ninanesto
ninanesto
vakantio.de/ninanesto

Machu Picchu

Veröffentlicht: 20.01.2018

Machu Picchu

Mir sind am Morge am 7:00 am Plaza de Armas am warte gsi. 7:00 isch anschinend Abfahrt gsi, wer z spot chunt het halt Pech gha. Me het ganz viel Gruppene gse und eini noch de andere isch vorzue abgholt worde vo de Guides. Nur mir sind nid abgholt worde. Am 20 ab 7ni het eus den eine gruefe, mir sind no gloffe und nach ca 5 min laufe hend mir gmerkt das es gar nid euses Unternehme isch, er het dene gruefe wo direkt hinder eus gstande sind. Super, retour renne bevor sie s Gfühl hend mir seget nid uftaucht. Chum retour uf em Platz gsi hends eus schlussendlich den au abgholt. Mir sind den zum Bus gloffe und sind den los gfahre. Zu eusem Glück ischs en relativ neue Mercedes Sprinter gsi mit ahgnehm viel Platz. D fahrt isch ca 6 h gange. Die erste Stund devo hends sehr müehsami CD’s laufe loh mit Informatione, jewils uf Spanisch und uf Englisch. Die vo dere CD het gschnorret und gschnorret und nomol gschnorret. Endlich isch sie verstummt und mir hend entlich wieder chöne mitenand rede. Noch ca 2 h hend mir namal 3 Stuck uf em Weg ufgläse und mir hend alli ghofft das er nid namal d CD vo vorne abspielt, heter zum Glück au nid. Mir hend den na 2 Stopps gmacht zum schnell d Bei verträtte und d Möglichkeit gha zum Snacks poste und Tierli streichle.

Nach ca 4 1/2 h isch den fertig mit teerte Strosse gsi und mir sind ufd Schotterstross gwächslet. Mir sind langsam immer me richtig Taalkessel gfahre, de Abgrund isch au immer höcher worde. Es het nid glanget das es zum Teil 200 Meter s Tobel ab isch, es het au no voll müesse Regne das d Strosse arschglatt hend müesse si. 

Mir hend jedoch en super Fahrer gha und me het sich nie unsicher gfühlt. Nach 6 h fahre sind mir den in Hydroelectrica acho. Vo det us isch nurno en Zug uf Aguas Calientes gfahre, da isch sDorf wo me übernachtet wen me uf de Machu Picchu will. De Zug isch relativ tür, 33 Franke für 30 Minute Zug fahre.

 Die ander Variante isch, das me de Gleis no lauft und e unglaublich schöni Wanderig dörf erlebe. Mir hend eus natürlich für die 3 h lang Wanderig entschiede. Mir hend in Hydroelectrica na schnell en Teller Teigware gesse als Stärkig und hend eus den uf de Weg gmacht. Es het halbe une ufe gregnet und mir sind ipackt gsi i Regeschutz. Nach ca 5 Minute laufe het ufsmol öbber de Wasserhahne zuetreit und es isch ganz schnell tropisch heiss/füecht worde. Mir hend eus immer me abzoge. Nach 30 Minute hend mir sogar mit Sunne dörfe wandere. Immer wieder mues me Bahngleis Brucke überquere wo überme rissende Fluss dure goht. 

Fürd Muriel mit Höheangscht weniger lustig. Es isch würklich e ganz schöni Wanderig gsi, nid streng, alles me oder weniger gradus. 

Immer wieder hesch es Horn vo wit weg ghört, de Zug wo sich nöcheret. Immer idrücklich gsi wen de dure gfahre isch. Nach knapp 2 1/2 Stund sind mir ume Kurve gloffe und hend uf eme Berg obe die erste Machu Picchu Ruine gse, strahlend blaue Himmel. Mir sind gad chli nidisch gsi uf die wo i dem Moment gad dobe gsi sind, da mir ide Regesaison det gsi sind und Januar Februar die schlechteste zwei Mönet sind, weg em viele Rege…

Es paar Schritt witer hend mir bereits die erste Hüser vo Aguas Calientes gse und mir sind recht froh gsi wells extrem schwül gsi isch. 

