Neuseeland - Nordinsel 2

Hot Water Beach – Orewa (3. – 10. März)

Coromandel Peninsula isch euses Ziel. De ersti Stopp söll in Waihi Beach si. Herzigs chlises Dörfli und en schöne Strand. Händ aber nid lang umeglueget sondern sind denn wieter zu eusere Übernachtigsdestination Hot Water Beach. Bim Camping acho hämmer es Schüfeli packt und sind an Beach. Jetzt heissts buddle und buddle binere heisse Quelle und sich denn in eigene Hot Pool setze. Jesses, mit so viel Lüt hämmer denn doch nid grächnet. Ein riese Sandchaschde für Erwachseni 😉. Mir händ denn doch no en Pool gfunde mitere ziemlich heisse Quelle und händ eus au echli dripflantscht!

Am nächste Morge häts gheisse früeh ufstah. Mir wänd zur Cathedrale Cove, aber no vorem grosse Touristeufcho! So simmer bereits am halbi 8 im Auto gsi und los! Wow, nachere schöne Wanderig simmer mit nur no e Handvoll Lüt bi dem Naturwunder. En riese Boge im Fels und hinedra de riese Brocke Stei im Meer. SWasser isch leider scho chli zu höch gsi und sehr unruhig, so das mer doch no nassi Hose übercho händ. Aber es isch würkli fantastisch gsi. Obwohl mer e wieteri Nacht leider scho zahlt händ ufem Camping hämmer beschlosse wieter bis uf Coromandel Town zgah. Dstrass isch sehr sehr sehr kurvig und brucht viel Zit und da mer nüme viel Zit händ, chömer so en Tag spare. Ufem Wäg uf Coromandel Town hämmer natürlich am New Chums Beach ghalte, eine vo de schönste 10 Stränd wältwiet, schinbar. De Wäg zFuess det ane isch au demensprechend gsi, über Stock und Stei (wortwörtlich über Steibölle) und dur de Wald uf und ab über Wurzle und Stei bis mer nach 30min. bim Strand acho sind! Wo denn dSunne und de blau Himmel no cho sind, häts eus denn au no ganz überzügt! So hät en Schwumm natürlich nid dörfe fähle und so simmer au scho im chalte Meer gsi!
In Coromandel Town acho simmer grad wieter 3km nördlich zum Driving Creek Railway. Das isch en Typ namens Barry wo vo de 70-er Jahr bis er im 2015 gstorbe isch immer und immer wieter a sinere eigene Isebahn bauet hät! Er hät die brucht zum de Lehm für sini Töpferarbete vom Berg zu sim Huus zbringe. Erst i de 90er Jahr isch sie für Touriste göffnet worde! Baut hät er alles vo Hand. Mittlerwile isch dStrecki 3km lang und füehrt über es paar Brugge (sogar ei Doppelstöckigi), dur 3 Tunnels bis zum Ussichtspunkt Eyefull Tower. Spannendi Erfahrig gsi das Werk so zgseh!

De nächsti Tag isch en Fahrtag worde. Mir händ vo Coromandel Town us bis hinder Auckland wele, das mer möglichst schnell bi Bay of Islands sind unds det nomol so richtig chönd gnüsse! Söll eini vo de schönste Gägände uf de Nordinsle si. Auckland isch zum Glück überhaupt keis Problem gsi mitem Verkehr und so simmer bis churz vor Whangarei gfahre, 299 km, nämli bis Ruakaka. Det hät dIlse en super schöne Freecampingplatz gseh, wo mer gratis übernachtet händ, direkt am Strand. So hämmer natürlich nach dene Stunde im Auto no es paar schöni, sunnigi Stunde am Strand und im Meer chöne gnüsse!

Russell isch euses hütige Ziel. Zmitzt in Bay of Islands. Mir händ vo Engländer de Tipp übercho, dases mega herzig söll si und de Campingplatz super seg! Ha gmeint es hört nüme uf vo Kurve links und rächts, ufe und abe! Isch mer sogar selber schlächt worde bim fahre. So hämmer e chlini Pause igleit und sind denn gstärkt wieder wieter! Trotz de Kurve, es isch e mega tolli Fahrt gsi! Agseit isch ganz viel Rege i de nächste Täg, hüt häts zum Glück scho mal nid gstumme. Mir händ sehr heiss und super sunnig gha! Hoffemer es bliebt eso! Icheckt ufem Campingplatz mit Blick ufs Meer, hämmer sStädtli unsicher gmacht, öpis gesse, de lokali Wii und sBier testet und händ e Tour für morn buecht: Delphine gseh und mit ihne (wildi Delphine im offene Meer) go schwimme! DIlse hät Tränä i de Auge gha, da sie das scho sehr lang emal hät wele mache! Nervös simmer denn au is Bett ghüpft!

