Nach Santa Marta hend mir uf Panama welle. Entweder me nimmt es Flugzüg, me seglet über s'offne Meer oder die letzt Variante, me fahrt an en chline Hafe und hofft dass es irgend es Taxiboot het wo eim mitnimmt. Bi de letzte Variante chan eifach niemert sege, obs es Taxi het oder nid. Kolumbie isch mit Panama nämlich nid mit ere Stross verbunde, da es bim Verbindigspunkt es grosses Sumpfgebiet git. Es gäbt e Möglichkeit zum mit Autos und Taxi und Büs goh, jedoch bestoht den s Risiko das me spurlos verschwindet durch die kommunistischi Mafia/Gang "Guarillias". Mir hend den üsne Müettere z'lieb die Variante mit em Flüger usgwählt. Mir sind den mit eme Shuttle direkt an Flughafe brocht worde. Dete acho hend mir eigentlich welle ihchecke. Die Frau am Schalter het eus den gfroget ob mir au en Flug us Panama heget. Mir hend ihre welle erkläre dass mir mit em Bus wänd witerreise. Das het sie jedoch nid würklich intressiert. "Ihr bruchet es Flugticket use oder ihr chönd nid ihchecke". Mir hend ihre den versicheret das mir nid wänd in Panama blibe und das mir bereits en Flug vo Havana nach Zürich hend, aber au da isch ihre glich gsi. Jo, mir hend es Problem gha. Ich ha dem am Marco (en guete Kolleg) aglüte und er het glachet und gseit das er genau sgliche Problem dazumals mit minere Schwöster, de Simone gha het. Er het mir nur gseit "muesch en Krumme finde wo eu es falsches Flugticket verkauft!". Also sind mir ufd Suechi gange noch eme "Krumme". Wie gseht en Krumme us? Mir hend den Poliziste, Securitas ect. gfroget ob sie wer kennet wo Tickets verkauft. Mir hend den au eine gfunde. De Spinner het jedoch 200 $ pro Ticket welle. Ich han ihm den gseit das es richtigs Ticket aber nur 150 $ kostet. "Denn chan ich eu nid helfe". Mir sind scho langsam biz nervös worde will d‘Abflugsziit immer nöcher cho isch. Mir hend den chlini Büros gseh, so chli das chum en Bürostuehl dri passt het. Mir hend e sympathischi Lady gfroget ob sie eus evt helfe chan. Sie het glachet und hinder sich Türe zue gmacht. Mir hend den bi ihre für je 50 Dollar es "ungültigs" Ticket kauft, dass het sie den am nöchste Tag wieder storniert.
(Für die wo s gliche Problem werdet ha) Die am Schalter und i de panamesische Migration sind zfriede gsi. Dummi Cheibe so e Regelig go mache. Egal, mir sind den in Panama würklich acho. Es het usgseh wie in Zürich am Flughafe. Alles modern und suber. Ersti Gfühl vo dehai sind ufcho. Mir hend uf em Weg zum Bus e Frau kenneglernt wo au id Stadt will. Mir hend gfroget ob mir es Taxi söllet teile. Mir hend denn mit zwei lustige Taxifahrer de Pris usghandlet. Es isch eini vo de lustigste Taxifahrte gsi wo mir erlebt hend. Beidi um die 60 Johr jung. Sie hend denn e halbi Stadtrundfahrt gmacht und eus alles chli erklärt. Die meist Zit hens jedoch mit enand gstrite und enand fertig gmacht wer Recht het und wo das was isch. Sehr amüsant gsi. Mir hend denn es riesigs Hostel gha. Wo mir ad Lobby gloffe sind hend mir per Zuefall genau euse Capitän vom Segelschiff und sini Frau troffe. Ich han ihn kennt well ich zuvor mit ihm gschribe ha und Bilder gse ha. Sie sind uf de Suechi noch me Lüt gsi und am ihkaufe für euse Segeltörn.
Ih eusem Hostelzimmer hend mir e wahnsinns Ussicht ufs Skyline vo Panama City & s Meer gha. Vorallem bi Nacht isch es sehr idrücklich gsi.
Mir hend ide Stadt jedoch nur 2 Nächt gha bevor mit den richtig Karibikküste sind. Mir hend die Zit meh oder weniger mit entspanne verbrocht und chli die Stadt azluege. Die Altstadt isch echt herzig gsi.
