#4 - Adiós Medellín

Noch vier Täg, viel spannende Iidrück, super Bekanntschafte, überwältigt vo dere riese Stadt, und langsam au chli gnueg Wetterwechsel ziehts üs wiiter in wärmere Teil vo Kolumbie.

Üsi letschte Stunde vebringet mir aber nomol demit, en neue Teil vo de Stadt zgseh. Mir gönd also uf de Plaza Botero, wo bekannt isch für sini Figure vom Künstler Fernando Botero. DFigure hend übertriebni Proportione und überall lönd sich dLüt devor fotografiere. Ei Skulptur devo isch ganz bsunders, weil sie en Attentäter id Luft gspreng het und so leider viel Lüt ums Lebe cho sind. De Künstler het sie aber stoh loh und denebet e Neui zum Zeiche vode Genesig erschaffe. Schnell wird üs aber klar do, dass dLüt i dem Stadtteil ärmer sind als in El Poblado. Wommer de Platz velönd und a de veschiedene Marktständ vebiilaufet sind alli sehr ufdringlich und unterschiedlichi Lüt schlofet ihren Rusch oder anderi ignoni Stoff us. I merk do au immer stärker, dass churzi Hose nöd optimal sind zum alegge i dere Grossstadt. Obwohl Temperature defür sprechet, fühli mi sehr unwohl und viel Männer wirket sehr respektlos mit ihrem Glotze und de Sprüch. Und da obwohl de Dani immer denebet isch. Sicherheit vemittlet aber die viele Sicherheitslüt uf dem Platz und glich gömmer bald zrug i „üses Viertel“. 

Noch eme frischpresste Saft us Maracuya, Passionsfrucht und Orange simmer zrugg ide Unterkunft und lernet üsem Host, em Pablo (jo er heisst würkli so), nochli Dütsch. Er wött umbedingt mit de Gäst besser chöne rede und mir sind beiidruckt, wa füre Uffasigsgob dasser het... mir sölled doch umbedingt nomol zrugg cho und mit em weggo. Er het üs wohl doch chli is Herz gschlosse - und mir en au.

Pünktlich fangts wieder a regne und mir fahred zum Flughafe. Genau de richtig Moment zum uf Cartagena wiiterreise. Bim Abflug gsehmer, dass üsi Zieldestination zur Ankunft wird 26 Grad ha. Entgege viel Erfahrigsbricht isch üsen Flug pünktlich und agnehm, au wenn de Flughafe nöd dur Übersichtlichkeit glänz. Isch aber au nöd wiiter schlimm.

Cartagena isch wie erwartet schö warm und üses neu Dehei modern und direkt am Strand. Mir sind froh, dass mir do glich schomol die erste Sache chönd wäsche...