escapaar
escapaar
vakantio.de/escapaar

#14 - Armação dos Búzios

Veröffentlicht: 11.03.2018

Üsi Reis führt üs wiiter noch Búzios!

Bis döt hii het alles enard immer bestens klappt. Leider isch de Plan miteme Mietauto nöd ganz ufgange und mir hend üs - jo würkli - en Uber-Fahrer möse neh für die ca. 3-stündig Autofahrt. Es het sogar au tatsächlich zude kostegünstigere Variante ghört. DFahrt het sich sehr hiizoge und glich hemmer e wunderschöni Landschaft chöne bestuhne. E Wiili ischs fascht chli wie durs Toggeburg gsi und mir hend dChüeh gseh, wo die echt fein Milch herchunt. Wie bi üs de schlofend Ritter gits do en liegende Indianer. Mir fahred also 3 Stund und sind glich immer no in Rio, au Bùzios ghört dezue, scho fascht nöd zum vorstelle, wemmer noch dere Ziit bi üs scho fascht zItalie isch.

Und denn Bùzios! Fascht wie zrugg uf San Andres im erste Moment. DHüser reihet sich am Strosserand vestreut ii, viel Lüt uf de Stross, chlini Essensständ und glich ganz viel gfühlti Rueh. Wommer bide Unterkunft aachömed lueged dLüt scho komisch, wo mir mit Pullis und Schal usstieged (isch bide Taxis und Uber in Rio echt nötig). Die chömmer denn zum Glück bald ablegge. Üses Zimmer isch sehr eifach, eher e Hostel, aber da langet au für üsi Ziit do.

Mir gönd denn rasch los, üsi neu Nochberschaft go kennelerne. DStrosse bestönd nur us grosse, unebne Pflasterstei, viel Grüe isch umenand. Mir laufet wiiter Richtig Meer und sind überwältigt vo dem schöne Ort. Unzähligi Fischerböötli sind ide Nöchi vom Haferand und eis Lokal reiht sich am andere. Überhaupt nöd überlade, weil sich jedes öpis eiges überleit und sich wunderschö is Gsamtbild iigliederet. Wiiter vorne hets denn viel meh Touriste und denn au viel meh Lädeli. Klar, do isch de Tourismus voll im Gang, aber irgendwie glich eifach sympathisch. Mir nehmed drum bime chline Resti platz und esset sehr fein, gueti Wahl also.

Am nögschte Tag mietemer en Buggy zum alles chli go aluege. D Fahrt demit isch echt e Useforderig, und de Dani meisterers super. Als erschts findemer zuefällig de bekanntischt Strand „Geribà“, mir sind no recht früeh und chönd de Strand mit wenig Lüüt gnüsse. Noch eme luschtige Wellebad trochnemer üs und fahred wiiter. De Plan wär e Resti aber plötzlich stömmer vorem nögschte Strand „Ferradurinha“. 10 Real fürs Parke mömer zahle, wenns üs nöd gfallt, chömmemers wieder über. Es gfallt üs scho, aber sehr überlaufe und drum kehremer. Üsen Parkwärter probiert sich fascht chli vestecke, aber do simmer schneller gsi. 10 Real zrugg und wiiter gohts. Mir fahred ufen Ussichtspunkt wo atemberaubend isch: Natur puur, Gräser, Kakteeä, veschiedeni Buchte und Felse. Überwältigt vo dem Usblick passiert üs denn voll de Fähler. Mit üs dobe isch nur nomol en andere Buggy und so stieged mir us und machet üsi Fotene. Nochdem mir die Moment iigfange hend gömmer zrugg zum Buggy wo ez leer isch. Sprich ohni üsi Säck. 1000 mol vorsichtig gsi in Kolumbie und Rio ischs de eint chli Augeblick gsi. Klar, selber tschuld, und anschienend glich nöd so normal do uf dem entspannte Fleckli Erde... viellicht jo aber au gnau drum. Noch öpe 20 x absueche fahremer Richtig Hotel zrugg. Zuefälligerwiis chömed mir amene Polizeiposte vebii, wo mir die nögschte 2.5 Stund vebringet. Mit Händ und Füess, chli portugiesisch, chli spanisch und chli Google hemmer denn sDokument ide Händ. Netterwiis lütet de Polizischt denn au üsem Host a wegem Hotelschlüssel.

Mir hend viel Glück im Unglück gha und glücklicherwiis au nöd allzu viel Wichtigs debii und nur beklaut worde und nöd überfalle. 

Hoffentli gsehmer morn nochli meh vo dem Ort, aber als erschts zahlemer morn e chlises Vemöge für de velore Fahrzüguswiis, wommer natürli im Sack gha hend, umen sicher nöd zvelüüre.

Antworten (2)

Tina
spannend was ihr alles gsehnd+erläbed💕 hebed eu (+eune sache) sorg😉

Erika
Jo vil erlebt und wie scho gseit Glück im Unglück gha. Eu gohts guet und de Schade haltet sich in Grenze. Gnüssed eui Täg trotzdem witerhin mit de nötige Vorsicht 😉

Brasilien
Reiseberichte Brasilien