philippines part 2 - bohol, camiguin & siargao

nachere quaue attacke (bimer chli vorcho wie d'daniela ryf) hani mis tägleche riff-swimtraining leider ufgäh. d'verbrönnige si zwar harmlos aber die bissende rötige, quasi am ganze körper, si eher lästig und d'paranoia wieder i eini ine z'swime isch z'gross gsi. anda uf bohol isch trotzdäm mi lieblingsort ufde philippine worde. super schöni stränd, kuuli höhline zum erkunde und mega liebi iheimischi. frücht vom markt zum zmorge und die autägleche obeässe ir eatery mitemne kanadische buddy hei die täg abgrundet.
da meh oder weniger aui vo do witer ufs südöstlech ligende camiguin göi, bini ou dä wäg witer. näbdr fähre hei delfine die eh scho schöni überfahrt sehr speziell gmacht und üs e tolli show botte. werum as die günstigste ungerkünft zum teil so top lage hei und absolut geniau si verstohni nid, aber i finges sensationell. mit boot, roller und toucherbrüue erkundemer die überschaubari no mässig touristischi insle. mir probiere üs so guet wies geit ungers vouk z'mische, aber jo mi faut hout glich uf, vor auem weme kei ahnig het wie z'wette bim sehr traditionelle güggukampf (womer nach eire rundi wieder verloh hei). so lehremer wieder paar kuuli sache und müesse üs gäg jedi verkupplig mit töchtere, nichte und cousine wehre. d'frog isch nie ob e fründin oder frou hesch, sondern ob e filipinischi fründin oder frou hesch - luschtigi das. guet a dere stöu muessi ehrlecherwis zuegäh, ases schwirig isch mit de härzige filipinas nid z'flirte, die himmle eim so ah. ok gnue zu däm thema. witer geits uf mire reis.
nachere lange aber gäbige route mit 3 büs und 2 fähre chumi zu mire letschte destination, siargao. sehr vüu schwärme vo däm surfermekka und nur einzelni rotemer dervo ab. schnäu fingi use wisomer e wäutebummler kolleg gseit het "du mit dire reiseart wirsch eher enttüscht si". in general luna wome normalerwis stationiert isch wimmlets vo touris, es isch aues dopplet so tür wie süsch und irgendwie hei d'locals scho chli gnue vo üs. da ig aber eh scho überzügt bi vode d'philippine und primär eifach no dr summer wot gniesse, chani über das hinwägluege und loufe e wuche nur barfuess und mit badhose ume. zum wäue- & kitesurfe isches de wük e gueti adrässe (nid asis gross gmacht hätt, aber mi gsehts) wüu die östlechi site am offnige meer isch. ou stränd hets paar schöni und mitem roller chame 2-3 kuuli usflüg ungernäh. dank empfählig fingi de sogar no es richtig guets & extrem günstigs hostel für siargao. für 5.- pro nacht es bequems bett mit moskitonetz imne 6er zimmer, es gratis tüechli, suberi badzimmer, gratis wasserspänder, chilligi terasse und super nätts personau - do fröit sech jede budgetorientiert backpacker. footprints homestay wär dr name.
nachdämimi e monet lang gwehrt ha gägs umeflüge vo insle zu insle, gönnimer dä luxus und packe mini sache für richtig manila. dr taifun wo z'mitzt dür aues dürezieht vermassletmer fasch mini optimali planig, aber guet hani e äxtratag igrächnet für sone fau und mit glück (woni jo bekanntlech immer mou wieder ha) schaffis de glich rächtzitig i die unbeliebti metropole woni kei stung zit ha zum aluege. mi nöchst flug wartet.
wasi jetzt mache gloubtme chum und isch so no nie i mim läbe vorcho. ig aus anerkennende summerliebhaber go freiwillig i winter. vancouver island hetmer extrem guet gfaue im summer und i wett ide nöchste ca. 3 mönet usefinge obi s'gliche empfinde bi räge & chöuti.

ändfazit vo mir:
- i liebe d'philippine immer no! :)
- super backpacker land, kuuli und härzlechi lüt, eifach und relativ günstig (git sicher günstigeri südostasieländer) zum umereise.
- s'kulturelle erbe isch eher längwilig da d'spanier über 3 johrhundert mitem katholizismus aues ursprüngleche vernichtet hei. die spöteri amerikanischi bsetzig het sicher ou nid gad ghoufe.
- s'meer isch a sehr vüune orte üsserst troumhaft und drum gloubi chunnts gar nid so fest drufa weli insle asme bereist. mi tipp, lieber uf paar wenigi beschränke.
- gsetz gits zwar vüu, aber meistens wärde die nid wük umgsetzt, usser evt gäge touriste. z.b. rouche uf öffentliche plätz, höumpflicht oder fürverbot.
- faus nöii fründe wotsch, muesch nur paar wörter mit locals wächsle und scho bisch familie. aber aufgepasst, es cha de ou ufdringlech wärde - bsungers aus frou. ha d'höufti vo mine bekanntschafte scho wieder glöscht/blockiert.
- sport #1 isch definitiv basketbau, si liebe di wenn mou mitspüusch.
- nid verschrecke abem klische vom unattraktiv 60 jährige western ma miter junge hübsche filipina - gits zu haufen. mi chasech drüber stritte wie fest ases wük e win-win situation isch oder nur zwäcksmässig wägem business.
- s'wildlife wo ufem land eher bescheide isch, isch derfür im meer umso zauhricher. guet intakti koralleriff sei dank.
- filipinos liebe s'karaokesinge, insbesondere (oder eich nur) schnulzigi lieder. egau wie guet ases tönt, es wird öffentlech zelebriert.
- i cha d'philippine aune empfähle und i wirde gärn wieder cho:) salamat!

-----english part-----

my conclusion:
- I still love the Philippines:)
- it's an awesome backpacker country, cool people, easy and realtive cheap (there are cheaper South East Asia countries) to travel around.
- the cultural heritage is kinda boring bc the catholic Spanish people destroyed more or less everything during their three centuries of colonialism. the American occupation later on also didn't help.
- the ocean is absolutely gorgeous in many places, so I don't think it really matters where u go. my tip; limit to a few islands.
- laws excist but most likely only used against tourists. e.g. smoking in public places, wear a helmet or the fire ban.
- are u in need of new friends, just exchange some words and u're part of the family. but be careful, it can become intrusive - especially as a woman. I already deleted/blocked half of them again.
- basketball is def sports #1, they love u when u shoot some hoops with them.
- don't be shocked about the cliche from the unattractive 60 years old western guy with the young beautiful filipina - there are many of them. hard to tell if it's actually a win-win situation or just because of the business. most of the time I feel bad for the girls.
- the wildlife on land is pretty lame but the one in the water is spectacular - thanks god for intact coral reefs.
- the filipinos love karaoke, in particular (or maybe only) cheesy songs. doesn't matter how good u're, they celebrate it so badly.
- I can recommend the Philippines to u all. I'll be back :) salamat!