#3 - Pablo Escobar

Wer noch Medellín chunt, oder scho nur bim Reiseziel Kolumbie, chunt bim Name Pablo Escobar nöd vebii. De mächtigst Drogeboss aller Ziite het do sis Kartell ufbaue, Gschäft abgwicklet, gmordet aber au de Arme gholfe. Mir gönd uf Gschicht vo em nöd gross ii, weils über da gnueg im Web zum noolese git. Hüt hemmer die wichtigste Ort im Zämähang mit em bsuecht und viel spannendi Iidrück chöne sammle. 

Klar chammer sich Gedanke drüber mache und werte, obs guet oder schlecht isch Geld für da usgeh. Er het unheimlich viel Leid dur sini Macht brocht und uf de andere Siite de Arme gholfe. So ischs au für die Iiheimische: de Robin Hood oder de Massemörder. Ob da nur Fassade und Mittel zum Zweck für de Kongress gsi isch, chönti wohl nur er selber beanworte. Mir hend de Iidruck, dass do glich meh dehinter isch und gebet also „Geld für da us“. Wa aber usser Frog stoht isch, dasses en hoch intelligente und talentierte Maa gsi isch.

Mir bsuechet s Gebäude Monaco, wo er mit de ganze Familie drin gwohnt het, es isch aber im Innere komplett zerstört dur e Autobombe wo vom Cali-Kartell zündet worde isch. Vo usse gseht me da nöd, sondern es isch noch so viel Johr vewahrlost und nur en Sicherheitsmaa stoht de ganz Tag döt, damit Touriste sicher sind.

Mir fahred ine sehr gföhrlichs Viertel, wo de Pablo e eigni Nochberschafft het. Er het zwor nie döt gwohnt, doch het bim Bau vo Hüser finanziell unterstützt, Schuele baue und de Arme gholfe. Er wird au hüt no als Held gfiiret, erklärt üs de Juan. Er isch wieder üsen Fahrer, seit au, dass mir do nöd chönd usstiege zum Fotene mache. Drum nu schnell usem Auto use.

Ufem Friedhof Montesacre isch em sis Grab. Mit allne Familiemitglieder, wo bereits vestorbe sind, ischer do biigsetzt. Bim Vater und de Mueter hets e Zitat ufem Grabstei. Da bi em fählt, es isch schiinbar gstohle worde. Isch da Ironie, wenner genau mir Grabsteichlaue sis erste Geld vedient het? Sus isches en sehr wiitläufige Friedhof, wos au kei System git. Es cha selber gwählt werde, wo öper begrabe söll werde, drum sind Grabstei wiitläufig vestreut.

Mir chömed au zum Huus wo er offiziell erschosse worde isch. Die inoffiziell Variante und die vo de Familie isch, dass er sich selber in Kopf gschosse het, wie er da au immer gseit het. Lieber e Grab in Kolumbie statt e Gfängnis ide USA. Die Variante loht de Stolz vode Behörde und de Polizei nöd zue.

Noch enere ewig langi Fahrt dur de vielfältig bewachse Wald chömed mir bim „Gfängnis“ vom Pablo a, wo ez als Altersresidenz gnutzt wird. Gfängnis isch würkli s falsch Wort, weil er da noch eme Deal mitem Staat noch sine Wünsch baue loh het. Mit Fitnesscenter, Disco und Billardrühm Isch s Awese usgstattet gsi. Er selber isch mitem Heli ufem Helilandeplatz glandet mitere herrliche Ussicht, wonnet wiiterhin de Flugruhm het chöne beobachte. Do ischer denn bis zu sinere „Flucht“ blibe.

SHighlight vode ganze Tour isch für üs de Bsuech vom Escobar-Museum. Es isch s Huus, wo er die letscht Ziit vor sim Tod vebrocht het.  De Brüeder Roberto, mit dem er sKartell gführt het und wo für sFinanzielle zueständig gsi isch, sitzt vorne dra und trinkt en Kafi. Unschiinbar mit Chäppli und Stoffhose, fast blind und taub dur e Briefbombe im Gfängnis. Mir chömed e privati Füehrig vom Caleb uf Englisch über. Er isch selber im Gfängnis in Miami gsi wege Drogehandel. Er vezellt üs als erschts vom Zoo, wo de Pablo für alli Lüt errichte loh het, weil er die Tier allne Lüt het wölle zuegänglich mache, wo nöd dMöglichkeit hend, die zgseh. Drunter sind zwei schwarzi Papageiearte für 2 Millione Dollar. Mir gsehnd Jetskis, wo er vom James Bond-Film kauft het, Autos mit Iischüsslöcher und einiges meh. Me dörf alles alange, es isch zum Bruuche. Ime Zimmer gsehnd mir denn en Maa wo üs vorgstellt wird, weil mir vode Schwiiz sind. Es isch de Nicolas, em Pablo sin Neffe. Mir redet sicher 10 Min mit em und üs wird klar, wie viel er vode Schwiiz kennt. Er isch viel döt, am liebste Zermatt und St. Moritz. Sus ischer weltwiit unterwegs und zeigt Fotene ufem Handy. En sympathische Maa mitere spezielle Art a sich. Chönds nöd richtig griife, wa dasses isch. Mir sind überzoge, dass do viel dehinter steckt und da beiidruckt (e längeri Usfüehrig lieber mündlich). Mir riisset üs denn glich vom Gspröch los und werdet dur s Huus gführt. Vebii a Schusslöcher, a Gheimvesteck und am Tisch, wonner als letschts gesse het. Zum Schlüss chömmer em Roberto und sinere Tochter froge stelle. Mir sind vo dem chli überrumplet und drum sind üs im Nochhinein spannenderi Sache iigfalle. So viel hends üs aber unter anderem gseit, sie lebet e sehr guets Lebe mit Hüser do und a de Karibikküste.

Klar ischs e Touristeattraktion und glich für üs e speziells Erlebnis.

De Roberto wünscht üs miteme warme Händedruck alles Gueti...

...und so hemmer miteme Kartellboss d Hand gschüttlet.