Mir sind den am einte Tag nach Portobello gfahre. Mir hend det e Nacht verbrocht bevor mir eusen 6 Tages Segeltripp gstartet hend. Mir hend sehr fein gesse und de letzt Obig/Nacht uf em Land gnosse. Am Morge früeh ischs denn los gange. De Segeltripp isch um die berüehme San Blas Inslene gange. Das sind 365 Inslene, zum Teil chli und unbewohnt und anderi sind grösser und es lebet meheri Familie det druf. Mir sind mit eme Schluchböötli abgholt worde vom verrückte Fritz. En 65 jöhrige Überlebenskünstler vo Wien. Mir sind jewils am Abig alli zemme am Esstisch ghocket und de Grosspapi het den Gschichtli vo frühener verzellt. De Ma het scho viel erlebt und es isch spannend gsi zum zuelose. Jede het halt selber müese abwäge was de Wohrheit entspricht und was nöd, haha. Das wer de Fritz vor eusem Lobsterdinner. Chum uf em Boot gsi han ich scho müese mitapacke. Mir hend müese en 160 Kilo schwäre Töff ufs Boot bringe. Zum Glück het es Segelboot ganz viel "Seilwindene" und "Fläschezüg". Befestiget hend mir en mit 2-3 Seili. Mir sind e cooli Truppe gsi. 2 Dütschi jungi Mädels, en Amerikaner wo vo Los Angeles bis nach Ushuaia mit em Töff fahrt und 2 hessigi & ewig nörgelndi Bünzlischwizerfraue, so jetzt ischs dusse!!!! D Crew wer de Fritz gsi & sini Frau (gseht me imObere Bild) und en Koch, de Jose.Mir hend en Catamaran gha.Und natürlich sind mir am Tag wenns gnueg Wind gha het gseglet. Es het gnüegend Platz gha. Mir sind los gseglet und es het vo Ahfang a gad ordentlich Wellegang gha. De meiste isch schlecht worde. Ich bi abe id Kabine und ha mich für 2 h ufs Ohr ghaue. Nach dene 2 h han ich mich wie neu gebore gfühlt und mir ischs bis am Ende vo dere Reis nüme schlecht worde. Jo zum de ganz Segeltripp z beschriebe ischs eigentlich echli z langwilig. Mir hend einigi cooli Sache gmacht wie zum Bispiel sind mir go Lobster tauche. De Fritz und ich sind mit de Harpune bewaffnet loszoge und sind für eusi Fraue go jage. Wie früener wo d Manne loszoge sind zum de Fraue s Esse z bringe. Tatsächlich sind mir mit Lobster retour cho. Mir hend jedoch no 2-3 müese bim Fischer poste das für all glanget het. Am Abig hend mir quasi es Lobster-Allyoucaneat-Dinner gha. Es isch sehr fein gsi. Unteranderem hend mir au Delfin gseh wo mit eus mitgschwumme sind und vor luter Lebensfreud saltos & alles gmacht hend. Cool isch au gsi das mir es riese Netz voll mit Frücht gha hend. Allgemein hend mir sehr guet gesse, immer viel z viel. Jedoch hend mir eidütig z wenig Zit uf de Insle chöne verbringe. Mir sind meistens vom 10:00 bis am 16:00 am Abig unterwegs gsi und hend de verbliebene Zit chöne schnorchle oder bade. Das isch jedoch sehr schön gsiGanz grossi Seesterne hets au gha.Und au verlasseni Hüser vo de einte Bewohner hend mir gfunde.
Aber alles in allem hends mir eus es biz anderst vorgestellt. Mir hend jedoch scho soviel erlebt dass es langsam schwierig wird alles z toppe. Jo noch dene 6 Täg sind mir wieder zruck in Portobello gsi und hend eus uf de Weg nach Panama-City gmacht mit dene unglaublich unbequem Chickenbüs.
In Panama City acho hend mir nid gnau gwüsst was mache. Entweder ad Karibikküste vo Panama & Costa Rica oder direkt ad Pazifikküste vo Costa Rica. Da aber s Wetter zimlich wechselhaft und eher schlechter a de Karibikküste gsi isch sind mir denn ad Pazifikküste am nächste Tag. Mir hend 1 Nacht in Panama City verbrocht. Das Hostel werdemer so schnell nüme vergesse. Es isch es Huus gsi. Wo mir iegloffe sind hend eus alli biz komisch aglueget. Kei Wunder, mir sind ines Hippie Hostel grote. Alli barfuess, Rastas, komisch verfilzti Hoor und sehr viel Körperbehoorig. Und ich wür mol behaupte, dass die meiste scho die eint oder ander Droge probiert hend. Aber die Nacht isch au ume gange. Mir sind den gege de Nomittag am nächste Tag an Terminal und sind im grösste Shoppingcenter vo Panama chli go umestriehle. Am 24:00 isch den euse Bus nach San José gange. Alles andere chönd ihr im nöchste Blog lese.
