Neuseeland Südinsel

Christchurch – Te Anau (30.1. – 10.2.18)

Nachem uschecke in Singapore simmer namal an Märt zum frischi Frücht go hole für euse lang Wäg nach Neuseeland. Es hät alles bestens klappet, bis euse Flug wo 19.50 Uhr het söle gah, plötzlich uf de Azeigetafle verschwunde isch! Technische Defekt, Flüger kaputt, mir müend ufen andere Flüger wächsle. Zum Glück händs das no gmerkt bevor mer i de Luft gsi sind 😉. Also nomol das ganze Prozedere mit Kontrolle etc. duremache und in neue Flüger. Mit knapp 2h Verspötig simmer den in Himmel vo Singapore ufgstiege!

In Christchurch acho isch es losgange mit de Kontrolle. Mir händ ja gwüsst dases dNeuseeländer sehr gnau nehmet mit ireise, aber das mir und euses Gepäck grad 4x kontrolliert und zum Schluss no vome Hund beschnupperet worde isch, hät eus denn doch erstunt. Aber natürlich isch alles guet gsi (händ eusi Essensreschde vorher scho entsorgt) und au mini Wanderschueh sind gnueg suber gsi 😊. Ab mitem Bus is Hotel wo mer euses Zimmer bezoge händ! Am Abig simmer den zume Stadtrundgang und typische Kiwi-BBQ bim Fabio iglade gsi. Ihn känä mär dur gueti Fründe us de Schwitz. So simmer i euses Neuseeland-Abentüür gstartet.

Am 1. Februar hämmer denn euse Camper in Empfang gno. Letschdi Instruktione, poschde im Supermarkt und los richtig Akaroa – liet ca. 1.5h vo Christchurch entfernt – wo dFranzose zerst acho sind. Sie händ gmeint es segi Christchurch, isch es aber nid gsi wie sich denn usegstellt hät. Es hät ziemlich gwindet, aber sWätter isch super gsi und so hämmer chöne de Panoramaweg neh und die super Ussicht und Landschaft gnüsse. Bim Campingplatz acho hät sich dIlse is koche gstürzt…wie hämmer das vermisst, eifach chöne zkoche was mer grad luschd händ! I dere Zit han ich euse Camper igrichtet. Leider häts denn am Abig agfange regne was au am nächste Tag immer no aghalte hät! Mir sind froh gsi simmer a de Oschtküschde gsi, dWeschdküschde häts nämli ziemli heftig troffe mit Sturm, Überfluetige und Strassesperrige.

Bi Rägä hämmer denn de Wätterbricht checkt und eus entschlosse richtig Christchurch zrugg und denn richtig Geraldine zfahre. Es richtig herzigs chlieses Dörfli wo Charme hät! Für jede wo det stoppet isch en Halt im berüehmte Chäslädeli ein Muss. So hämmer euse Küehlschrank au grad mit wunderbarem Chäs gfüllt 😊.

Das dFarb blau schön isch hämmer scho gwüsst, aber das blau no blauer chan si, fantastisch. De Lake Tekapo hät eus packt! Wunderschöni Landschaft nur scho bis zum See. Nach es paar mal usstiege simmer wieter zum bekannte Mt. John, wos au die grosse Sternwarte hät. Det hämmer e gewaltigi Ussicht uf de ganz Lake Tekapo gha und mir händ euse Auge nid traut mit dere hammer Farb. So hät eusi Kamera au wieder es paar Föteli meh ufem Speicher 😉. SZiel zum übernachte isch denn aber de folgendi See Lake Pukaki gsi. Au da wieder, gewaltigi Farb! De Himmel hät ebeso mitgspielt und hät sich au vo sindere schönste wulkelose Site zeiget. So hämmer ufeme Free Camping euse Camper parkiert, mit direktem Blick uf de Mt. Cook – höchste Berg vo Neuseeland! Es isch chum in Wort zfasse, wie wunderschön das gsi isch!

