Von La Serena nach Caldera – Antofagasta & San Pedro

Von La Serena nach Caldera – Antofagasta & San Pedro

Ezt gitz en chline Blog Itrag wie mir vo La Serena nach San Pedro de Atacama greist sind, es het nid mega viel z Erlebe geh a de Zwüschestopps, darum 1 Itrag für meheri Ort.

La Serena nach Caldera

Mir hend üs wie gseit uf de Weg nach Caldera gmacht. De Bilder zufolge gsehts würkli mega us. Mit Vorfreud sind mir loszoge. Vonere Tankstell us a de Panamericana hend mir euses Schild „Norte“ wieder useghebet. Nach ca. 20 Minute het en mega schöne Lastwage aghalte. Mir hend freud gha und hend eus richtig Lastwage gmacht. Nur blöd gsi das 50 Meter hinder eus es Päärli mit eme Baby au gwartet het, die hend en eus eifach klaut. Naja chunt bestimmt no en Andere.. Nach 1 h isch den en Lastwage ane gfahre, isch usgstige well er öbbis het welle go esse, aso de Fahrer nid de Lastwage. Mir hend en sehr motiviert gfroget „Norteee, si si“? den het er glachet und het gfroget wo mir den ane wönd. Mir hend em den verzellt eifach in Norde. Er het den gmeint er isst schnell öpis aber mir chönet mitfahre.

 Carlos het er gheisse, 38 Johr jung und het 2 Kind gha. Er het nur Spanisch chöne, und das isch richtig guet gsi.

 Mir hend den 6 h lang gredet und langsam aber sicher sind mir uf em richtige Weg in Sache Spanisch Kenntnis. Wo mir den gfroget hend ob Caldera guet seg het er gmeint „jojo“. Z’Mizt die Wüesti het den de Blinker gstellt und er isch den 20 Min lang go Dusche. 

Nach guete 6 h sind mir den am Schild Caldera verbi gfahre. Er het eus am liebschte nochli phalte. Er het eus ahbote bis ue uf Peru mitfahre, im Lastwage pfuuse ect. En ganz tolle Kerli de Carlos. Er het eus uf i de Usfahrt useloh und mir hend eus uf de Weg gmacht richtig Stadt. D Muriel hetz den bizeli agurkt de Koffer dur de Sand zieh, han ich kurzerhand en Ahänger drus bastelt.

Naja, ersti Idruck, chlini Blächhüttli, relativ Flach & gseht überhaupt nid nach eme schöne Ort us. Mir hend eus den richtig „City“ gmacht. Die erste Hostels wo mir aglueget hend, hend usgseh wie Ställ für Chüe und Rössli. Mir hend schnell gmerkt das mir eus nach de Hotels orientiere müend. Serste wo mir den aglueget hend, het den 70 CHF kostet, sprich 35 CHF pro Person. Aber es isch defür würkli schön gsi, hend mir eus halt dezue entschiede bizeli z investiere.

 Nach em bezieh vom Zimmer sind mir den ufd Suechi nacheme Restaurant gange. Es isch so zimli tod, da Städtli. Villicht wells kei Saison isch, mir wüsseds nid. Ufallfäll hetet mir mit em Carlos guet chöne witer fahre, aber i dere Situation chan me halt au nüt dra ändere. Es isch wie isch. Nöd schwer isch eus d Entscheidig gfalle zum am nöchste Tag witer zgo.

Caldera nach Antofagasta

Es Taxi, mol ich glaub es isch es Taxi gsi, het eus den a die Tankstell brocht. Es het aber scho eh Frau mit 2 Kind dine gha. Aso sind mir den 6 Lüt gsi ime ganz chline Auto. Aber d Fahrt isch nur ca 10 min gange. A de Tankstell acho hetz den 4 verruckti Hünd gha, so isch d Wartezit nid so langwilig gsi. Es sind viel Lastwäge dure bretteret wells bergab gange isch und somit hends au nid ufd Brems druckt. Eine het den aghalte, d Muriel isch go froge ob er in Norde fahrt. Den het er biz misstrauisch gseit „Jo, wieso“? Mir hend ihm denn verzellt vo eusere Reis. Er het gfroget wo mir den jetzt ane wönd. Mir hend biz gschmunzlet und hend gseit das wüssemer nid, irgendwo in Norde. Er hets den zimlich lustig gfunde. Er het eus biz usgfroget übers Alter und wo mir her chömet. Wo mir gseit hend mir seged Schwizer het er gseit „Ahhh Suica, buenoo bueno…“ Er het an Bode glueget und nach ca. 5 Sekunde het er gseit „Also guet, ich gang aber schnell was z Esse go hole“. Er isch zruck cho und het eus gseit, also Koffer hine druf gheie, ufd Lädeflächi. Die isch aber offe gsi. Ich hans den irgendwie ih dem halb lose Zügs wo er hine druf gha het probiert z verkeile so guet wies gange isch. Zuesätzlich no eh Schlaufe um de Koffer gmacht.

 Jo, mir sind igstige und d Fahrt isch witer gange. Es isch en zimlich Lustige Chaib gsi, de Miguel. 

