Das Reise do in Costa Rica isch nid so eifach wie a andere Ort. Meistens muesch für e kurzi Strecki wot normalerwis nur 1-2 h hetsch schnell emol 5-6 h. Sie nemet jede mit wo am Strosserand stoht, au wens innerhalb vo 150 Meter öppe 3 mol müend ahalte. Klimaalag isch meistens au en Wunschtraum. Mir hend eus uf de Weg zum Nationalpark Manuel Antonio gmacht.
Ganz viel Tier, en schöne Dschungel und traumhafti Stränd erwartet eus. D Muriel isch vor paar Jahr schomol do gsi. Üses Hostel isch es Träumli gsi. E riese Alag.
Die sogenannte Dorms sind alles wisi Hüsli gsi mit je 4-5 Kajüte Bett dine inklusive Klimaalag, yesss.. Es isch nämli bis zu 38 Grad heiss gsi. Mir hend denn denkt so schnell wie möglich in Pool, de isch leider fast wärmer gsi wie d Luft.
S‘Esse isch also guet gsi.
Am Tag druf hend mir am Abig den scho die erst Tour im Park buechet. Mir sind am 18:00 am Abig abgholt worde und sind den ufd Nachttour. Mit Taschelampe usgrüstet sind mir den durch de Dschungel gloffe mit eusem Guide, em Rudolf. Typische Spanische Name. 70 % vo dene Bewohner im Dschungel sind Nachtaktiv und darum gseht me ide Nacht mit es bizeli Glück meh Tier wie am Tag.
Es het ganz viel Frösch ghaAu Spinne sind nid z kurz cho...Und au anderi Tierli..... Wenn me mit Ultraviolett uf en Scorpion zündet, findet me ihn sofort. Das isch NÖD bearbeitet.Costa Rica isch eis vo de einzige Länder wo de Dschungel am wachse und nid am schrumpfe isch. 25 % vo de Landesflächi sind gschützti Zonene. Sie hend au 5 % vo de Tiergattige vo de ganze Welt, das isch sehr viel, weme ad Grössi denkt. Sie hebet ihrem Land au zimlich Sorg, das hend mir schnell gmerkt. Im Gegesatz zu anderne Länder lieht echt wenig Abfall ume. Zruck zu de Nachttour. Eusen Guide het ganz viel Tier gse und het eus sehr viel spannendi Infos geh. Unteranderem verschidensti Frösch, Spinne, Eidechse, Leguane, Insekte und Pflanze. Die berüehmte Fuultier hend mir jedoch nonig gse. Die sind weder nacht- no tagesaktiv. Die pennet nämlich 6 Täg lang und chemet 1 Tag in dr Wuche abe zum ihres Gschäft z errichte. Dete isch den s Riskio au sehr hoch das sterbet wills nid vor de Feind chönd flüchte. Wills halt eifach extreeeeem langsam und verpennt sind. Wie die einte Lüt am Morge früeh…… *Name der Redaktion bekannt. In eusere 6er Gruppe sind na Mutter und Sohn vo Italie debi gsi. Er isch über jede 5i Stei gstolperet, egal obs gradus gange isch. Sie isch den au no 2 mol s Port ab gheit und het alli Tier im Umkreis vo 500 Meter verschücht. Nonie hend mir so tollpatschigi Lüt gseh. Aber mir hend sehr viel Sache gseh und sind echt z friede gsi.
Am Tag druf hend mir e Tagestour buechet gha im Manuel Antonio Nationalpark.
Wo mir denn ufgstande sind ischs de Muriel leider nid guet gange und sie het sich entschiede zum im Bett z bliebe. Mr hend denn die Tour 1 Tag verschobe und ich bin halt ellei in Park zum uf eigeni Fust ume z laufe. Es sind insgesamt über 50 Km Weg wo me chan zrucklegge. Ich ha bereits am Igang en coole Schwizer kenneglernt wo für 2 Wuche ide Ferie gsi isch. Mir sind denn schlussendlich de ganz Tag zemme dur de Park zoge. Mir hend 8 Fuultier gseh, Brüllaffe und Pipilangstrumpfäffli, Waschbäre, verschidensti Vögel u.a Tucans, Reh ect.
Das alles ohni en Guide.
Noch eme kurze Schwumm i dere Lagoone sind mir denn langsam wieder retour.
De Muriel isch es scho biz besser gange und mir sind den zemme go z Nacht esse.
Die Ussicht hend mir dörfe gnüsse im Flugzügrestaurant.
Irgendwie het de glaubs nid do sölle lande. Bösi Zunge behauptet er segi abgstürtzt vor vielne Johre wo do no kei Restaurant gsi isch. Am nöchste Morge ischs denn gange und mir sind uf die Tour. Leider sind mir 16 Persone gsi und nur 1 Guide. Das isch en zimliche Seich gsi. Er het halt nur 1 Fernrohr gha und jede het wele dureluege. Wennd den so egoistischi Lüt hesch wie mir gha hend den wennds zerst no es Föteli durs Fernrohr mache, erst denn dörfet die andere luege. Wend Glück hesch isch bis denn s Viech devo. Jänu, mir hend aber glich na 2-3 cooli Perspektivene vo de Tierli dur das Fernrohr gse.
Und entlich au das Fuultier. Mir sind denn no bizeli am Strand gsi und sind nachher wieder zruck is Hostel.
Euses Ziel isch Monteverde gsi. En andere Nationalpark ih de Berge vo Costa Rica. Vom tropische Dschungel in eher kältere Nebelurwald. Da mir aber vollkomme falschi Bus Informatione vom Hostel becho hend sind mir im nöchste Dörfli wo de Busbahnhof gsi isch gstande und hend kein Verbidnigsbus meh gha. Jo, noch hin und her und verschiedeni Shuttles froge, hend mir eus denn entschiede das mir eusi Plän umkehret und halt zerst uf San José gönd. Dete wänd mir uf en Vulkan und uf e Hunderesidenz goh. Mir sind also in Bus nach San José igstige.
