La Serena - Isla Damas

La Serena – Isla Damas

Also, am Morge sind mir mit all üsem Gepäck und em Schild „Norte“ mit de Ubahn richtig Busbahnhof. Dete acho hend mir den mit eusem schwache Spanisch müese usefinde welle Bus das richtig Norde fahrt und eus uf de Panamericana (Autobahn richtig Norde) useloht. Aber alli Buschauffeure hend nur de Chopf gschüttlet.. Am Infostand hends eus den gseit das mir am falsche Busbahnhof für das seget, mir sötet an en Micro Busbahnhof. Ca 20 min Fuessmarsch ischs gange bis det ane. Det hets den ganz viel chlini Büssli gha. Mir hend witer gfroget, ufsmol seit eine „jojo istige“. Im Bus ine han ich den nomol de Chauffeur gfroget ob er in Norde fahrt. Den seit er „aaah in Norde? Neneii ich fahr in Süde“! gad nomol Schwein gha. Schnell wieder usgstige han ich den de dusse zemmegschisse wo eus zu dem Bus zuegwiese het. Er het den schnell uf en andere Bus zeiget. Deseb han ich den ca. 5 mol gfroget ob er in Norde fahrt, Panamaricana zum Hitchhike. Tipptopp het er gseit. Mir sind losgfahre, ich bi aso scho biz nervös gsi. Ide Stadt isch er nur ca 30 gfahre, ich ha no denkt das mir so nie achömet. Wo er aber ufd Autobahn igspuret het, het er mol ufs Gaspedal druckt. De Bus dörfti nur 100 km/h fahre. Er isch jedoch mit ca 130 km/h a de Autos verbi wie en Geisteskranke. Er hets den sowit brocht dass er eim de Spiegel abgfahre het. Nach 5-minütigem verhandle, während de Fahrt, er het eifach d Türe ufgmacht und ca mit 30 km/h mit em Auto nebet dra diskutiert, den ischer witer blochet. Ja, mir hend na 2-3 Schrecksekunde gha bis er den gseit het mir söllet do use. Mir sind ame chline Rasthof gsi, wos ca 3-4 LKW’s gha het. Ufd Autobahn hesch nid chöne stoh wells kein Pannestreife gha het. Ich ha vo Ahfang a denkt das da kein ideale Platz isch, aber mir hends den probiert. Nach ca einere Stund isch d Bilanz nid gad erfreuend gsi. Sind nur ca 5 Lastwäge dure und alli hend irgend ine anderi Richtig müese. Ufsmol fahrt en Pickup ane wo zwei jungi Manne drin gsi sind. Sie hend glached und gseit „Ihr schowieder, mir hend eu scho z Santiago im Industriegebiet gseh ume irre mit eune Rucksäck und ez stönd ihr do, was mached ihr“? mir hend ihne vo eusem Plan verzellt und sie hend den gfroget obs eus anen guete Ort für Hitchhike sölled bringe. Mir sind igstige und sie hend eus erklärt das do nid viel ahaltet für eus. Nach ca 10 min hends eus den anere dütlich grössere Raststette use loh, die letzt bevors nurno Autobahn isch und us de Stadt use goht. Nach ca 15 min Schild usehebe het den scho de erst eus gwunke mir sölled cho.

 En brandneue Volvo Lastwage. Inedra ischs so suber gsi, das mir eus fast nid getraut hend zum esse & trinke. Er het Bastian gheisse isch 28 gsi und fahrt die ganz Zit vo Santiago uf La Serena und zruck. Wo er eus nach ca 10 min fahrt gseit het das La Serena sis Ziel seg hend mir eus inerlich gfreut, well genau det ane hend mir welle. Mir hend ihm jedoch nid gseit das da euses Ziel isch, falls er eus unsympatisch wer chöntet mir eifach sege, das do wo mir gad sind guet seg, er sell eus use loh. Mir sind jedoch bis uf La Serena mit ihm mitgfahre. Er isch en nette gsi aber er het nid sehr viel verzellt. Er het lieber sini 80er Hits CD ca. 20 mol hinderenand laufe loh. Aber das isch eus egal gsi, hauptsach acho noch dem Tag. Mir hend jedoch müese Spanisch rede wen mir biz hend welle schwäze und das isch au guet so, nur so lernt mer die Sproch. Er het eus den nach 600 km anere Bushaltestell in La Serena use lah und mir hend eus verabschidet. Mir hend kei Ahnig gha wo ane go, also sind mir nach ca 1 min warte inen Bus igstige wo „Centro“ agschribe gsi isch. Er het direkt vor eme Hostel aghalte. Mir hend gfroget obs Platz hend, und hend anschlüssend euses Zimmer bezoge. Es isch eis vo de coolste Hostels gsi wo mir bis jetzt gha hend.

Am nächste Morge hend mir z’Morge gesse und sind aschlüssend id Stadt. Das isch Südamerika, überall Strossemarkt, Latino Musig lauft a jedem Egge, do gfallts eus.

 Es isch es chlises Städtli gsi mit Ussicht ufd Ande. Euses Hostel isch quasi am höchste Punkt vo dem Städtli gsi also hend mir au dementsprechend Ussicht gha und jede Obig en herrliche Sunneuntergang vo de Dachterrasse chöne gnüsse.

 Vor eusem Hostel hetz gad en Park gha mit ganz vielne Strossehünd. 3 devo sind quasi d Cheffe gsi vo dem Park und die sind direkt uf eus los zrenne cho um eus z begrüesse. 

Die eint het so langi Hoor gha dass sie ganz verfilzts Fell gha het. D Muriel het sich den d Müeh gmacht zum die grösste „Rastas“ use z schnide. 