Er het immer gseit mir sölled ihm e Frau bringe vo de Schwiz, er wöll eini mit wenig Temprament. Den han ich churz überleit, ha glached und ha denkt „okey, ich kenn aber au gwüssi Schwizer Fraue mit sehr viel Temprament“. Ich nenn jetzt do kei Näme. D Fahrt nach Antofagasta wür rein theoretisch ca. 6 h ga. Und 1. goldigi Regle isch, immer vor de Dunkelheit am Zielort acho, well mer no e Unterkunft mues sueche, mit em ganze Gepäck eher weniger lustig. Nach ca 1 ½ h hend mir den s erstmol aghalte. Er het Wasser kauft und ich han den au na 2-3 Sache postet. Lustigerwis isch das genau ih dem Dörfli gsi wo mir eigentlich namal en Stop hend welle ihlegge. Zum guete Glück nid, so wies usgseh het. Nach ca 20-30min umetrödle sind mir den witer gfahre. Aber es het de Idruck gmacht, als obs er nid sooo mega pressant het. Nach 45 Min het er z mizt die Wüesti aghalte ame komische chline Hüsli. Er het den gseit er mües do öbbis mache. Hinderem Hus het er den us eme Haag e Tankstutze usegno und er het den tanket. Keine weiss ob das so mega legal gsi isch.

 Er het den insgesamt 45 Min lang gschnorret dete. Entlich isch er zruck in Lastwage cho und er het gseit es goht witer. Nach 5 min meint er das er hunger het. Mir hend wieder aghalte. Mir sind ines chlises Restaunt ie, die Iheimische hend eus biz bös agluegt, hend villicht nonig soviel Schwizer Gringos i ihrem Lebe gse.

 Mir hend den det gesse, Fleischbälleli mit Ris und Paprikasauce. Zimlich guet gsi. Ich bi ca 5 mol use go luege ob euses Gepäck no uf em Lastwage isch. Alles guet gsi. Nach 1 h sind mir den witer gfahre. Immerhin 30 min sind mir gfahre bis er gmerkt het er sött schnell es Pfüsli mache. Heilige Bimbam, 20 min het er döset. Irgendwen han ich den mal biz fest am Lastwage grüttlet und er isch verwachet. Am abig am 20:00 sind mir den ame Dörfli ca 20 min Weg vo Antofagasta acho. Vo det us het mer na 20 min Weg gha bis id Stadt. Er het aber na es Päckli gha wo öbber het müese hole, also hend mir au scho e Mitfahrtglegeheit gha. Es jungs Päärli mit eme Pickup. Die erst Froge au wieder, vo wo das mir sind. Aber als Schwizer hesch keis Problem. Anschinend hetz viel Lüt vo Kolumbie wo Hitchhiked und den d Lüt usraubet. Sie hend eus gad bis vor Hotel anegfahre wo sie für eus usgsuecht hend. Mir sind den aschlüssend 4 Täg ich dere Stadt gsi. 

Mir hend jedoch nach em erste Tag ines Appartement gwechslet. Somit hend mir mal wieder all eusi Kleider chöne wäsche, i de Wöschmaschine wo ca. 1 Meter ab Bode gumpet isch. Ich ha Todesangst gha, aber d Muriel het mi beruhigt, das segi nid so schlimm. Nach 4 Täg sind mir witer, wieder mit eme Uber sind mir a da 20 min entfernti La Negra gfahre, die einzig Tankstell wit und breit. Es het weder Bus gha no sus was wo det ue fahrt.

Antofagasta nach San Pedro de Atacama

Bitte, bitte nid wieder so en Trödler. Es isch gar nid eifach gsi e Mitfahrglegeheit z finde, well det eh Verzwigig richtig Peru isch. Die meiste sind au richtig Arica gfahre, wies den mit de Händ eus amel versuecht hend bizbringe wos a eus verbi gfahre sind. Ich ha schnell gmerkt, je lustiger du am Strosserand dich verhaltisch, desto meh Freud hends au. Ich ha also agfange das Schild usehebe und Tanze ect. Eus ischs den so langwilig worde das d Muriel zum Bispiel gseit het „Wen de Lastwage nid ahaltet muesch 5 Hampelmänner mache“ Jo, d Arbeiter a de Tankstell hend langsam agfange komisch luege und hend sich vomuetlich gegesitig gfroget ob mir echt z viel Sunne verwütscht hend. Eine het den agahlte. En ca. 55 Jöhirge, junge Knacker ;-)

. Au er isch wieder biz misstrauisch gsi. Wo ich aber gseit han das Argentinier es komischs Spanisch redet, het er luut use glached und het gseit „Ich hasse die arrogante blöde Argentinier“. Ab do ischs Is broche gsi. Mir sind den ca 2 h mit em Alec gfahre bis er eus use lah het, well er links richtig Arica het müese. D Muriel isch den uf dem Rasthof schnell ufs Wc. Ich bi den nu det gstande, s Schild eigentlich unläserlich ide Hand ghebet. Nach 1 min haltet en Pickup a und frogt ob mir uf Calama wellet. Ich ha den jo gseit. Mir sind igstige. De Miguel het eus den bis uf Calama gfahre und er het den direkt vor em Busunternehme aghalte. 

Er isch den iegrennt zum froge ob do de Bus nach San Pedro fahrt. Mir hend eus verabschidet und hend ca 45 min uf de Bus gwartet. Mir sind den tiptop am Abig in San Pedro de Atacama acho. Witers im nöchste Blog.

Next Stop: San Pedro de Atacama

Bis Bald

Ernesto&Muriel