Vietnam - Phu Quoc (15.-20.1.18)

Chum simmer dobe gsi hämmer scho wieder de Landeaflug in Agriff gno. Ganzi 35 min. hät de Flug vo Ho-Chi-Minh-City nach Phu Quoc duret. Mir händ eus e Trauminsle vorgstellt und sind ganz gspannt gsi, wo mer usem Flüger gstiege sind, was eus jetzt erwartet. Eusi Träum sind leider aprubt beendet worde, da euse Taxifahrer sini rechti Hand non-stopp a de Huppi gha hät! Mir sind und bliebet in Vietnam 😉. Phu Quoc isch bekannt für sini Traumstränd, wo mer au würkli chönd bestätige. Leider häts aber natürlich au Hotel an Hotel wo a bester Lag sind und damit au werbet. Mir sälber händ es Bungalow gmietet ca. 7min. vom Strand weg zum laufe und daher sehr ruhig und schön! Eusi eige Wäschmaschine und e chlini Chuchi händ das Bungalow abgrundet. Dalag selber isch no miteme schöne Pool undere schöne Gartealag usgstattet gsi. Die erste zwei Täg hämmer sHüttli sehr guet usgnützt, da dIlse mitere Mage-Darm-Verstimmig sBett ghüetet hät! Zum Glück hämmer 5 Täg buecht und so hämmer no 3 Täg gha zum dInsle zerkunde.

So hämmer eus mitem Scooter uf Entdeckigstour begeh und händ zerst emal de bekannti Wasserfall gsuecht! Es isch no es Abentüür gsi bis mer de au gfunde händ, da so ziemlich nüt beschilderet isch uf dere Insle. Nach öpe 3/4h uf Sandwägli, Löcher i de Strass, dur en halbe Wald und mit Hilf vo maps.me hämmer denn doch de Igang gfunde und händ eus no zFuess uf de Wäg gmacht für die letschde Meter. Leider häts echli zwenig grägnet i letschder Zit, somit isch de Wasserfall eher es bescheides Bächli gsi wo sich de Wäg über die grosse Stei gsuecht hät!

Im gsamte hämmer de Scooter 4 Täg lang gmietet und sind überall here dämit. SKokosnuss-Gfängnis, wo im Krieg vor allem die hochrangige Vietnamese vom Norde gfange ghalte worde sind. Unglaublich wie sie die Lüt i chline Chäfig oder liechtdichte Containers gstopft und so bestraft händ. Ruhig und miteme komische Gfühl im Buch simmer denn schlussendlich wieder wäg gfahre.

Phu Quoc isch e Insle wo würkli für Strandferie buecht wird. Wie de Tourismus boomt gseht mer a de Strasse wo baut worde sind und a de ganze Hotelkomplex wo am entstah sind. Es git faschd kein Ort wos nid am baue sind. De Urwald wos no hät, wird ines paar Jahr wahrschinli au verschwunde si! Daher isch es schön zum gseh, dass die Iheimische im Landesinnere sich es Hüüsli chönd leischde wos selber bauet. Und doch wird die Insle e Art Touristefabrik.

Derkänntnis vo dene 5 Täg isch, das mers sehr gnosse händ. Die schöne Stränd, die unglaublich schön Natur, die Iheimische und ihri Traditione, swarme Meer inkl. Massage am Strand 😊 und Bars mit gueter Atmosphäre, feinem Food, chüehlem Bier und gueter Musig. Nebet em Strand, Sunne und em Meer hät die Insle aber nid viel zbüte.

Jetzt gahts wieder zrugg uf Ho-Chi-Minh, wo mer emal zwei Nächt buecht händ! Mal luege wies denn wieter gaht!