Guatapé

Veröffentlicht: 01.03.2018

Guatapé

Das wer jetzt de Blog zu eusem Zweitagesusflug. Guatapé isch 2 h mit em Auto vo Medellin entfernt. En Ferieort für Kolumbianer, es isch en riesige See wo sehr „verwinkelt“ isch. Mit em chline Rucksack sind mir dethi gfahre. Ganz e schöni Landschaft hend mir gse. Unteranderem au de "Piedra del Peñol" de grössti Stei vo de Welt.

Mir sind den dur das herzige & farbefrohe Städtli zu eusem Hostel gloffe.

D Stimmig isch sehr entspannt gsi.

Mir hend den am gliche Tag no en Bootsusflug gmacht. Mir sind losgfahre und hend verschidenschti Anwese am Seeufer bewunderet. Unteranderem e Villa vome Fuessballspieler vo Real Madrid, Arsenal und Barcelona (weiss d Näme nümme da mich Fuessball so gar nid intressiert) und es riese Anwese vom Escobar. Alles isch schön pflegt und den chunsch umd Kurve ume und den gsesch vo witem alti Palme wo verfulet, verwachseni Hügel und eh kaputti, vergammleti und teils explodierti Villa.

Mir sind den an Steg gfahre und hend das Grundstück betrette. 9 Hektar gross isch es gsi. Mit ere eigene Diskothek, en Rossstall für 16 Ross, es Gästehus mit 16 Schlofzimmer, es Familiehus mit 5 Schlofzimmer, es Clubhus mit Sauna, Whirlpool & türkisches Bad und eme grosse Pool. Mir sind den langsam de Weg zum Hus gloffe und mir hend erfahre was do alles passiert isch.

Ganz viel türi Bäum vo de ganze Welt hend mir uf em Weg gse. Au erfahre hend mir, dass de Escobar dazumals 4 Nilpferd vo Afrika importiert het, mittlerwile sinds über 40 und e regelrechti Plag fürs Ökosystem und d Awohner vo Kolumbie. Es isch es komischs Gfühl gsi uf eme Anwese zstoh wo s'Eigetum vo einem vo de gföhrlichste und mächstigste Mensche vo de Welt ghört het.

Unteranderem hend mir erfahre das sich do die mächtigste Drogehändler, die korruptischte Poltiker ect für e Party troffe hend. De Escobar het den d Musik gstoppet und het um ufmerksamkeit bittet. Er het en Arbeiter gno wo gfesslet gsi isch und gseit "de Ma het mir 10 Dollar Kokain klaut"! Er het ihm en Schupf geh und ihn erbarmigslos im Pool ertrinke loh, vor allne Andere. "Das isch e Lehr für eu alli, das passiert wen ihr mich verarschet"! Und das het er au gmacht. Über 680 Poliziste, 50 Regierigslüt und massewis Zivilpersone het er umbringe loh. Alles nur um sin Drogehandel chöne witerzfüere und sini Uswisig ins amerikanische Gfängnis z verhindere. Am einte Tag sind jedoch "Los Pepes" (Bekämpfigsgruppe vom Staat gege de Escobar) richtig Anwese gfloge und gfahre und hend en Agriff uf de Escobar gstartet. Er het das jedoch mitbecho dur en Spitzel und er het chöne dur de Fluchttunnel flüchte. 5 Minute spöter isch e Bombe i sim Hus explodiert. Mir sind au erstunt gsi was für e bluetigi Vergangeheit Kolumbie het.

Am nächste Tag sind mir relativ bezite richtig Piedra del Peñol losgloffe. Zerst hend mir halt gmacht ide Bäckerei. Mir hend für 3 Franke 4 Gipfeli becho. Mir sind use gloffe, ich ha dri bisse und es het e ganz grusigi Füllig gha. Mir hend den gfroget ob mir anderi chönd ha ohni Füllig. Sie het de Sack retour gno und het öbbe 10 chlini Brötli dri due und eus sogar no en Franke retour geh. Es isch e Wanderig meh oder weniger de Stross no gsi, vieli laufed do nid dure so wies verwachse gsi isch. Aber doch hetz einigi schöni Plätzli mit schöner Ussicht gha.

D Muriel het denn uf em Weg 2/3 vo dene Brötli verdruckt bis ihre schlecht gsi isch. Immer wenn ich hindere glueget ha isch sie am esse gsi :-D.

(Mengmol isch sie wie en Wauzi, esse bis eim schlecht isch) Ich ha aber den au na 2-3 becho. Es het no en zweite Weg gha, de wer jedoch 2-3 h gsi und mir hend vor allne Touristebüs wo am Morge vo Medellin chämet welle dete si. Mir sind acho und es het echt fast kei Lüt gha, d Wolke hend ufgrisse und mir hend perfekti Bedingige gha zum die 680 Stägetritt richtig Gipfel vom Stei z laufe.

D Muriel het sich dezue entschide de Rucksack dune bin Kiosk z loh, ich ha den s Wasser & d Snacks mitgschleppet (wie meistens) :-D. Vom Kiosk us ischs den schomol ca 200 Stägetritt ue gange (nid inbegriffe i dene 680 vom Stei) und den ischs no biz de Berg uf gange bis mir bim Igang gsi sind. Bim Igang hetz en Stämpfel in Pass geh. Jo, Ernesto het en debi gha und d Muriel het en im Rucksack dune gha. Das het ihre gar nid passt, dass ich en Stempfel gha ha und sie nid. (De Reto lachet jetzt sicher). Mir sind den losgloffe und hend immer wieder richtig See glueget und hend gstuhnet.

Mir sind den au bald mol dobe gsi, im Gegesatz zum Machu Picchu isch ja das nid mal e Ufwärmig gsi, dete sinds über 9000 Stegetritt gsi. Mir hend e hammer Ussicht gha und perfekts Wetter.

Bim Abeweg het d Muriel den lut denkt. "Wie chumi ezt a de Stempfel, namal abelaufe und wieder ue isch scho mega streng i dere Hitz. Hmm. Guet. Eventuell chöndsch jo duuuuuu"? Ich ha genau gwüsst das es so usechunt. Mir hend den abgmacht das mir bis id Hälfti abe laufet, sie den de Pass holt und ich den die Hälfti wieder uelaufe. Das hend mir den au gmacht, fair gsi.