Am Morge häts denn früeh Tagwach gheisse und am punkt 8.10 hät eus sBoot abgholt am Stäg vo Russell. Mir sind 11 Persone gsi, Platz hets gha für 35, cool 😉. Nachere chline Instruktion simmer losdüset und alli Auge sind uf de Suechi nach de Delphine (die grösser Art) gsi! Und siehe da, nid lang hinder eus händ sie sich zeiget! S’schwimme mit ihne isch leider nid garantiert, da sie zerst dLune und dStimmig vo de Delphine wänd checke, bevor sie dLüt is Wasser lönd. Normalerwies gits e Agwöhnigsphase, bi eus häts müese schnell gah, will sie bitz schiss gha händ, dass dDelphine schnell wieder wäg sind! So hämmer eus all mit Brülle und Schnorchel und Flosse usgrüschdet und schwupps is Wasser!! Da eine nebet dir, det 2 unmittelbar bi de Ilse…wow…eifach nur wow! Leider häts bi eus beidne nid so guet klappet mitem Schnorchel, isch meh Wasser ine als Luft usecho, drum simmer denn ohni Schnorchel ine und händs nacher vom Boot wieterverfolgt! Gli drufabe händ denn au alli wieder ufs Boot müese und mir sind wieter. Und scho sinds wieder ums Boot gsi…! De Einti hät sogar mit eus gflirtet…isch uh lang bi eus am Boot gsi, nur e Armlängi vo eus wäg! Hät eus aglueget (händer scho mal ame Delphine so richtig und nöch chöne id Auge luege?!) und hät sich um die eige Achse dreiht und «tanzt». Was für es unglaublichs Erläbnis!! Mir sind alli sprachlos gsi, nur dIlse hät mitem Delphine gflirtet und gredet, ja hätem meh Kompliment gmacht als mir 😉. Unglaublich toll gsi! Denn häts e Sightseeingtour durch Bay of Islands geh bis mer die ander Art Delphine (common delphine = chlineri) gseh händ. Sie händ eus zum Abschluss no e Sprungvorfüehrig geh, wos sicher 5-6m id Höchi gsprunge sind…eifach gewaltig! So simmer denn überglücklich wieder im Hafe acho, richtig zum Zmittag esse! Nacher hämmer eus uf de Wäg gmacht zu de nöch glägene Fähre, wo ca. 5min. duret hät, uf Paihia übere! So hämmer de ganz kurvig Wäg nüme müese mache! Immer no gflasht vo dene Idrück hämmers eus ufem Camping bequem gmacht und händ die wietere Stunde am Meer eifach gnosse mit relaxe und chille!

Die nächste zwei Nächt simmer uf dem Campingplatz. Mir händ Kerikeri aglueget, sind zu de Rainbow Falls gfahre und händ es wieters Winetasting gmacht. Dasmal händ eus die Wii nid so überzügt. SEsse isch defür fein gsi! Am zweite Tag hämmer dWanderig vo Waitangi zu de Haruru-Falls gmacht. Zum Glück hämmers am Tag vorher scho gseh und gwüsst was eus erwartet. Nid würkli en Wasserfall aber isch ok gsi! DWanderig isch au nid die schönstig gsi, aber es hät guet tue echli zlaufe i de Natur. Am Fritig nach dem Walk hämmer eus entschiede, bereits dReis nach Orewa uf eus zneh, das mer scho i de Nöchi vo Auckland sind und de Samstig no chönd am Strand gnüsse und in Rueh packe. So simmer denn am 5 ca. in Orewa acho und händ bim Camping wieder direkt am Strand icheckt. En coole Platz, leider mit Iheimische vor eus, wo bis i alli Nacht ihre Ghettoblaster laufe lönd und seinzige was zählt, Alkohol und Alkohol. Janu, das isch wohl ihri Art sWeekend zfiere 😉.

Hüt Samstig simmer mit strahlend blauem Himmel ufgwacht und händ eus uf de Wäg gmacht, um de chlini See zlaufe. So simmer nacher im Städtli glandet und wieder ufem Campingplatz wo mers eus bequem machet mit Meerblick und em Buech (und ich mitem Laptop 😊) zum chli chille! Am Abig tüemer denn packe und alles bereit mache für morn. Am 10 müemer uschecke und fahret uf Auckland is Hotel, ladet euses Gepäck (was ziemlich zuegno hät i de letschde 10.5 Wuche 😉) ab zum den de Camper am Flughafe abzgeh! Fertig mit eusem Fründ Camper…uf die eint Site freuemer eus uf es richtigs Bett wieder emal, aber anderersits findemers au mega schad! Isch mega lässig gsi die 5.5 Wuche! No 3 Täg in Auckland und denn heissts scho wieder Abschied neh vo Neuseeland! Mir sind uf ei Art trurig dases dure isch, aber au glücklich das mer das händ dörfe erläbä und mir freuet eus wieder uf Dihei, Familie, Fründe, eusi Wohnig, euses Bett und euses Auto 😉. 

See you soooon….