Vietnam - Ho-Chi-Minh (20.-26.1.18)

Nach dem lange Flug simmer denn wieder in Ho-Chi-Minh acho. Mir händ nid rächt gwüsst was eus erwartet, da mir underwägs vo vielne verschiedene Lüt gwarnt worde sind, dases e Stadt isch wo sehr viel klaut wird, me söll ja kei Kamera mitneh, guet ufs Natel ufpasse, kei Täschä umha etc.! Das hät eus e bitz dVorfreud gno resp. dVerunsicherig erhöht. Daher hämmer emal zwei Nächt im District 1 (Touriste- und Backpackviertel) buecht und sind voller Erwartige los.

Wasi jedoch jetzt scho chan verrate, eusi Erwartige sind übertroffe und dBedenke zum Glück nid bestätigt worde. Es isch e super Stadt und eus häts mega guet gfahle. Es herzigs chlieses subers Hotel mit uh fründliche Lüt direkt am Puls vo Ho-Chi-Minh und doch inere Sitestrass wos ziemlich ruhig gsi isch! Im District 1 mischet sich Touriste und die Iheimische extrem guet und es herrscht e tolli entspannti Atmosphäre. Mir händ eus denn scho mal uf de Wäg gmacht zum öpis Znacht finde. Dstrasse sind breiter als in Hanoi und es isch nid so es gedrucke, wases eifacher macht zum sich bewege.

Mittlerwile isch dMage-Darm-Verstimmig bi de Ilse wäg, sie hät aber am Tag vom Rückflug nach Ho-Chi-Minh en Usschlag am Elleboge übercho! Mir händ nüt wieters däbi dänkt, bises am nächste Tag am ganze Körper gsi isch und extrem bisse hät. So hämmer en Arzt ufgsuecht mit de Diagnose Allergie uf en Virusinfekt. Das hät eusi Plän ghörig über de Huufe gworfe und Zentralvientam hämmer leider müese striche. DMedikament wo dIlse übercho hät, händ das ganze leider nur no schlimmer gmacht, da sie e allergischi Reaktion uf das Medikament gha hät. So simmer ine anderi Klinik wos ihres Bluet nomol durecheckt händ. Glichi Diagnose aber es anders, stärchers Medikament. Nacheme no grössere Schub i dere Nacht, isch es am andere Morge äntli (nach 3 lange Täg!) besser worde und de Usschlag isch um 50% wäg gsi! Langsam isch es immer besser worde und die Medis händ ihren Job guet gmacht! Leider isch aber au so de Plan vom Bsuech im Mekong Delta is Wasser gfahle. De Arzt hät de Ilse is Gwüsse gredet, dass sie zwar use dörf, aber alles sehr ruhig söll agah. Da mir uf eimal statt 1.5 Täg jetzt 5.5 Täg in Ho-Chi-Minh gha händ, isch das au guet gange. Im Hotel hämmer für de glich Pris es grössers Zimmer übercho und händ so au chöne bliebe.

Die nächste Täg hämmer immer schön usgschlafe und denn verschiedensti Sache aglueget! De Märt hät sicher nid dörfe fähle (jetzt wüssemer au wo euses Gäld bliebe isch 😉), dKathedrale, die alti Poschd, sowie sKriegsmuseum. Am erste Abig wo mer in Ho-Chi-Minh sind go esse hämmer e super Ussicht uf e Krützig gha miteme Park und Clubs hinedra. Uf eimal sind 100-ti wän nid no meh Töffs unedra am Huppe und stolz ihri Vietnamfahne am präsentiere gsi. Mir händ denn usegfunde, dass Vietnam, serste Mal i ihrere Gschicht im Halbfinal vom Asia Cup (Fuessball) staht. Es isch sehr idrücklich gsi das ganze Spektakel und mir hetet no lang chöne zue luege! Hànd eus denn im Hotel informiert, wenn das Halbfinale isch und mir händ Glück gha, es isch 3 Täg spöter gsi! A dem Tag simmer denn natürlich im District 1 ine Bar und händ zämä miteme Huufe Vietnamese das Spiel aglueget und mitgfieberet. 120min. sind dure gsi und es staht 2:2 gege Katar. Verlängerig….was für e Spannig! Sie händ sich sehr guet ghalte, nur häts leider nüme wele mitem Goal, für Katar zum Glück aber au nid! So isch es zum Penaltyschüsse cho…ihr chönd eu vorstelle wie das abgange isch i dere Bar und uf de Strass. Jede isch umetanzt und hät gjohlet bi jedem Punkt, resp. wän de Goali eini ghebet hät. Schlussendlich händs mitere riese Portion Glück das Pentalyschüsse gwunne und stönd sallererste Mal im Final vom Asia Cup. Ja, die Nacht isch definitv nid viel gsi mit Schlafe…12h spöter am Morge am 3 sinds immer no am Huppe gsi 😉. Leider hämmer sFinal nüme mitübercho, da mir am Fritig Mittag nach Singapore zrugggfloge sind und sFinalspiel am Samstig morge am 9 stattgfunde hät! Wie mer im Internet usegfunde händ, händs leider verlore!

Vietnam, es unglaublich spannends und schöns Land mit sine Eigeheite und Traditione wo mir nie hetet wele misse. Leider hämmer nid ganz so viel gseh wie planet, aber das wo mer gseh händ, hämmer in volle Züge gnosse. Sehr idrücklichi Erläbnis gha mit Iheimische dur interessanti Gspröch und Bsüech. Eis vo de Highlights isch sicher die Tour mit de Easyriders Binh und Hieu gsi, wo unvergässlich wird bliebe! No 3 Täg Singapore, denn isch euses Abentüür Asie scho verbi und mir ziehnd wieter richtig Neuseeland!! Mir freuet üs unglaublich druf!