De Wäg richtig Mt. Cook Dorf hät sich ebefalls glohnt. Vo det gönd au es paar Wanderig zu Ussichtspünkt uf de Gletscher. Da mir nacher nid so recht gwüsst händ ob mer nomol ad Oschdküschde richtig Dunedin söllet gah oder eher wieter richtig Weschdküschde nach Wanaka, hämmer beschlosse in Omarama zübernachte. Denn hämmer eus erst am nächste Morge müese entscheide wo mer anewänd 😉. Ufem Wäg det ane simer no bi de Clay Cliffs verbi cho. Mir händ nid rächt gwüsst was eus erwartet und sind ziemlich überrascht gsi über die Cliffs nach ca. 14km Gravel Road 😊. Ufgrund vom Wätter hämmer eus denn entschlosse nach Wanaka zgah. Churz vorem Städtli ragt de Mt. Iron id Höchi, wo mer so grad «bestiege» händ. Zoberst hät e herrlichi Ussicht uf eus gwartet miteme Rundum-Blick über Wanaka, Lake Wanaka und die umliegende Dörfli. Wanaka hät eus so grad in Bann zoge. We just love it! Zum Glück hämmer zwei Nächt da buecht. Leider hämmer i eusere erste Nacht nicht willkommene Bsuech vo Müüs gha. Die händ eus die ganz Nacht uf Trab ghalte und am nächste Morge hämmer gseh dass sie Freud a eusem Brot und de Teigware gha händ. Nachem ganze Camper usenand neh und putze, sinds denn wäg gsi und glücklicherwies nüme cho (Holz alange 😊). Mitem Mountainbike hämmer eus uf e langwiligi Rundi am See entlang igstellt, was sich aber als absoluts Paradies usegstellt hät. De Wäg isch so toll gsi, mir händs in volle Züg gnosse. Entlang am Wasser, mängmal Chieswägli, denn wieder en Singletrack dur Waldgebiet, verbi am Strand etc. Nach es paar Stund simmer denn müed aber vollkomme zfriede und überwältiget bi de Tourist Info acho. Gratis Wifi isch faschd es Fremdwort in Neuseeland, was au mal guet isch, aber de Service i de Touriste Infos isch super. Mir händ eus denn det erkundiget wies usgseht mitem Wätter i de nächste Täg und obs möglich wär en Helikopterflug über dFjorde zmache. Det gits ca. 200 Rägätäg, aber so wies usgseht sind die nächste 3-4 Täg super Wätter. E heissi Schoggi spöter isch de Plan gschmiedet gsi und de Helikopterflug für de nächsti Tag in Te Anau buecht.

Hüt isch der Tag der Tage….min Traum gaht in Erfüllig. Helikopterflug! Chas chum erwarte. Bi de Buechig häts gheisse, kei News sind good News. 2h bevor mer händ müese det si, hämmer zu eusem Schreck den aber doch es Telefon übercho! Ob mer no öpis anders vorheget nachem Flug…ähm nei…es anders Päärli heg no buechet, aber en längere Flug (1h 45 statt eusne 1h 10) plus de Dusky-Sound no dezue statt nur de Doubtful Sound. Mir chämet es gratis Upgrade über für de längeri Flug falls mir iverstande seget…ähm…ja natürlich 😉. Und dVorfreud und Nervosität hät grad nomol en Sprung nach ufe gmacht uf de Skala.
Wie geil (sorry, chas nid anderst sägä 😉), grad ufe, Nase nach füre und ab gahts dur dLuft! Was für es Gfühl!! DCharlotte hät eus souverän gfloge und na dies und jenes über die atemberaubendi Natur vo obe verzehlt! Und da sind dFjorde…grüeni Berge, blaus Wasser wo sich dur die Landschaft windet und sTasmanmeer….hammermässig! Und euses Tägli ebeso, blaue Himmel, keis Wölchli! Zwei Landige sind däbi gsi wo mer händ chöne usstiege und die Rueh und Natur eifach isuge und gnüsse! Gewaltig! Die 1h 45min. sind leider viel zschnell ume gsi, aber sGfühl isch nid zbeschriebe und vo dem wirdi no lang chöne zehre!

Wills no sicher ein schöne Tag gha hät, hämmer beschlosse am nächste Tag grad no de Milford Sound zmache. Mir sind denn am 6 ufgstande und am 7 abgfahre, das mer vor de grosse Reisebüss det sind, sind doch no 120km zum fahre gsi! Wunderschöni Fahrt und faschd ohni Autos. Miteme relativ chline Boot simmer denn am 9.45 Uhr für 2h uf de Milford Sound, Himmel blau, wulcheloos! En Füehrer hät wertvolli Informatione über Flora und Fauna geh, posierendi Seehünd und Wasserfäll. Usem nüt hämmer denn uf eimal i de Wiiti 10-15 chlini Fontäne gseh zum Wasser us cho und de Speaker häts sälber chum chöne glaube….Delphin! Schinbar gsäch mer die all 4 Wuche emal und genau hüt händs euse Wäg krützt! Sie sind churz zum Boot cho, händ hoi gseit und sind wieter! Gewaltig!! Nacher häts no es Glas Gletscherwasser geh vom gröschde Wasserfall. Gfüllt häter die Gläser indem er so extrem nöch an Wasserfall gfahre isch, dass die Gläser gfüllt worde sind! Cool!
Ufem Zruggwäg hämmers echli gmüetlicher gno und sind es paar mal usgstiege zum dFüess vertrampe und Föteli vo dere wunderschöne Naturlandschaft zmache!
Zrugg ufem Campingplatz hämmer es Päärli us Amerika wieder troffe, wo mer es paar Nächt lang immer wieder gseh händ und denn nüme, da sie ad Oschdküschde sind. Isch so lässig und interessant um immer wieder Lüt zgseh und mit ihne Tipps und Informatione usztusche. Bimene Chäsplättli und eme Bierli hämmer das denn au mit de Amis gmacht! Mir händ denn nomol zwei Nächt ufem Campingplatz dezue buecht, zum wäschä, go wandere und eifach zwei fuuli Täg zmache! Morn gahts denn wieter uf Queenstown und denn ab ad Weschdküschde!!

(Föteli chömet hoffentlich no, Internet isch schlecht!)