Veröffentlicht: 29.03.2018
Santa Teresa
Mir sind in San José acho und sind nid sicher gsi ob mir 1 Nacht dete müend verbringe oder direk uf Santa Teresa chönd. De letzt Bus isch nämlich am 14:00 gfahre. Mir sind denn am 13:35 in SJ acho. Es isch jedoch de falsch Terminal gsi. Zum laufe hets nüme glanget. De Taxifahrer het das natürlich gschmöckt und het es denn biz en z türe Pris gseit. Nid unglaublich tür aber halt so dass me sich es bizeli nervt. Da mir blöderwis s Hostel in Santa Teresa scho buechet hend (mir hend do nid gwüsst dass de letzt Bus am 14:00 goht) hend mir kei anderi Wahl gha. De Taxifahrer het den gseit "oouu da wird knapp". Denn het er chli überleit und gseit "mol da schaffemer". Ich glaub er het jede Streckerekort broche. Gfahre wie vo 20 Polizeiautos verfolgt het er eus den endlich am Terminal use glo. Mir sind zum Ticketschalter grennt und aschlüssend zum Bus. De Bus het scho de Retourgang dine gha. Gad no verwütscht. Mir sind den namal 5-6 h unterwegs gsi. Unteranderem 1 h mit ere Fähre über s Meer da es e Halbinsle isch.
Die letzt Stund sinds denn nurno Schotterströssli gsi mit 7 Millione Schlaglöcher. Mir hends denn aber endlich gschafft. Es cools Hostel direkt am Strand.
Das ganze Dorf isch 4 Km lang, 1 Hauptstross und alles isch a dere Hauptstross baue. Gegeüber vo de Stross chunt den ca 200 Meter Dschungel und denn s Meer.
Es het ganz viel cooli Restaurants und Bars. Mir sind den zum Nochbur go argentinisches Steak go esse. Euses Ziel in Santa Teresa isch gsi so schnell wie möglich Surfe lerne. Und das hend mit am Tag druff den au gmacht. Mir sind im Hostel abgholt worde und richtig Playa Hermosa. Dete hend mir denn zerst Trockeunterricht becho. Noch em ufwärme sind mir denn is Wasser. Wer stoht als ersts vo dene 6 Schüeler!? Das isch d Frog gsi. Ich bi den zimlich schnell dricho und han bald mini erst Welle gstande.
D Muriel het am Ahfang me müeh gha.
Isch jedoch für mich biz eifacher gsi da ich Snowboarde. Mer sind nur sowit dusse gsi, dass me au het chöne stoh. Mir hend denn nur müese ufs Brett ligge und de Surflehrer het eus denn en Schupf geh wo d Welle cho isch und im richtige Augeblick "ufstoh" gruefe. Nach 30 Minute bin ich glichzitig mit de Muriel uf e Welle am warte gsi. De Lehrer het den gseit "Lets do a romatic wave". Erst wo d Muriel und ich uf de gliche Welle gsi sind het sie s erstmol chöne ufstoh. Mir sind halt wortwörtlich uf einere Wellelängi, jo de isch guet gsi.
Am Abig hend mir nach de letzte Sunnestrahle
Beerpong und namal es Trinkspieli gmacht mit em Rest vom Hostel. Aschlüssend sind mir alli zunere Party am Strand gange mit eme riese Lagerfür.
Am Tag druf hend mir 1 Surfbrett gmietet und sind uf eigni Fust go lerne Surfe. Es isch gar nid eifach. Me mues wüsse wele Strand um weli Zit die beste Welle für Afänger het. Au beachte mues me d Ebbe und Fluet. Jo mir hends denn probiert.
D Muriel hetz vo Ahfang a super gmacht. Bi mir hets jedoch nid welle klappe. Schlussendlich han ich s kurze Surfbrett retour brocht und han es langs gholt und ufsmol ischs wie am Schnürli gloffe. Ich ha ei Welle nach de andere verwütscht. Es git bi de Surfbrett nämlich "Shortboards", die kurze und "Longboards", die längere. Ich bi definitiv gmacht für die lange. Das isch jedoch nid Körpergrössi abhängig sondern vom Surfstyle her. Am Abig sind mir denn no an em Surfcontest go luege wie me de Sport richtig macht.
Next Stopp: Manuel Antonio
Bis bald
Ernesto y Muriel