Neuseeland Nordinsel

Wellington – Tauranga (23. Februar – 2. März)

Am Morge früeh hämmer eus uf de Wäg zu de Fähre gmacht! Bereits 1h früehner hät mer müese ichecke! Mir händ eus denn dWartezit mitere heisse Schoggi ame Kafiwage versüesst, abgrechnet uf bääärndütsch 😉. 3.5h isch das Erläbnis Fähreüberfahrt gange! Und ich sägä eu, ich bin sehr froh gsi wos dure gsi isch! Die ersti Stund schön zwüschet de Fjorde, aber nacher ufem offene Meer häts für mich also scho zfeschd gwället! Aber zum Glück sind Plätz verrusse nid so begehrt gsi 😊. In Wellington acho hämmer eus scho, ready im Camper, gfreut zum die Stadt zentdecke! Leider isch und isch nüt gange, daher hämmer denn mitübercho, das sie en Defekt a de Türe händ und daher niemert dFähre chan verlah. Ja cha ja bi eus nüt ohni Verspötig gah 😉. Mir sind denn alli mit gratis Kafi/heissi Schoggi und gratis Pommes bi Lune ghalte worde bis sie dTüre gflickt gha händ und mir es Stündli spöter wieder feschde Bode under de Füess gha händ.
Jesses, de Verchehr und die Lüt sind mir eus nüme gwöhnt, so isch serste Falschfahre scho vorprogrammiert gsi! Dur e super Aktion vo mir simmer denn aber bald wieder ufem richtige Wäg richtig Innestadt gsi! En Parkplatz wo mer 24h cha bliebe isch euses Ziel gsi! SGlück isch da mit eus gsi und es hät es wunderbars freis Plätzli uf eus gwartet, direkt nebet em Museum Te Papa. Mir händ denn eusi Wellington-Entdeckigstour au grad i dem Museum gstartet. Es gaht über Neuseeland und alli Bewohner, isch gratis und erstreckt sich über 6 Etage. Echt cool gmacht und sehr empfehlenswert. Danach ab id Cubastreet! Diversi Kulture anenandgreit und Kunst no däzwüschet, willkomme in Wellington. Ufem Heiwäg simmer no anere Sort Streetparade entgägächo! Überall Musig und 1000 Mensche wo das beobachtet und mitgsunge händ. Es hät sich usegstellt, dases e Show gsi isch vo de Maoris, de Uriwohner vo Neuseeland. Me erkennt sie ganz dütlich a ihrere dünklere Huut, de Poschdur, viel Tattoos und em Enthusiasmus wies mitgsunge händ!

Ja was so es Stadt däfür in sich hät isch dWC-Situation. Leider isch das wo mer i de Nöchi gha hetet so unbruchbar gsi, das mir ziemlich dringend (für dIlse 😉) uf WC-Suechi händ müese am Morge. Händ nid Fast Food Chettene immer es offes WC? Burger King um dEgge sei Dank, nachdem mir nachem Kauf vome Wasser, ihn 3x händ müese frage ob er eus sWC cha uftue 😉. Gstärkt simmer denn losgloffe mitem Ziel Mt. Victoria E fantastischi Ussicht über die ganz Stadt hät eus belohnt. Vo det hämmer au zum internationale Flughafe gseh! Spannend isch, dass sie für de Flughafe i de 50-er Jahr extra en Berg und ca. 550 Hüüser abbaut und verpflanzt händ.

