konichiwa japan - arigato gozaimasu

voller vorfröid und neugier uf nöis isches am 7. okt wieder losgange. mit im gepäck fürne monet isch s'mimi und wär üsi gmeinsami reisegschicht könnt stuhnt äuä nid schlächt, s'erste ziu isch japan. nach liecht erhöhtem puls simer de dasmou zäme ohni problem dür d'immigration cho. auf gehts.

die erste paar täg verbringemer in tokio womer üs a die frömdi & lustigi, aber sehr gordneti kultur gwöhne. mit subway und z'fuess erkundemer die versch. shrines, tämple, viertle und strosse/märkt. die nid vorhandene änglisch kenntnis chöi scho ab und zue chli usevordernd si wenns umne uskunft geit, aber ou sehr amüsant weme d'menücharte nid versteit und eifach so chli nach schönheit vode zeiche oder mitere extrem schlächte google übersetzig was bstöut. e bsuech vom samuraimuseum, vom metropolitan tower uf d'skyline abespähe, luege wie langmes ire spüuhaue ushautet (brutau lut), im shinjuku quartier s'tribe beobachte oder e karaoke session, si aues sache wome i dere 14 millione metropole cha mache.

mitem japan rail pass (tür aber lohnenswärt), wome im ganze land gratis zugbenützig het, geits richtig mount fuji. japans ushängeschüud schlächthi. so im summer, ouso eich herbst, aber mir hei die ganz zit um die 25° und fasch immer churzi hose an, isch dr inaktiv vulkan (fuji 3'776m) leider nüm mit schnee bedeckt und so isch dr ahblick zwar schön, aber nid ganz so postcharte würdig. meh aus bis zur 7. station (dr peak wär die 10.) chömemer leider nid wägem schlächte wätter wo im amarsch isch und drum erkundemer s'tolle gebiet im 5-lakes-district ume bärg. das schlächte wätter erwist sech aus schlechter aus agnoh und so erläbemer dr für japan schlimmst taifun sit 60 johr. abgseh vo 1,5 täg krassem räge & wind heimer glück und üses gebiet isch nid starch betroffe. mir überbrücke die zit im hostel in kawaguchi mit ässe, spile, plane und füume luege (siehe foto).

dr wäg uf kyoto heisi schnäu vode sturmschäde befreit und so simer i 2,5h (dr shinkansen fahrt 320km/h - im verglich dr icn ir schwiz 200km/h) ir kulturelle houptstadt acho. es git so vüu zgseh und wöume mitem velo am flexibliste isch, mietemer 3 täg eis - höchst empfählenswärt. in arashiyama chame guet chli umeloufe mit tolle ussichte, es het e kuule bambuswaud und e hügu wome die bekannte schneeaffe gseht. uf dr angere site vor stadt, in inari, wanderet meh stundelang dür die instagram-bekannte orange torii (+10'000 stück) und versuecht s'perfekte foti z'mache. dr nishiki markt isch super zum düreschländere und ständ beguetachte und weme hunger het die kulinarische spezialitäte (primär seafood) uszprobiere. vom daimonji yama hügu hetme e witi sicht über d'stadt und e wüukommeni rueh. derzwüsche hets zauhrichi tämple, lohnenswärti chlini gässli und super guet pflegti pärk.

mir hei üs entschlosse asmer immer lieber 3-4 nächt a eim ort si und vo dört us usflüg mache, wöu das ständige packe vom rucksack nid spass macht. vo osaka us heimer de fougendi orte bsuecht; kobe, isch nid sonderlech speziell, aber e chlini chinatown, e guete usblick vom "herb garden" und am obe dr belüchtet hafe si glich nice. nara, bekannt wäg de hunderte freiloufende rehs und dr grosse buddhastatue. hiroshima, vor auem natürlech gschichtlech sehr interessant, am 6. aug 1945 um 8:15 isch dört die ersti atombombe abe und het mit fougeschäde ca. 140'000 todesopfer gforderet, s'peace memorial park museum isch def ein muss. aber ou dr chli härzig garte "shukkeien" und d'insle miyajiama mitere schöne fähreüberfahrt würemer wiedermache. osaka säuber isch vor auem wägem viertu um d'dotonbori ume bekannt und das hets würklech in sech. so verrückt, grell und lut, es ultimativs japan grossstadterläbnis. wemes chli gemächlecher wot ago, gits no s'schloss wo imposant im stadtbüud ligt oder mi fahrt chli usdr stadt und louft paar km im hoshida park. dört simer ou no vomne pensionierte änglischlehrer zumne glace im hus iglade worde.

