ninanesto

Mir nemed eu do mit uf üsi ersti gross Reis - quer durch Südamerika

Medellin

Medellin

Wiedermol isch e kurverichi Fahrt vor eus gstande. Mir hend in Salento gad no de letzti Bus verwütscht und sind i die nöchst grösser Stadt gfahre zum en Bus noch Medellin z‘neh. Mir hend den 2 h müesse warte und eus die Zit mit Kartespiele vertriebe.

Es het echt viel Kurve gha, hend aber erstunlicherwis sehr guet gschlofe. Mir sind den im Hostel acho und mir sind beidi krank worde. Hueste und Schnupfe. D Muriel isch den bizeli go ligge und ich bin chli euses Vierteli go aluege. Die ehemalig gförlichsti Stadt vo Kolumbie isch jetzt eini vo de sicherste und schönste. Wieso sie mol so gföhrlich gsi isch? De Grund isch de mächtigst Kokain Drogehändler allerzite gsi, Pablo Escobar.

De gseht eigentlich gar nid gföhrlich us?

 De hends jedoch 1992 erschosse und de Terror het es Endi gno. Ich bin denn anere dütsche Dönerbude verbi gloffe und ich ha nid chöne wiederstoh. Noch 5 1/2 Mönet wiedermol öppis vo de "Heimat". 

Es isch es moderns Viertel gsi, ganz viel Bars und Clubs, Restaurants und sonstigsti Lädelis. Zudem sehr grüen. Ich ha den no es anders Bistro entdeckt. Ich bin zruck is Hostel und han d Muriel gweckt "ich ha e Überraschig für dich"! Mir sind zemme zu dem Bistro gloffe. Swiss Bakery heds gheisse und es isch en junge Bsitzer gsi wo vor 3 Jahr usgwanderet isch und jetzt e super Bäckerei bsitzt. 

D Muriel het den en frische Zopf bstellt und ich e chalti Ovomaltine, es isch wie im Traum gsi. 

Ihr chönd eu gar nid vorstelle wie guet das due het. Im Hostel hend mir spöter euse Retourflug id Schwiz buecht. Am 16. April flügemer vo Havanna nach Frankfurt und vo det us nach Zürich und landet am 17 April am 17:20 Uhr.

Am Tag druf sind mir am Namittag id "Comuna 13" Gegend. Uf em Weg hend mir no was wölle aluege. Mir sind vom Hostel bis ad Metrostatin gloffe & hend gse das es nur 1 Station isch. Ich has den schlau gfunde z laufe! Somit sind mir dur eis vo de "gförlichste" Geniet vo Medellin gloffe. Ja guet, ezt hettemer s Industriegebiet vo Medellin au gse! Nocher sind mir den id Comuna 13. Das isch mol de gföhrlichst Stadtteil oder Favela in Medellin gsi.

 Hüt ischs jedoch sehr sicher und d Lüt sind mega fründlich. Es isch e Free Walking Tour gsi und euse wibliche Guide isch ide Comuna ufgwachse und wohnt immer no det. Mir sind ume gloffe und sie het eus verzellt was dazumals alles passiert isch, was de Escobar agrichtet het, wie s Militär de ganzi Stadtteil agriffe het mit Helikopter und Spezialeinheite. De Grund isch wie gseit de ganz Drogehandel gsi und dem es Ändi zsetzte. Vorallem wo sie de Escobar umbrocht hend, hends d Chance welle nutze und sofort zuegriffe wenn das Cartel am schwächste isch. Hüt isch de Stadtteil am Hang sehr farbefroh mit ganz vielne schöne Wandkunstwerk und nette Restaurants. 

Ganz viel vo dene Wand Graffitis hets gha
Eis schöner als s ander
Und die bescht Ussicht über Medellin het mer zimlich sicher au vo det obe.
Zuesätzlich hetz ganz viel Strossekünstler gha wo chlini Shows gmacht hend.
Es lustigs Detail isch au gsi, dass sie mol es Hilfwerk/Projekt gha hend i de Comuna 13. sie hend den zum dir Awohner z unterstütze Rolltreppe installiert. Jetzt ischs nüme so streng wend z oberst ue willsch. 
Am Abig sind mir den mit Kollege is bekannti Usgangsviertel gange. 

Mir sind ine Bar ie wo en Pool gha het mit ganz viel farbige Bälleli, wie ihrs eventuell no vom McDonalds kennet. 

Nach 2-3 Bier ischs den langsam lüter worde. Vo de Regle "Kei Bälleli noch usse richtig Bar und Tisch Schüsse, kei anderi Lüt abschüsse und nid ie gumpe" het den au niemert meh öppis wele wüsse.

 Vo Minute zu Minute isch es me usgartet. Ide ganze Bar sind Bälleli ume gfloge und ein Barkeeper isch vo Gast zu Gast grennt und het gseit wenn sie nid ufhöret denn flüget sie use. Drufabe het er meistens en Ball an Kopf becho. Alli andere wo det gschaffet hend, hends jedoch mit Humor gno und meistens glachet. Die wo neu d Stäge abe cho sind richtig Bar sind meistens mit eme Bällelihagel begrüesst worde. D Muriel isch eigentlich gege alli gsi, jede wo sie gseh het isch nid sicher gsi vor ihre dementsprechend het sie au viel Gegner gha. Es isch sauglatt gsi und e mega gueti Stimmig (bis uf de eint Barkeeper, de hätz agschisse). Die nächste 2-3 Täg hend mir jedoch grausam Muskelkater gha im Arm vom schüsse.

DMuriel het zuesätzlich sit langem Zahweh gha. Ihre isch en Teil vom hintere Zah abbroche und mir hend s beschte gfunde wenn sie das in Medellin erlediget. Sie isch den am 3e Tag au serstmol zum Zahnarzt. Es super Team het sie den schlussendlich noch vielem Emailverkehr ufgno und het sie behandlet, notfallmässig. Am Tag druf hend mir den en Zweitagesusflug gmacht uf Guatapé, das chönd ihr jedoch im nöchste Blog lese. Wo mir wieder retour gsi sind vo Guatapé het d Muriel namal 2 Termin gha und mir hend namal im Hostel verlängeret. Mir hend jedoch nid viel gmacht i dene zwei Täg. Selber fein kochet, en halbe Tag lang en Geldautomat gsuecht wo funktioniert het und Sache planet für die nöchste paar Täg. Zusätzlich han ich natürlich für de z Morge en frische Zopf gholt.

Mir sind den mit em Nachtbus richtig Cartagena, das liegt a de Karibikküste im Norde vo Kolumbie. Mir hend jedoch zimlich Glück gha uf em Weg dethi, wieso? Erfahred ihr im übernöchste Blog (Cartagena)

Next Stop: Cartagena, Karibik

Bis bald

Ernesto y Muriel

#schweiz#switzerland#komimbien#colombia#southamerica#südamerika#freewalkingtour#graffiti#backpacking#travel

Kommentare

Dinge, die du vor Ort erleben kannst: