Neuseeland – Südinsel Nr.2

Te Anau – Picton (11.2. – 22.2.18)

Zit lauft und wie akündigt simmer ufbroche richtig Queenstown. DStadt vom Adrenalin! Das gseht mer au, denn ca. jedes zweite Gschäft i de Stadt isch es Booking-Office für alles mögliche! Acho in Queenstown hämmer no euses Bettzüg chöne wechsle und denn ab id Stadt! Vieli Restaurants und Bars findet mer a de Waterfront wo eim iladet, gmüetlichi Stunde zverbringe! Gschlafe hämmer in Arrowtown, was leider nid so lässig gsi isch, meh en enge Parkplatz als en Campingplatz. Am nächste Tag hämmer denn dStrecki uf Glenorchy uf eus gno, en Tipp vo Südafrikaner ufem Campingplatz in Te Anau, was schinbar sTor zum Paradies söll si! Das isch es wahrhaftig au gsi, absolut fantastische Drive gsi und e herzigs Dörfli! So isch es au glich gsi, hämmer de glich Wäg wieder zruggfahre müese! Hüt hani en Relax-Tag gha, da dIlse hüt sFahre übernoh hät! So han ich de wunderschön Wäg chöne als Bifahrer gnüsse!

Mir sind zrugg a euse Lieblings-Ort Wanaka. Det hämmer, zämä mit de Amis, ufeme andere Camping übernachtet. Direkt am Fluss und zmitzt i de Natur, wunderschön! De abendlichi Spaziergang am Strand langs em Fluss hät natürlich au nid dörfe fähle! Mir händ gwüsst dases jetzt 2 schöni sunnigi Täg a de West Coast git, daher simmer am nächste Morge losdüset richtig Haast und denn deruf bis Franz Josef Gletscher! Isch en lange Drive gsi hüt und viel Kürvlis…aber es isch e super schöni Route gsi! Zwüschet dure churz mal gregnet, für de Reschd eifach zum gnüsse! DSchäde vom Sturm vom 1. Februar sind leider no immer zgseh gsi…umgfalleni Bäum, ganzi Stück wo am Hügel weggrutscht sind oder ganzi Stuck vo de Strass wo eifach wägbroche sind! Sehr idrücklich gsi, was da für e Kraft gwürkt hät!

Am Morge ufwache und de Blick direkt uf de Franz Josef Gletscher grichtet….da cha mer sich wahrhaftig nid beklage! Schinbar isch das nid oft so, das mer de Gletschder so guet und vorallem mit blauem Himmel gseht! Isch es doch e Region mit sehr sehr viel Rägä!
Wills am Tag vorher nid so schön Wätter gsi isch am Abig, simmer hüt morge nomol zrugg zum Lake Matheson und händ de sehr schöni Walk rundume gmacht! Am Afang isch es chli e Völkerwanderig, nacher isch es ruhiger und uh agnehm gsi i dere Natur! Danke Fabio für de Tipp 😉. Ufem Wäg zu eusem Schlafplatz simmer no in Okarito gstoppt für en Walk ufen Hügel wo e fantastischi Sicht versproche hät. Die hämmer denn au als Belohnig übercho….über sMeer und dLagune, eifach nur Wow!
Am Abig hämmer in Ross Beach ime neue Camping (erst es paar Mönet offe) gschlafe, ca. 10m weg vom Strand! So dörf natürlich de Gang zum Sunneuntergang am Strand au nid fähle! Zämä mit de Amis, wo mer jetzt zämä dRoute planet händ und drum immer wieder gsehnd, hämmer no e chlini Fotisession igleit!