Mir sind im Dörfli acho und hend eus zerst welle umd Bahntickets für de Retourweg kümmere, da mir de Zug hend MÜESE ne wills sus zitlich nid glanget het zum de Bus verwütsche richtig Cusco. Jo, de Reto und ich hend eus ufd Suechi noch dem Bahnhof gmacht was gar nid mol so eifach gsi isch. Me het durch es Labyrinth vomene Markt müese durelaufe. Irgendwenn nach 15 Min hend en mir denn gfunde. Nach 10 Minute astoh het sie eus den gseit das me ohni Pass nid cha löse, d Fraue sind im Hotel gsi. Oke, alles retour zum Hotel, de Pass hole und den wieder zruck zum Bahnhof. Irgendwenn hends mir den gschafft. Mir hend eus noher verzwiflet probiert z Informiere wie wenn wo was ufmacht. Mir cha einersits mit em Bus vom Dorf ue zu de Ruine fahre oder ue laufe. D Muriel und ich hend eus entschiede zum laufe. D Andrea und de Reto hend lieber de Bus welle ne. S Ding isch gsi, im Dorf une het me müese e Bruck überquere und die macht erst zunere gwüsse Uhrzit uf, nidmol de Touriste Informationsstand het eus chöne sege wen die gnau ufmachet. Mengsmol so mengsmol so. Die Eint het den gmeint am 4:00. D Ruine machet aber erst am 6:00 uf, seb händ mir gwüsst. Zuesätzlich hends eus gseit das mir zwüschet 2-3 h heget zum uelaufe. De ersti Bus fahrt am 5:30. Mir hend den na schnell öppis z Nacht gesse und sind den am 21:00 undere, zum gnueg Schlof z verwütsche. Am 3:30 het de Wecker gschället und mir sind ufgstande als obs 10:00 am Morge wer. D Muriel het sich parat gmacht, ich bi no schnell umegrennt zum 2-3 Brötli z schnappe und am 4:05 sind mir usem Hotel richtig Bruck gloffe.

 Us allne Ecke hesch Stirnlampene gse richtg Bruck laufe. Am 4:20 sind mir den bim Ihgang vode Bruck gsi und es het ca 40 Persone bereits vor eus gha wo au gwartet hend. 

Am 5:00 het den d Bruck tatsächlich ufmacht, e Warteschlange sowit wied hesch chöne luege isch bereit gsi zum ue sekle. Ich ha de Muriel gseit "schön langsam, ein Schritt nach em andere und tüf dure schnufe, immer din Rythmus"! 

Mir sind überd Bruck und es isch los gange. Mir sind vo ganz vielne überholt worde. Jedoch nach 10 Minute sind die erste keuchend am Rand ghocket. Mir hend ein nach em andere igholt und sind wie e Schwizer Zahnradbähnli, langsam aber konstant de Berg uf. Nach 20 Min het mich d Muriel gfroget wie wit das mer sind, ich ha uf mim App glueget und mir sind scho ide Hälfti gsi, ich has chum chöne glaube. Ich ha den biz zoge um dobe vor de Ihgangsschlange en Platz wit vorne z ergattere.. ich bin nach 40 Minute dobe gsi und d Muriel isch nach sackstarke 50 min au itroffe, ich bi mega stolz uf sie gsi! Mir sind ca die 30igste dobe gsi.

 Vo 2500 Bsuecher a eim Tag. Die erste Büs sind am 5:50 ane gfahre und die dicke Touriste hend probiet bis ganz nach vorne füre z drängele. Alli wo uegloffe sind hend agfange usrürfe und ufsmol sinds den au hine agstande. Mir hend am 6:00 ie chöne und mir sind direkt ue grennt zum Föteli vo de Ruine z mache ohni Lüt druf und das isch eus au glunge. 

