ninanesto
ninanesto
vakantio.de/ninanesto

San Pedro de Atacama

Veröffentlicht: 03.12.2017

San Pedro de Atacama

Mir sind in San Pedro de Atacama acho und es isch mega heiss gsi. Uf em Hiweg hend mir immer wieder absolut wunderschöni Kulisse gse. Mir hend gmerkt, do gitz einiges z gse.

Im Dörfli acho sind mir ufd Suechi nach eusem Hostel, es sind zu 90% alles Lehmhüsli. Me het gmerkt, dass die meiste Lüt ufere Tour sind, es het nämlich nid viel Lüt gha. Mir hend euses Hostel gfunde und hend den ihchecket für 1 Nacht, Sicherheitsmassnahme. Nach ca 20min hend mir jedoch für die ganz Wuche buechet, da es üs mega gfalle het. Es isch recht ussergwöhnlich ihgrichtet gsi, mir seget „Fancy“ aber de Usdruck isch vomuetlich nid allne klar. Mir sind den am Abig direkt was go esse und zwor die grösst Empanada wo ich ih mim Lebe gse han. 

Sie isch mega gsi. Nachdem sind mir chli dur das charmante Dörfli dure gschländeret. D Strosse sind mit warmem, gmüetlichem Liecht belüchtet, überall lauf Musig, du gsesch Lüt vo 18 Johr bis 70 Johr alt. S Esse isch eher Tür, au d Aktivitäte aber das isch halt so. Zruck ih eusem Zimmer hend mir mit eme Brasilianer gredet wo ebefalls liedeschaftlich fotografiere duet. Er het eus empfohle ca 10 min usem Dorf z laufe und d Sterne go aluege. Da hend mir au gmacht und d Muriel het hammer Föteli anebrocht. Mir hend d Milchstross s erstmol so guet gseh.

Wo mir in La Serena gsi sind isch sie leider hindereme Berg ghocket, die doof.

Am zweite Tag hend mir den am Morge biz s Fuultier gmacht. Am 13:30 hend mir den s Velo gsattlet und sind i die 1h entfernti Lagoon Cejar gfahre, en See z’mitzt ide Wüesti wo en 7x grössere Salzghalt wie de Ozean het. Ja, d Chance sind guet gstande das de Ernesto de „Toti Ma“ entlich schafft. Da probier ich nämlich sit 23 Jahr erfolglos. Mir sind 1h lang über eh verlöchereti, alti Stross gfahre, es het mir sämtlichi Verspannige glöst, so hets gschüttlet. Nach dem d Muriel ca 50 mol gfroget het obs no wiit isch sind mir den acho. „Nei mir sind gad det, nuno det füre“. Das hani den 50 mol gantwortet. Es isch jedoch würkli nid ahgnehm gsi da mir ide Mittagssunne gfahre sind. De Grund: Am Morge isch s Wasser eifach z chalt und ab em 16:00 haltet alli Büs mit de Lüt wo Toure buechet hend. Mir sind acho und sind direkt is Wasser gumpet und direkt wie e leeri Pet-Fläsche obe uf gschwumme, ich ha eh schiss Freud gha. 

Hesch jedoch nur 45 min dörfe dine blibe, welld sus eifach uströchnisch. Es het au glanget, mir hend 45 min lang eis Gaudi gha, hend gfötelet und gfilmet. Für üs eis Highlight meh. Wo mir den troche gsi sind, hend mir das ganze Salz am Körper gseh, wahnsinn. 

Mit de Badhose hetsch chöne eine zTod schloh, steihärt. Mir sind genau 6 Nase gsi wo a dere Lagune gsi sind, chum hend mir eus uf de Weg zu de Velos gmacht, sind Büs ane gfahre als gäbs keis Morn meh, es het nume no so gwimmlet vo Lüt. Minimum 100 hend sich verbreitet uf dem Areal und es isch luut worde. Mir hends genau richtig gmacht. Nebet dra hetz no en See mit Flamingos gha, wo mir no churz besichtiget hend bevor de gross Velo-Plausch witer gange isch, jeeeehh.

