#17 - Bye Rio

Üsi Ziit in Rio isch ez leider au scho vebii. Mir mönd Abschied neh vom Strand, de Wärmi und de vielne Möglichkeite. Bevor mir aber ganz weg sind, lömmer no paar Ereignis vode letschte Täg revue passiere. 

Rio het en wunderschöne und riiiiesige Botanische Garte, wo mir aber nur en munzigchliine Teil gseh hend. De Teil heisst Parque Lage und liit unterhalb vom Corcovado, de Jesusstatue. Nöcher wie döt simmer also nüme anecho. Im Park hets e Atrium, wo bim Bsuech gad füre Fest dekoriert worde isch und de Blick zur Statue freigit. Bim Schlendere dur de Park chunt me a unzählige Pflanze und Bäum vebii, sogar e Aquarium, e Grotte und e Höhli mit Stalaktite hets. Du chunt sGfügl vom Dschungel schochli meh uf und die tropisch Luft wo recht druckt. Im ganze botanische Garte oder au im Nationalpark Tijuca chönt me stundelang wandere und entdecke. En Bsuech lohnt sich uf jede Fall do.

De letscht Tag in Rio hend mir zwei unterschiedlich vebrocht. De Dani het nomol chli dSeel baumle loh und paar Sprüng id Welle gno. Leider hetten öper probiert zum usraube, het aber glücklicherwiis nöd klappt und isch em au netterwiis no öper go unterstütze cho. De Dani het dSache eifach super vestaut und isch denn au sehr hilfriich gsi.

I wiederum bi 3 Stund mitem Bus uf Resende gfahre und ha nomol chli chöne dLandschaft ufsuuge. Em Fluss entlang, dur de Wald und a Wiese vebii. Aacho ade Busstation hani en Uber gno und bi 15 min wiitergfahre zu mim lang ersehnte Traum. I chum am Flugplatz vo Resende a, wo de Hangar gfüllt isch mit Gleitschirm und Pilote. De Tag isch cho, woni endli cha go Skydive, usem Flugzüg gumpe. Bises sowiit isch gebet sich dLüt u Müeh zum Englisch rede und mit eim wos würkli guet cha, tuuschi mi natürli gad us und frogen bi dere Glegeheit us. Leider mueni lang uf de Flug warte wegem Wetter vom Morge und denn isches aber sowiit. Da möchi aber lieber nöd beschriebe, sondern spöter devoo vezelle :).