Vo San José ischs am Morge am 6:00 los gange. Mit eme Bus wo bi eus en normale Stadtbus wer, sind mir richtig Monteverde gfahre.
Zum guete Glück müend mir in Costa Rica kei Langstreckene mit em Bus zrucklege. Die Büs hend bis jetzt die am wenigste gueti Usstattig in ganz Südamerika. Sie sind zwar relativ neu hend jedoch weder Klimaalag (in dem Land wers aber dringend nötig) noch Beifreiheit, da isch für alli wo grösser we 1.40m sind recht müehsam. Die Fahrt isch 3 1/2 h gange. Nach guet 2 h isch denn fertig Asphalt gsi. Mir sind en Berg duruf gfahre, Schotterstross und komplett verlöcheret.
Jop, das isch d „Stross“ gsi.
Da alli d Schiebe offe gha hend, het sichs agfühl wie ame staubige Motocross Renne. Im Dorf Monteverde hetz denn aber wieder asphaltierti Strosse gha. Es isch kurz vor Mittag gsi wo mir acho sind.
Mir hend nid gnau gwüsst was mache. Mir hend eus den für die gratis Aktivitäte entschiede. Es het en Ussichtspunkt gha uf 1900 MüM. De hend mir denn agstüret. Nach ere Ewigkeit sind mir fängs ide hälfti gsi. Mir sind die ganz Zit de Hauptstross nogloffe. In dr Hälfti hend mir müese uf de Kieswegs wechsle und es isch grausam duruf gange.
Nach 5 Minute isch jedoch en Jeep a eus verbi gfahre und het di falsch Abzwigig gno. Ich ha ihm den pfiffe und gseit dass de Weg falsch segi. Es isch denn es dütsches Päärli gsi. Sie hend eus den gfroget ob mir wänd mitfahre. D Muriel het fest ghofft dass ich jo sege. Han ich denn au gmacht, schön isch jo de Weg eigentlich nid gsi. Gottseidank, mir sind mit em 4x4 chum duruf cho. Im Schritttempo (jedoch schneller als wenn mir gloffe während) ischs duruf gange. Ich ha dem junge Dütsche denn paar mol gseit „falls denn hinderschi rutschisch, do chasch denn aneziele zum retour ie parkiere“. Mir hends jedoch gschafft. Me het echt e cooli Ussicht gha. Uf de einte Site het me bis ufs Meer gse und uf de andere Site de Vulkan „Arenal“.
Isch jedoch froglich ob sich die Wanderig z Fuess würklich glohnt het, mit em Auto ischs guet gsi. De Abewäg sind mir denn aber z Fuess. 3-4 mol hend mir uf Lüt troffe wo am uelaufe gsi sind. „Isch es no wit? Wirds no strenger?“ neiii neii hend mir gseit, hehe.
Am nächste Tag sind mir am Morge früeh richtig Park. De Bus hend mir natürlich verpasst, es isch 7:32 gsi. Zwei Minute z spot und de Bus isch weg. Untypisch für Süd - Zentralamerika. Jedoch guet zum sich wieder dra gwöhne, dass die Büs en Fahrplan hend. Isch bis jetzt nämlich meistens nid de Fall gsi. Es fahrt eine wenn eine fahrt. Natürlich hend mir denn en übertürete Shuttle müese neh. In dem Park isch das Highlight de Vogel „Quetzal“. Das isch de Göttervogel vo de Mayas gsi. Mir sind in Park ie und hend de Vogel nach nidmol 5 Minute gse.
Anderi laufet de ganz Tag ume und gsehnd en nöd.
Lueget mol uf die ewig lang Schwanzfedere.Ich han no nie so en mayestätische Vogel gseh we de.
Mir sind denn witer zoge. Es sind cooli Trails durch de „Cloud-Forest“ gsi.
Die andere Tier hend sich aber nid so welle zeige. Mir hend no ganz viel anderi Vögel, Insekte ect gseh.
Ich bin aber nonig z friede gsi. Ich ha no welle en Nasebär und en Tucan gseh. Uf em Weg hets no die Hängebruck gha.
Mir sind au no zum Ussichtspunkt am End vom Park.
Nach 3-4 h hend mir jedoch gnueg gha und sind use. Halt ohni Nasebär und ohni Tucan. Chum bim Usgang gsi rennt eus en Nasebär vorne dure. Me het ihn fast chöne streichle bevor er denn de Baum duruf isch.
Eimol me hend mich die dumme Büs ufgregt. Natürlich fahrt nur all 3 h en Bus, sus mues me es Taxi neh. Hend mir det halt no z Mittag gesse und na d Föteli vom hütige Tag aglueget. Uf em Heiweg sind mir denn no en Baum go aluege. Jo, es tönt nid so spannend, de Baum hets aber in sich gha.
Me het bis zur Krone ue chöne klettere, ca. 28 Meter hoch.
Ich ha no nie so en lustige Baum gseh.
So mues sich de Tarzan gfühlt ha. Vo dete us sinds denn na gueti 45 Minute bis zum Hostel gsi. Uf em Weg hend mir denn ufsmol en Tucan ghört. Mir sind em Ton nogloffe hend en aber leider nid gfunde. Defür en Busi wo eus nüme het welle goh loh
Zruck im Dorf hend mir ufsmol ime Sitegässli es paar Manne mit graue Hoor und grosse Kamera gseh öppis fötele. Mir sind go luege und es isch en Tucan am Baumstamm gsi direkt bim Nest am brüete.
Jedoch nid de ganz farbig wo ich ha welle gse aber de isch au Oke gsi. Ja, das wers somit denn au schowieder gsi, mir sind no fein go z Nachtesse und den id Fädere.
Am nächste Morge am 6:30 ischs wieder retour nach San José gange. Det hend mir euse letzt Tag in Costa Rica bevor mir uf Kuba flüget. Das isch denn euses letzte Land. Und das wird namal zur Herusforderig. Wieso? Es het keis richtigs Busnetz. Meistens mues me irgend en Transport organisiere oder es Taxi ne. Es wird schwierig zum Geld abhebe. Eifache Sache wie Wasser, Shampoo ect sind schwer zum finde. Zuesätzlich werdet mir kaum Internet (Wlan) ha. Die meiste seget dass sie in 2 Wuche eventuell 2 mal mieses Internet gha hend. Also ich gang schwer devo us dass de Blog de letzt wird si bis mir dehai sind. Ich schrib die Blög vo Kuba natürlich aber wird es vermutlich erst spöter uelade. Mir wünschet eu bis denn e super Zit und eventuell gits jo glich na 2-3 Blög. Ansonsten, mir gseht sich nach em 17 April.
