Bogota & Medellin

Bogota

D'Houptstadt vo Kolumbie.

Medellin

Auso ds Medellin hei mir wider chli meh erläbt uf üsne Usflüg wo mir gmacht hei. Hie ä chline Usschnitt vo de drü wichtigste:

Escobar

Da mir d'Narcos Serie übere Drogebaron Pablo Escobar uf Netflix hei gseh, hei mir natürläch o ä Tour buechet. Am Morge isch nis de ä Guide für ä Privatfüehrig cho reiche u üs isch dä Kärli scho vo Afang ah spezieu vorcho. Äs het säch usegsteut, dass dä säch guet mit dr Drogämafia in Medellin uskennt. Si Cousin het füre "el Patron" (wie dr Pablo Escobar hie gnennt wird) gschaffet. Är säuber het dr Escobar sogar paar Mau persönläch troffe u mehreri chlini Ufträg für si Cousin erledigt (Charre gfüut mit Kokain, Waffe oder Gäud ir Stadt ume gfahre).

De hani dänkt: Aues frei erfunde zum die Tour chli interessant ds mache...

...Bis zu däm Punkt wo mir ä Kolleg vo ihm hei troffe wo säch aus eine vo de Fahrer vom el Patron usgäh het. Dä het de sis Fotoaubum vüre gno mit Biuder vo ihm und em Escobar und vor Hacienda Napolitana, wo bekannt füre gröscht Drogeumschlagplatz in Südamerika isch gsi.

Spetistens denn hei mir nis afah frage wo mir da si glandet... 

u de ischs no witergange, mit aktuelle Föteli und Video vo Beidne mitem Popeye. Dr Popeye isch die rächti Hand und Uftragskiller vom Escobar gsi und isch nach 23  Jahr Knascht wider uf freiem Fuess. Dä het gäg die 300 Persone säuber umbracht und gäg gie 3000 Morde i Uftrag gäh... Krass, unvorsteubar und beänstigend.

U näbä bi hei mir no "La Monaco" am Escobar sini Residänz, "La Cathedral" sis Gfängnis u dr Ort woner überwäutigt isch worde bsuecht.

Dr ganz Tag isch für üs zimlech sureal gsi, wärdä äuä nid erfahre wie viu vo däm auem gstumme het oder nid. Hei Beididi die nächschti Nacht us Ängscht chum chönne schlafe...

Guatape

Immer no ufgwüuht und unsicher hei mir die nächschti Reis ufnis gno. Si mitem Bös uf Guatape gfahre u hei das chline, farbige Stedtli richtig gnosse. Nach däm vordere Tag isch das grad chli ä Tapetäwächsu gsi. Für üs wider ä wundervoui Umgäbig und ä wunderschöni Stadt.

Comuna 13

Hie schribi gschider nid ds viu drüber was i gläsä und ghört ha... Bis vor paar Jahr isch das ds gfährlächschtä Quartier vor Wäut gsi mit au denä militantä Gruppene wo aues hei bekämpft wo nid i ihrem Sinn isch gsi. Nach em Escobar u de Paramilitärische Einheite si d'Guerillas ad Macht cho. Si hei dä Teil vor Stadt sogar unger ihri Kontrolle bracht. Ds Kolumbianische Militär het während Tage drgägä kämpft bis d'Lüt vom Quartier mit wysse Fahnä und Tücher für Fride gwunke hei... Eine vo de wichtige Eckpfiler vor ir Gschicht vo Medellin. Hüt sis farbigi Graffitis wo ir Comuna 13 a die Ereignis vo früecher erinnere.

Medellin isch ä Stadt mit viu Gägäsätz und vo de Emotione här ä wahnsinns Stadt. Irgendwo blibt aber dä bigschmack vo früehcherige Zyte mitem Drogekartel.