#16 - Escadaria Selarón

Mir sind zrugg in Rio. Aso in Rio simmer immer gsi, nu halt wieder döt, wo die meiste Lüt Rio vor Auge hend. Damol hemmer üs entschiede zum nöd noch Barra zrugg zgo, sondern ad Copacabana, damit mir denn au schochli nöcher am Flughafe sind und au nöcher a zahlriche Sehenswürdigkeite. Mir hend e super Hotel ide Nöchi vom Strand gfunde, wommer vode Terrasse und em Zimmer e bitzli Meer uf de einte Siite und nur chli wiiter ene de Blick uf dFavelas hend. 

Am Obet gnüssemers zum am kilometerlange Strand entlang schlendere, entweder im Sand oder ufem berüehmte Pflaster. DStrandvekäufer sind hei und alli Liegestüegl und Schirm werdet iipackt und wegbrocht. De Strand isch aber volle vo Lüt wo Cocktails oder e Kokosnuss trinked, Glace esset, aber vorallem hets uu viel wo am jogge sind oder e Gruppetraining machet. De Strand isch au im dunkle no genau so belebt.

De Morge startet wieder bewölkt und wird au de ganz Tag so bliibe. Macht aber nüt, isch schön warm und e chli Rege isch au nöd schlimm. 

Üses erste Ziel a dem Morge isch die berüehmt Stege vom Jorge Selarón „Escadaria Selarón“. Sie liit zwüschet em Künstlerviertel Lapa und Santa Teresa und het öpe 250 Stegetritt. Scho bide Anefahrt merkt me, dass es würkli chli e anders Viertel isch. Wunderschöni Hüser und unglaublich schöni und unterschiedlichi Graffitis gsehmer de Strosse entlang. Mir nehmed de Ufstieg in Agriff und die Arbeit isch würkli überwältigend mit de tuusige vo Kachle (bitte Gschicht dezue selber nooluege ;-) ). Mir findet aber sogar dKachle vode Schwiiz und wiitere spezielle Stück vo überall us de Welt. Obe aacho mömer denn aber scho churz veschnuufe und chönd eme Gitarrespieler zuelose. Bis ganz ufe gönd schiinbar nöd so viel und so chömmer guet Föteli mache mit nöd viel Lüt druf.

Wieder une aacho laufemer denn usem Viertel und chömed spontan am Theater vebii, gönd denn wiiter Richtig Meer und findet au no s Museum vode moderne Kunst. Und alles zFuess uf de normale Strosse. Mir hend üs zu keim Ziitpunkt unwohl gfühlt und Polizeipräsenz isch würkli gross, egal wo.

Es isch en u schwüele Tag und drum gömmer denn noch dene schöne Iidrück is Hotel und nochli uf Terrasse. As Meer mömer hüt nüme.