Ja nach ca 1 h sind mir wieder zruck gsi, hend d Velo abgeh und sind go dusche zum all das Salz abzwäsche. D Hut isch immerno Wis gsi, well sie so trocke gsi isch.

Am Tag spöter isch eusi ersti organsierti Tour uf em Plan gstande. Am Morge & Mittag sind mir chli dur d Stadt gloffe, hend biz Hündli gstreichlet, z Mittag gesse. Am 16:00 het eus den de Guide im Hostel abgholt und mir sind ca z 8te uf die Tour. Mir sind is Moon Valley.

 Wieso de Name? Ganz eifach, es gseht zum Teil us wie uf em Mond. Es isch teilwiis schneewiss, alles mit ere Salzkruste bedeckt.

 Mir hend einigi gseh wo die Tour mit em Velo gmacht hend. Mir hend jedoch mit em Auto scho ca 45 Min gha und es isch ue und abe gange bi ca 34 Grad. Nei danke, seit sogar de Velo Fründ Ernesto. Mir hend jenschti Sehenswürdigkeite bsuecht. 

Mir hend zum Teil au müese de Berg uf laufe ca 20 min zum die traumhafti Ussicht ha.

 Mir sind au durch so e Art Höhli dure gloffe, wo sich s Wasser dur de Berg grabet het. Mir hend beid no nie so e idrücklichi Landschaft gseh, würkli ganz speziell. 

Nach dem sind mir richtig Ussichtspunkt wo mir hend welle de Sunneuntergang aluege. Mir hend ca 5 km vorher no en Stop gmacht zum Fötele well mir vörig Zit gha hend. Mit Schrecke hend mir denn vor em losfahre festgstellt das de Bus Öl seicht. 

Die beide vo de Tour hend jedoch soviel Ahnig vo Motore gha wie ich vom „Tote Ma“ mache ohni Salz im Wasser. Ich ha mir das denn agluegt und ha schnell s Problem erkennt. Da s Öl mit Küehlwasser gmischt gsi isch und alles vom Kopf vom Motor a abe isch, chas nur d Kopfdichtig gno ha. Da isch den au würkli de Grund gsi wie ich spöter erfahre ha. Jo, mir sind den z Fuess los. A dem Ussichtspunkt acho sind ca 20 Büs vo allne Toure gstande und mir hend mit ganz viel andere en unglaubliche Sunneuntergang mitere Kulisse wie ime „Wild West Film“ chöne gnüsse. 

Das isch eusi Gruppe gsi.

Retour sind mir den mit em Ersatzbus. Am Abig sind mir ines Restaurant go Esse, sind an Tisch ghocket und ufsmol merk ich das ich die Stimm schomol ghört ha. Ich lueg übere und gseh euse Kolleg, wo mir in Cordoba s erstmol troffe hend und wo in Mendoza genau is gliche Hostel ie gloffe isch wie mir. Und ezt hockt er 2 Wuche spöter genau im gliche Restaurant genau ein Tisch nebet dra, es isch sehr lustig und gruselig zuglich gsi.

Am nächste Tag ischs am 7:00 los gange mit ere Tagestour zu jenschte Sehenswürdigkeite. De erst Stopp isch ade Chaxa Lagoon gsi, s Dihai vo hunderte Flamingos. 

Mir sind ca 3 Meter entfernt gstande und hends chöne bewundere. Es het ganz cooli Föteli geh.

 Zueglich hend mir de z Morge übercho uf em Parkplatz. Sie hend Rüehrei gmacht, frisches Brot, Kaffi und Tee bi Morgesunne… Perfekt! 

Uf em Weg zum nöchste Ort hend mir müese 30 Minute warte. Dete hets au e Baustell gha wo mir de Lastwage gseh hend und mir hend eus en lustige Satz überleit:

Lastwagen müde, Lastwagen muss schlafen. 