Nach Ross Beach isch es wieter gange zum Carters Beach. Ufem Wäg hämmer natürlich in Hokitika müese stoppe. SMeka vo de Greenstones. Lut de Maori’s chunt mer de Stei / Schmuck nur über und kauft sich de nid sälber! So hani e mega schös Ketteli vo de Ilse übercho 😊. En Stopp i de Bäckerei und am Strand, wo de Name Hokitika mit Äschd gschriebe staht, hät nid dörfe fähle!
Uf de ganze Fahrt hät mer so viel Abwechslig und me chan immer wieder stoppe zum grösseri oder chlineri Wanderige mache! So simmer hüt anere Hängebrugg verbi cho und händ natürlich gstoppet. Scho idrücklich gsi, schwingend uf die ander Site und däbi immer de rissendi Fluss unedra zgseh 😉. Am Nomittag simmer ime ganz chline Kaff namens Tapawera acho im Landesinnere, bye-bye West Coast! Mir händ det en riese Garte für eus gha und händ e bitz gläsä und Spieli gmacht! Sie händ vor de Kuchi sogar es Chrütergärtli gha wo mer sich hät dörfe bediene, zur Freud vo de Ilse natürlich 😊. Zämä mit de Amis hämmer de wieteri Plan für de Abel Tasman National Park gmacht. Es söll wieder zwei Täg wunderschön Wätter si …. Los gahts!

Irgendwie erwartet mer öpis dur all die Bricht und Erzählige vo andere und denn chunts doch anderst wenn mers in Live gseht! Ich han gwüsst das de Abel eis vo eusne Highlights wird, aber dases so fantastisch isch, das hani nid erwartet! Dur en guete Tipp vo Engländer in Te Anau, hämmer bim The Barn buecht für zwei Nächt, was absolut traumhaft gsi isch! En Campingplatz am Meer und am Beginn vom Abel Tasman Nat. Park. Eis mues mer de Neuseeländer lah, sie lönd dNatur bewusst Natur si. Kei grossi Shoppingcenter oder Lädä, nei, zwei Campingplätz, eis Kafi/Restaurant und zwei Wassertaxibetrieb, sust eifach nüt ussert Natur. Sini Läbesmittel etc. mues mer ca. 30min. vorher im Dörfli poschde und tanke!
Bepackt mit Wasser, Sunnecreme und Esse simmer mitem Ami-Päärli vom Campingplatz eifach mal losgloffe, so wiet wie mer luschd gha händ! Unbeschrieblich schön isch es gsi im Schatte vo de Bäum entlang vo wisse Stränd zlaufe, daher simmer gloffe und gloffe bis zur Öpfel-Bay wo mer denn was gesse händ. Nid nur mir händ hunger gha, sondern au eini vo dene unzählige Möve. Sie hät doch es ganzes Stuck vo de Ilse ihrem Brot weggschnappet! Ja sie isch dementsprechend verschrocke 😉.

Am nächste Morge isch de Wecker scho ziemlich früeh gange, da mir abgholt worde sind fürs Wassertaxi wo eus an Startpunkt vo de Wanderig bracht hät! Bi de Firma vom Wassertaxi simmer alli uf die verschiedene Boot verteilt worde und euse Skipper hät sich uf de Traktor gschwunge und isch mit eus zerst es paar 100m uf de Strass (mir im Boot verstaht sich 😉) gfahre bevor er in richtig Meer abboge isch! Det hät eus denn en andere Typ ganz is Wasser gfahre und mir sind mitem Schnellboot los! Mir erfahret, dass sie innerhalb vo 6h en Höheunterschied vo 4.6m im Wasserstand händ, sehr beidruckend! Er zeiget eus na paar Sache bevor er eus denn in Torrent Bay uselaht wo eusi Wanderig afangt! Bis Bark Bay simmer zämä mit de Amis gloffe, nacher zZweite wieter bis Onetahuti. Wow, eifach e Strandzunge inmitte vo de Natur. Atemberaubendi Ussichte, zum teil steili Stück ufe und abe und de Reschd eifach wunderschön gradus. Mir händ denn ca. 1.5h zit gha a dem Strandabschnitt Onetahuti und sind nachem Esse natürlich sofort is sehr erfrischende Meer gumpet! Danach simmer wieder vom Wassertaxi abgholt worde wo eus zrugg uf Manahau zum Camping bracht hät! Es absolut genials Highlight, wo mer no lang werdet in Erinnerig ha!!