Wieter gahts richtig Norde, 4-spurigi Autobahn astell vo 1-spurige Brugge, simmer uf und dävo! Zum dem ganze wieder echli zentcho, hämmer im nüt usse (Himatangi Beach) buecht. Leider isch das nid so en Erfolg gsi, da 95% vom Campingplatz vo Saisoncamper beleit gsi isch, wo de ganz Tag Bier trunke und Party gmacht händ und Touriste spüre lah händ, dass sie da nid dezue ghöret! Naja, dNacht isch trotzdem guet gsi 😉. Mir händ eus no an Strand verirrt wo eus faschd de Schlag troffe hät! Da isch tatsächlich es Schild mit «de Strand isch e Strass». Bisch ufem Strand gloffe und häsch dNatur wele gnüsse, sind der immer Autos um dOhre gfahre…hämmer irgendwie nid so lässig gfunde. De Sunneuntergang isch aber trotz allem genial gsi! De Abschied isch eus da nid so schwär gfahle und so hämmer Kurs uf Taupo ufgno!

Langsam hät sich dUmgebig wieder veränderet und es hät eus je länger je besser agfange gfahle! Taupo isch denn es mega schös Städtli direkt am Lake Taupo gsi wo mer, dankem Tipp vo eusne Ami-Fründe, ufeme super lässige Campingplatz gsi sind! Mir händ det au chöne Bikes miete und sind ohni Erwartige los richtig Singletrails und Bikepark. Wow…es Kürvli rächts, es Kürvli links, ufe, steil abe…dur de Wald, verbi am Strand, eifach mega cool und mir händs gnosse! Zum Schluss de Höhepunkt, natürlichi Hotpots. Imene eher chalte Fluss isch mer ine und je nöcher das mer zum Bächli cho isch wo über en Felse in Fluss gflosse isch, desto heisser isch es worde. De Bach isch so heiss gsi, das mer sich faschd verbrännt hät! Die Kombination und das i de Natur, erschd no gratis, isch es hammer Erläbnis gsi! So hämmer eusi müede Bei wieder mit natürlichem Spa wieder uf Vordermaa bracht 😊.

Nachere sehr guete Nacht simmer am Morge los richtig Staudamm. Alli 2h lönds det Wasser use, zum Strom mache. Bim Top-Ussichtspunkt hämmer das Spektakel denn aglueget. Es isch echli anderst gsi als erwartet, aber doch sehr spannend zgseh wie das funktioniert. So simmer wieder ab an Lake Taupo. Das isch de gröschdi Vulkankrater in Neuseeland, wo mit Wasser gfühlt isch!

Gern heti i de kommende Zit die verstopfti Nase vo de Ilse gha. Das Düftli in und um Rotorua isch einhigartig. Nach Schwefel und verrottete Eier…dass da no Lüt chönd läbä. Trotzdem hämmer in Wai-o-Tapu gstoppet, was sich sehr glohnt hät! Das sind geothermischi Quelle, es natürlichs Wunder mit viele verschiedene Farbe und es blubberet überall 😉.

Als nächste Punkt isch Ohope Beach ufem Plan gstande. Ab ad Küste! De Campingplatz isch mega cool gsi und sDörfli Whakatane isch au mega herzig gsi ! Eigentlich hämmer nacher nochli de Küste entlang richtig Oschde wele, leider händs aber mega Rägä agseit, so simmer schlussendlich denn in Tauranga glandet. Was füren wunderschöne Fläck! Grad nebeteme überwachsene Vulkan, wo mer hät chöne rundume wandere oder uf de Top. Beides hämmer gmacht, was super schön gsi isch! Natürlich händ au Strandwanderige und s’de Surfer-Boys zueluege nid dörfe fähle! So simmer denn au zwei Nächt dabliebe und händs gnosse! Hot Pools und en feine Italiener und eusi eige Chuchi!
Da chunt doch wieder chli Südinsle-Feeling ufe, wo mer scho immer nochli Heiweh dänah händ! Zum Glück hämmer bis jetzt doch no Glück gha mitem Rägä, immer agseit, aber praktisch nie cho! Ja leider hämmer nur no 1.5 Wuche euse Fründ Camper, und denn no 3 Täg Auckland und scho isch euses Abentür wieder verbi! Jetzt heissts aber no, Coromandel und Bay of Islands gnüsse!