D Bauarbeiter hend gse das d Muriel am Fötele gsi isch, kurzerhand hends welle das d Muriel sie au Fotografiere duet. Ali hend gruefe "vo mir au no es Föteli, da isch min Lastwage"

Mir sind den witer gfahre und nach 45 Min Autofahrt sind mir acho. De 2ti Ort het „Red Stones – High Plateau Lagoon“ gheisse. 

Es isch en riesige See uf 4200 M.ü.M. Atemberaubend, so 180 Grad e anderi Landschaft nur ca 1h eweg vo San Pedro. 

Es het en bitterchalte Wind bloset. Vo de Höchi hend mir jedoch nid bsunders viel gmerkt. Obwohl mir de ganz Tag uf mindestens 3000 M.üM gsi sind. 

De nechscht Stop isch au en See gsi, mir hend den mit dere wahnsinns Ussicht z Mittag gesse. 

Die letzte zwei Stops sind biz weniger spektakulär gsi, e alti Kirche und e Städtli mit 800 Iwohner. Jedoch hend mir ganz viel spontani Stops underwegs gmacht, well de Guide irgendöbbis gseh het, Blueme, Vicunas (Lamas), anderi Viecher und au sust cooli Spots zum Föteli mache. 

Mir sind e sehr lustigi Truppe gsi und darum hend mir au abgmacht das mir no schnell uf es Bierli gönd wen mir zruck sind. Das hend mir au gmacht, mir sind ine Bar. Ca am 17:00 sind mir z’7te, zwei Schwizer (Kevin&Dominic), En Belgier wo grausam schnell cha Bier trinke (Tomas), en wahnsinnige, chline Franzos (Valentin), en 2 Meter lange Dütsche (Tom) und d Muriel & Ich ine Bar. 

Jo, am Ahfang hend mir eus aglueget und hend eus gfroget „Söllemer 2 oder 3 Bier bstelle (1 Liter Fläsche jewils)“. Mir hend den gfunde, chom 3 Liter schaffemer scho. Es isch immer lustiger worde und immer spöter. Schlussendlich ischs scho 23:00 gsi, mir hend nurno Seich gredet und mir hend gmerkt das mir gad die 20sti Fläsche Bier leer gmacht hend, jo 20 Liter Bier z 7te, haha. Es het den 88'000 Pesos kostet, jede het also 18 CHF abdruckt. 

Nach dem hets eus ih die nächst Bar zoge, e Karaoke Bar. Am 1 ide Nacht sind mir den na an Fluss abe, wo ca 100 Lüt um 2 riesigi Füür ghocket sind, Musig gloset hend und no meh Bier trunke hend. Ca am 3 hets eus den is Bett zoge, ich ha den zum Glück im undere Bett gschlofe, den han ich eis Bei chöne usem Bett hebe zum de Anker use rüehre. Im obere Bett wers weniger lustig gsi, aber ich wer glaubs gar nüme ue cho merk ich grad.

Am 5te und letzte Tag hend mir nid so mega viel gmacht, mir sind no go Geld uselah. Mir isch schnell für 10 Sekunde s Herz stoh blibe woni gseh ha das mis EC Kärtli weg isch. Ich ha gmeint sie hends mer klaut. Mir sind retour is Hostel und ich ha mini Hose durchsuecht, da hani sie wieder gfunde. Ich ha sie inere andere Hose Täsche gha. Ufsmol ischs mir wieder in Sinn cho wo ich sie ide Bar dete versteckt ha well ich irgendwie s Gfühl gha ha, dass eine wo mich bös aglueget het mich will usraube, natürlich nur Paranoia gsi. Jetzt gönd mir am Morge am 3:00 uf de Nachtbus nach Bolivie. Am Wuchenend gönd mir zum berüehmte Salzsee „Salar de Uyuni“.

Next Stop: Uyuni, Bolivia

Bis Bald

Ernesto Y Muriel

Antworten

Chile
Reiseberichte Chile
#sanpedrodeatacama#chile#southamerica#wüste#dessert#desierto