Am Morge hämmer denn de wunderschöni Sunneufgang gnosse und zueglueget, wie sie hinderem Berg und Meer ufgstiege isch! Ab richtig Nelson, da jetzt wieder Rägä im Abel agseit isch! In Nelson acho hämmer zwei! Velos gmietet und nochli dGägänd erkundet, da en Zyklon sötti cho am Abig und nächste Tag und niemert weiss wie hert dases eus trifft, da Nelson eis vo de Risikogebiet gsi isch! Ja dur de ganzi Rägä simmer denn mitem Velo ane Brugg cho mitem Schild «Achtung Hochwasser». Mir händ dänkt, so schlimm chas ja nid si und dIlse isch ab dur dMitti. Faschd es bitzeli zu langsam und mit nasse Schueh hät sie mir dAwisige geh, mit meh Tempo zcho! Natürlich befolgi Awisige und han extra Alauf gholt! Ja wie sich usegstellt hä tisch es tüüfer gsi als agno und ich han echli zu viel Schwung gha….die nächste Stund hani mit nasse Hose, nasse Schueh und glaub sogar nasse Underhose verbracht 😉. Mir händ nüme chöne vor lache und dur de Wind bim Velofahre sind denn mini Kleider au bald wieder troche gsi!
Zrugg bim Campingplatz hämmer schnell beschlosse, nomol en Nacht zbueche, da jede aghalte worde isch, am nächste Tag nid uf dStrass zgah wenn nid unbedingt nötig! Mir händ denn de nächsti Tag im Camper verbracht mit viel viel Rägä und teils ziemlich Wind, wo euse Camper au ab und zue schön duregschüttlet hät! Sust isch er aber einiges weniger stark usgfahle wie agnoh, wo mir natürlich happy drüber gsi sind! Nachere ruhige Nacht hämmer am nächste Tag wieder super Sunne gha und händ eus ufgmacht, dPanoramastrass richtig Picton zfahre, wo mer nur bi schön Wätter söll mache! Vorher hämmer definitiv nach 3 Wuche müese Abschied neh vo de Amis, da sie bereits en Tag früehner uf dNordinsle gönd will sie nur no knapp e Wuche Zit händ!

Acho bi Marlborough Sound, ähnlich wie Milford Sound, hämmer super schöns Wätter chöne gnüsse und wieder es paar Ussichtspünkt gmacht ufem Wäg! Mir sind denn wieter nach Blenheim gfahre, dWiigegend vo de Südinsle! Echli Südafrikafeeling hämmer brucht und händ es Winetasting mit Lunch bim Wiiguet Wither hills gmacht! Sehr sehr feine Wii, daher isch eusi Endabrechnig au chli höcher usgfahle als agno und mir sind wieder ideckt für die restlichi Zit 😉.
Dnacht hämmer ufeme Freecampingplatz verbracht, es mega schös Plätzli grad ame chline Teich mit schwarze Schwän! Es Picknick hät somit au no müese si!

Nachem ufstah simmer uf Picton und händ eus ufem Campingplatz igrichtet und sind nachli is Städtli ine! Mega herzig und chli! Vo da gaht morn eusi Fähre richtig Wellington! En letschde Tag uf de Südinsle hämmer gnosse und sitzet jetzt uf de Fähre richtig Norde! Mir sind gspannt was dNordinsle für eus bereit haltet und obs eus au so guet gfallt wie dSüdinsle. Die hämmer wahrhaftig i euses Herz gschlosse, Land, Lüt und Natur! So gömmer glücklich und gspannt uf uf wieteri Abentür aber doch au miteme weinende Aug, das mer die wunderschön Südinsle müend zrugglah! See you soon!

(Leider langet sInternet nid für Föteli :-(. Evtl. spöter)