege loh. Mir sind den au wieder ue und hend Kueche gesse ide Pause. Denn sind mir scho für s’letztmol is Wasser. D’Muriel und ich hend eus no schnell gegesitig beschuldiget wer wem immer dri schwimmt und den sind mir abe. Mir sind eus denn nid eimol z’nöch cho ;-). Me hend scho e besseri Sicht gha, sicher 20-25 Meter. Ich ha natürlich au d’GoPro debi gha, was ich bim zweite Tag nid ha chöne mache, will ich det eifach no nid d’Zit dezue gha het mich au no mit dere Kamera umezschloh. Ich ha mich denn scho recht guet ufs filme chöne konzentriere und mir hend 43 Minute lang eifach nume gnosse und die atemberaubendi Unterwasserwelt bewunderet. 

Schlussendlich sind mir ue & hend alles bestande. 

Mir sind zruck is Büro und hend eusi Taucher-Lizenz becho. Jetzt dörfet mir uf de ganze Welt ellei bis uf 18 Meter go Tauche. Das chan me au ohni Brevet, denn kostets eifach ca 4 mol soviel willd halt en Guide bruchsch. Mir machet aber sehr wahrschindlich de Witerbildigskurs „Advanced“ wo me denn bis uf 30 Meter abe dörf, go Höhletauche, Nachttauche u.v.m. Jedoch nid do in Kolumbie. 


Mir hend den no en Tag relaxt im Hostel und am Abig sind mir chli in Usgang go astosse. Mir sind in eme super coole Virtel gsi.

Am nächste morge sind mir richtig Tayrona Nationalpark. Das chönd ihr im nöchste Blog lese.

Ah ja, eso trinket die Wasser do :


Next Stop : Tayrona Nationalpark

Bis bald

Muriel Y Ernesto

Antworten

Kolumbien
Reiseberichte Kolumbien
#diving#dive#tauchen