Und mir hend no schnell eh Bürste kauft zum sie strigle. 

Wo mir fertig gsi sind hed sie so Freud gha dass sie sich uf de Rugge treit het und ganz wild hi und her bewegt het, ohni Schmerze. Idrücklich gsi, das sie ca 1 ½ h lang so guet ane ghebet het. 

Mir hend eus den am Abig bim z Nachtesse dezue entschide das mir es paar Täg länger wie planet do blibet. Schlussendlich isch den e Wuche drus worde. Am nächste Tag hend mir alles packt und sind mit em Tagesgepäck richtig Oberservatorium. Mir sind ca. 1 h mit eme Bus is Valley Elqui – Vicuna gfahre.

 Das isch es chlises Städli gsi zwüsched Wüesti, Berge und ganz vielne Wiirebe.

 Det hend mir den für 1 Nacht buechet gha. Am 21:00 ischs den mit em Bus richtig Wüesti gange. Mir sind ca 1h uf Schotterströssli is Obervatorium gfahre. Wit weg vo jedere Liechtquelle sind mir die letzti Stross de Berg uf gfahre, keis Liecht. Nur ganz viel chlini grüeni Lämpli hend zeiget wo de Weg dure goht. D Füehrig det dure isch 2 ½ Stund gange. De Guide het eus z.b anhand vomne Laser die verschidene Sternzeiche zeiget.

 Mir hend dur es mega Teleskop chöne die verschidene Planete aluege. Unteranderem de Saturn, me het sogar de Ring gseh wo er rundume het. 

De Guide het jetzt ALLES gwüsst über s Universum. Egal was mer ihn gfroget het, er het uf alles e Antwort gha. Er het au genau gwüsst welle Stern wo isch, au wen er gar nid am Himmel gsi isch sondern hinder eme Berg. Du bisch richtig itaucht währenddesse er eus übers Universum ufklärt het. Es isch eh ganz spezielli Stimmig gsi. Me isch sich ufsmol winzig vorcho uf dere Welt. Ganz viel Sache wo mir vorher nid gwüsst hend. Mir sind den am 24:00 wieder retour gsi.

Am Tag spöter sind mir den wieder retour nach La Serena ih euses vorherige Hostel. Eh Dütschi vom Observatorium het eus e Insle empfohle wo mir unbedingt ane sötet. Mir hend eus den namal kurz erkundiget im Hostel und hend eus den en Tag spöter uf de Weg gmacht richtig Isla Damas. En chline, dreckige biz kaputte Bus het am Strosserand mit de Aschrift „Isla Damas“ gwartet. Am 9:59 sind mir igstige und gad no de letzti Platz verwütscht. Ich han mich gfreut das mir na Platz gha hend, am 10:30 isch er jedoch immernonig losgfahre und es sind immer meh Lüt cho. Wenns kei Sitzplätz meh het, holt mer halt Schämmeli vom Restaurant nebed dra und die Lüt hocket halt 2 h det druf im Gang vom Bus. 

Jo, nach ca 10 min fahre isch den eh Frau mit eme Baby z mizt uf de Autobahn igstige. Da mir z vorderst ghocket sind und alles was hinder eus gsi isch im Gang ghocket isch, han ich natürlich müesse Platz mache. Jo, bini halt 1 ½ h gstande. Nach 1 h Autobahn isch den schluss mit teerte Strosse gsi. Mir sind uf es Schotterströssli abboge und ca namal 1 h lang det druf gfahre.

 Ich ha gmeint de alt Chlapf gheit nächstens usenand, aso de Bus nid de Chauffeur, de isch nämlich au scho gschätzt 90i gsi. Ich ha die meist Zit demit verbrocht am Chauffeur Sache ufzlese wo ihm dur d Vibratione abgheit sind. Und es isch ALLES abegheit, was de eis debi gha het, unglaublich. 

Mir sind den acho. Es verschlofnes Fischerdörfli. Vo det us sind mir mit eme chline, würklich chline Böötli richtig Isla Damas. Uf em Weg use hend mir d Waalfisch verfolgt. Sehr idrücklich gsi wied immer wieder Wasserfrontäne gse hesch und d Flossene. D Muriel hetz leider nid gschaft zum es guets Föteli z mache, da er unberechebar immr a andere Stelle us em Wasser cho isch. 

Mir sind den eimol um e gschützti Insle gfahre, mir hend gseh: Pinguin, Seerobbene, Seeleue, verschideni Vögel und Otter.

Seeleue gmüetlich uf de Stei, kei Ahnnig wie die det ue cho sind. 

Er het Usschau ghalte. 

Die sind au lustig gsi. 

Eifach nur mega Fotis wo d Muriel eimol meh gschosse het.

 Es mega Erlebnis, ich ha die Tier no nie in ihrerer natürliche Umgebig gseh. Bi de einte Insle hend mir sogar dörfe druf goh für 30 min.

Leider z chalt gsi zum go schwimme, jedoch en traumhafe Ablick.

 Jo, am Abig sind mir retour uf La Serena. Uf em Weg hend mir ih de Wüesti no Wild lebendi Alpakas atroffe.

 Dete acho han ich mit schrecke festgstellt, das ich en zimliche Sunnebrand a de Stirn gha han, well ich mich vergesse ha zum ihcreme. Ich ha den a de folgende Täg d Sunne gmide und bi im Hostel blibe. Nach 7 Täg sind mir den witer mit Hitchhike richtig Caldera, das isch es Städtli wo eus e Arbeiterin vom Hostel empfole het. Meh jedoch im nöchste Blog.

Bis Bald

Ernesto&Muriel

Next Stop : Caldera.