Es het sich mega glohnt. Mir hend den z Morge gesse und hend die Ruine bewunderet.

 Immer wieder isch Nebel vo de einte Site uf die ander Site zoge. Am 7:00 hend mir den vor em Ihgang zum Machu Picchu Montaña mit de Andrea und em Reto abgmacht. Namal 2 h de Berg uf für e unvergesslichi Ussicht. Nur 400 dörfet am Tag de ue, mir hend eus na es Ticket ergatteret. Mir sind losmarschiert, 2 h lang Stägetritt, keine glich höch wie de ander, keine de glich Abstand. Das het saumässig müed gmacht. Ich bi den gange und ha die andere drü das ganze gmüetlicher ago loh. Ich bi nach 1 h dobe gsi und es isch de Hammer gsi. 

Die Andere sind den nach 45 min au dezue cho, sie hends au super gmacht. Mir hend dobe namal en Snack gesse und sind den schowieder abe. 

Mir hend spötistens am 13:00 müese am Bahnhof si. Mir hend usgrechnet das mir allerspötistens am 12:15 uf de Bus abe müend. Mir sind jedoch nid die einzige gsi, e riese Schlange nur scho zum us de Ruine use z cho. Vorusse isch den e riiiiiese Schlage gsi wo uf de Bus gwartet het. Ich ha gseit "da langet NIEMOLS"! Jedoch ischs schneller gange als erwartet und mir sind am 12:20 igstige. Am 12:55 sind mir in Bahnhof ie gloffe, viel spatzig hend mir nüme gha. Wen mir de Zug verpasst hetet, hetemer au de Bus uf Cusco verpasst und mir hetet namal e Nacht müese blibe wa alli Plän uf de Kopf gstellt hetti. Chum sind mir mit em Zug usserhalb vo Aguas Calientes gsi hetz agfange Regne wie verruckt. 

Mir hends wiedermol super breicht. Im Zug het eus eine verzellt das sie ein Tag vor eus dobe gsi seget, au am Morge. Sie heget nid 1 ahständigs Föteli chöne mache, so neblig und regnerisch gsi.

Nach 30 Minute sind mir in Bus igstige und sind schowieder uf em Weg nach Cusco gsi. Mir hend leider nüme de glich Chauffeur gha und de Hälfi isch schlecht worde will er gfahre isch wie en Volltrottel. Nach 4 h hend mir au na eh Platte gha.

In Cusco acho sind mir eus nid einig gsi ob mir söllet am nächste Tag uf de Rainbowmountain. Alli sind nudelfertig gsi. De Bus det ue wer am 3:00 gfahre und es wer uf 5200 M.ü.M gsi. Mir hend denkt mit checket sWetter und entscheidet denn. D Wetterprognose isch jedoch zimlich schlecht gsi und mir hend eus gseit mir lönds, will für de Berg eifach hammer Wetter bruchsch. Lustigerwis isch en Kolleg vo La Paz a dem Tag ue und mir sind gspanne gsi was er eus verzellt. Am nächste Tag hend mir usgschlofe, sind go z Mörgele und hend witer gschlofe, es het mega guet due. Am Abig sind mir den glich no use go zNacht esse und d Muriel het chum me chöne laufe, so Muskelkater. De Kolleg het eus denn d Bilder gschickt am Abig. En schneebedeckte Berg und Nebel. Eimol me die richtig Entscheidig troffe. Am Tag druf sind mir denn an Flughafe. Mir sind richtig Puerto Maldonado gfloge, in Amazonas. Meh jedoch im nächste Blog.

Bis bald

Ernesto Y Muriel


Next Stopp: Puerto Maldonado, Amazonas.

Antworten

Peru
Reiseberichte Peru
#machupicchu#aguascalientes#cusco#peru#südamerika