de geits ou scho langsam wieder retour nach tokio. d'nacht imne kapslehostel isch sicher e kuuli erfahrig, aber nid unbedingt das womer jedi nacht müesste ha. "all you can eat" isch zwar lustig währendem bstöue weme gar nüt verstoht, aber bim aschliessende ässe und nachträgleche buchweh nid unbedingt wiederholigsbedürftig und drum blibemer doch lieber bi nudle (soba, udon, ramen), dumplings oder risgricht wie sushi.
e witere tagesusflug nach nikkon isch ok aus lückefüuer aber nid zwingend notwändig, glichfaus mitem bsuech im liecht-illusione museum in tokio.

fazit über japan;
- es isch aues sehr genau greglet, dh flexibilität isch eher chli, derfür funktioniert s'system. im verhaute nid uffaue und de wirdme chum beachtet (sogar mir aus touris), nidemou weme sech ganz ganz speziell aleit.
- s'klische vom comicsläsende, prüde, chindleche, ständig gamende und sehr korrekte japaner wosech die ganz zit verböigt isch wohr.
- öpis vom beste isch definitiv eifach häresitze und am vouk zueluege. macht no meh spass weme guet isch im "nid bös gmeintem" kritisiere - gäu mimi.
- rouche isch immer no e grossi tradition bide mehrheitlech männleche iheimische (i de meiste restis und natürlech bars wird groucht), obwouh ufde strosse und öffentl. plätz isches verbotte. das isch für mi eich dr einzig negativ punkt über s'4. gsündischte land.
- fausch es git no öpis angers. plastik, plastik und no meh plastik. jedi banane isch nomou ipackt, was immer wosch choufe isch dopplet verpackt und dr inhaut isch säute vüu. und es isch extrem schwär drumume zcho.
- dr boygroup-typ isch extrem in, möglechst babyhafts gsicht und jedi männlechkeit verlore - ouso bini mit bart absolut out.
- s'höche prisniveau isch grächtfertigt mit super infrastruktur wie zb öffentl. toilette, trinkwasser, öv, velofründlechkeit und top unterkünft.
- fun fact; küderchüble si schwirig zum finge. uf grund vomne terroraschlag im 1995 heisi die aui mou entfärnt und tüe ersch jetzt langsam wieder ufboue.
- e reis im herbst macht sicher sinn, es isch nachwievor super agnähm wom wätter här, nüm houptsaison und trotzdäm no aues offe.
- somit chöi mir aune wo e prise asie wei erläbe und doch nid uf komfort wei verzichte, japan wermstens empfähle. 2 wuche würe gloubs länge. nid vergässe vüu z'nicke und mhhh & hhhaai säge :)

conclusion Japan;
- everything is perfectly organised, that means flexibility is little but at least their system works well. doesn't matter how weird u walk around, when u behave people don't look at u - even as strangers.
- the cliche from the comics reading, prude, childish, permanent gaming and exceptional correct japanese people who bows all the time is totally true.
- one of the best thing is definitely just to sit down and observe the humans. it's such a funny crowd. thanks god I had my good friend Mimi from home with me.
- smoking is still a huge tradition, especially for Japanese men and sadly in most of the nice traditional restaurants (and bars of course). thanks god in the bigger cities on the roads and public places it's forbidden. probably my only negative point about the 4th healthiest country in the world.
- oh wait there's something else. plastic, plastic and plastic again. everywhere u look it's double wrapped in plastic, eg bananas or apples. it's so hard not to consume plastic.
- the boy group type of man is totally in, men with a baby face and no signs of masculinity anymore - I with a beard, absolutely out.
- the hight price level is justified with super infrastructure like public toilets around every corner, potable water, public transfer and perfect accomodation.
- fun fact: trash cans (like coin lockers in NYC) are hard to find bc of a terror act which was held in 1995. they slowly install new ones again.
- if u visit Japan, fall is def a good time to go. it's still unbelieveable nice weather, not peak season anymore but still everything is open.
- do u wanna take an insight of Asia without a loss of comfort, Japan is highly recommended. two weeks are enough to see what u need to. don't forget to bow a lot and always mumble words like mhhh & hhai :)