#15 - Letschte Tag Búzios

Búzios isch würkli wunderschö und mir empfehleds definitiv zum en Bsuech abstatte, wenn dReis do ide Nöchi durefüehrt. D Statue vode Brigitte Bardot hemmer mehrmols bim vebiigo agluegt, aber nie gfötelet weg de anderne Lüüt wo denebet gsesse sind. S Fischerdorf Búzios isch Dank ere bekannt worde und für Touriste beliebt. Mir hend do leider eifach chli viel Pech, nu s Schicksal het sicher en Grund do defür... 

Nochdem üs da gescht mitem Diebstahl passiert isch, simmer am Morge wieder topmotiviert losgstartet zum meh vode Insle zgseh. Tüechli unter de Arm und alles andere ime Plastiksack, mir hend jo kei Handgepäck meh. Üsen Buggy tuet sin Dienst, obwohl er au hüt wieder chli spuckt, und so fahremer los uf die ander Siite vo dere Halbinsle. Üsen erste Stopp söll en wiitere Strand sii, de „Tartaruga“. Mir findet en sogar direkt und fahred e ziemli langs Strossestuck bis zum Strand, wo üs öper denn gad en Platz zuewiist. Wie de Wetterbricht scho gseit het, isches u bewölkt und vo wiit her gsehmer dunkli Wolke ufcho. Weils unglaublich schwüel isch gumpemer glich e wiili is absolut ruhige Meer. Chunt eim vor wie ame See, au Chliichind chammer do guet spiele loh. Mir entscheidet glich, zum üs nuno chli tröchne zloh und denn de nögscht Stopp finde. Gad bim losfahre het dWolke ihri Richtig glich no gänderet und dicki Tropfe gheiet abe. Mir fahred im Rege los und haltet denn doch bald a, zum wenigstens sDach wieder anemache. So sött dWiiterfahrt kei Problem sii - üses Züg hemmer nämli au wasserdicht im Plastiksack debii. Sött... wenn de Buggy no wör aspringe - weder mehrmols starte no aaschiebe bringt öpis. Wieso scho wieder?! Zerschtmol uf de Randstei sitze, öpis trinke, eini rauche und überlegge, wie wiiter. De Dani blibt also bim Buggy und i halt e Taxi zu de Vemietigsbude a. Döt wieder mit Händ und Füess erklärt wa los isch und dassi em de Fahrzüguswies nöd cha geh, weil de jo sit gescht weg isch. Zum Glück isch üsi Autonummere nöd schwer gsi, und die het denn au dLösig brocht. Zdritte fahremer  schlussendli los zum wartende Dani und em quasi schrottriife Buggy. Au sie schaffets mit müeh und Not zumen zum laufe bringe und de eint nimt üs mitem Auto mit zrugg. Mir chönd en neue Buggy ha, meint er. Mir lehnet ab, hend würkli dNase voll, au wenn de Tank voll isch vo üs. S Guete ade ganze Sach isch, dass de Typ vo hüt üs rund en Drittel weniger verrechnet für de velore Uswiis, und de Vetrag vo üs nöd richtig aluegt. Zum Glück also für üs...

Um die 2 schaffemers denn endli - zFuess, dWolke sind wiiterzoge - zum Zmittag, wommer üs mol chli Rueh gönned und so plätscheret au de Rest vom Tag no hii. Wortwörtlich, weil ufem Rückweg is Hotel vorem zNacht simmer so nass worde wie unter de Duschi. Mir hend gfunde, nass isch nass, ob vom Meer oder vom Himmel.

Entgege üsem Plan vor Rio (Strand) no uf Gabo Frio zgo striichemer ez und gönd direkt zrugg, weil i lieber nochli meh vo Rio wött gseh als nomeh Strand und de Dani au kei Überraschige me brucht ;-).