ninanesto
ninanesto
vakantio.de/ninanesto

Amazonas, Puerto Maldonado

Veröffentlicht: 22.01.2018

Puerto Maldondo

Am 9ni am Morge sind mir richtig Amazonas gfloge. Lustig isch, dass sie en Security Check hend bevort ihstigsch. De bringt nämlich nüt. Meh het alles chöne im Handgepäck ha, Flüssligkeite, Frücht jo ich glaub me hetti sogar en Aff chöne mitneh. Ich ha mich natürlich vorbereitet und ha die kurze Hose im kalte Cusco scho agleit. Mir sind abghobe und hend das wunderschöne Cusco vo obe gseh, mit all dene Bergkettene rundume. Mir sind schnell überd Wolke und kurz durfabe hend mir schowieder a Höchi verlore. Mir hend s erstmol en Usblick über de Amazonas gha. Sowit wied hesch chöne luege hesch Bäum gseh, alles grüen. 

Nach 35 min sind mir scho wieder ufem Bode gsi. Mir sind richtig Usgang vom Flüger gloffe und ich ha denkt „isch gar nid so heiss, chunt eigentlich relativ küehle Wind entgege“. Bis ich den us em Flugzüg gstiege bi. Isch eim vorcho als ob me in eh Wand gloffe isch. D Luft het mer ufsmol mit em Messer chöne verschnide. Ich glaubs scho s erstmol gschwitzt bim Stäge abelaufe vom Flugzüg. 85% Luftfüechtigkeit und plus minus 33 Grad. Für die Andere isch das nüt neus gsi, will sie scho paar mol in Thailand gsi sind. Für mich ischs dütlich unagnehmer gsi. Kurz drufabe sind mir jedoch direkt i eusen Shuttle igstige. Zum Glück isch de klimatisiert gsi. Mir sind zum Büro vo eusere Agentur gfahre und hend det na uf paar anderi Gäst vo dere Lodge müese warte. Euses Guide isch den mit eus zume Schmetterlinghus gfahre wo zimlich schön gsi isch. 

Nach ca 1 h sind mir den komplett gsi und mir sind richtig „Hafe“ gfahre. Mir sind den nach 1 h Autofahrt acho und hend zwei klini Steg gse, das isch also de Hafe. Sie hend den euses Gepäck verlade uf em Boot und mir sind igstige.

 Chum Dach überem Kopf isch de erst tropisch Rege cho. Es het abeloh wie verruckt. Mir sind den ca 2 h lang mit em Boot richtig Lodge gfahre, e sehr agnehmi „chüehli“ Briese isch über eus hinweg zoge. Es het den z Mittag geh, sehr fein gsi.

Nei Spass, das isch de z Nacht gsi :-P. Z'Mittag hetz Ris geh.
 Mir hend uf em Weg flussufwärts mehrerimol agahlte zum Tier beobachte. Unteranderem Flussschwein, Kaimane, Papagaie und sus no Vögel, echt beeidruckend.

 Mir hend den ame Steg ghalte und sind den richtig Lodge gloffe. Die arm Muriel isch links und rechts vo de Schnecke überholt worde will sie so feste Muskelkater gha het. Mir sind jedoch den mol no acho und mir hend e hammer Lodge im Regewald gha. Rundume Dschungel und z mitzt ine es mega schös Holzgebäude. 

Mir sind mit eme iskalte Papayasaft begrüesst worde und eme Stückli Chueche (oder zwei). Es isch alles offe gsi, kei Fenster uf em ganze Areal. Mir hend den eus biz igrichtet im Zimmer, hend e Tonne Muggespray igschmiert und sind den bereits uf die ersti Tour. Mit Gummistifel sind mir dur es Sumpfwägli richtig Ussichtsturm. 

Tazeabdrück vome Jaguar.
Alles het klebet, s Tshirt isch nass gsi und die dick Luft hesch fast nid dur d Nase brocht. Schlussendlich sind mir bim Turm acho und mir hend nach dene 9000 Tritt vom Machu Picchu namal dörfe uf 40 Meter ue Stäge laufe.

 Dobe acho hend mir e wahnsinns Ussicht gha über de Amazonas Regewald, inklusive Sunneuntergang. Liechte Nebel hetz ade einte Orte scho gha und me het Papagaie und d Brüllaffe ghört umeschreie. 

Nach de erste Nacht bin ich jedoch schreiend gweckt worde. D'Muriel het en schrei abloh vom Badzimmer. Wo sie d Händ am Tüechli het welle abtröchne isch de chli Fründ det ghocket:

Ja, es isch speziell gsi. Überall wot anelangsch, luegsch zerst obs det irgendwo es Tierli het. Mir sind denn 3 Täg i dere Lodge gsi und hend verschidensti Toure gmacht. Meistens bisch losgloffe und hesch nanig gwüsst was uf dich zuechunt. Speziell isch au die eint Tour ide Nacht gsi. Einigi Tier gseht me nur denn. Mir sind mit Taschelampe dur de Amazonas gloffe. 

Die grösst Spinne wo mir je gse händ. Grösser wie e ganzi Hand, viel grösser.
Und e riese Kröte
Nach dene 3 Täg, hend mir denn d Lodge gwechslet. Mir sind am Morge früeh los und sind 5 h lang Flussufwärts gfahre. Uf em Weg hend mir wieder jensti Stopps gmacht. 

Unteranderem sind mir inen Nebefluss gfahre und mir hend anere „Salzlecke“ aghaltet. E salzhaltigi Wand wo d Papagaie d’Mineralie holet. Natürlich hend mir d Sneakers agha. Mir hend den anere Insle ahdockt und hend ca 5 Minute dur de Schlamm müese laufe. D Schueh sind komplett voll Schlamm, Erde, Blätter und weiss ich nid was alles gsi. Me hetti ja Wanderschueh im Koffer gha, aber jo. Mir hend a dere Felswand und Umgebig bestimmt 50 Papagaie gseh, mega. Die machet en Lärm, unvorstellbar.

 Mir sind zunere ganz spezielle Lodge. Die meiste Bsuecher döt sind Forscher und betreuet und forschet über d Papagaie. D Lodge isch biz grösser gsi und mir hend s Glück gha ih de nigelnagelneue Gebäude dörfe z schlofe. En Forscher het eus den d Informatione über die Lodge geh, Agebot ect. Unteranderem het er eus ermahnt, das mir die Papagaie wo am z Morge und am z Mittag do ane flüget nid dörfet füettere. Das seged Papagaie wo do ufzüchtet worde sind und wos aschlüssned frei glo hend. Jedoch sinds bizeli bequem worde und drum flügets do ane zum s Esse schönluege und klauet der d Brötli vom Teller. Chum het er de Satz fertig gseit isch de einte anezflüge cho wie e Furie und het s erste Brötli vom Tisch klaut und isch devo, so schnell gohts. 

De frech Hagel de.
Es sind mega schöne Rümlichkeite gsi, halt wieder alles offe. 

Am Namittag hend mir dörfe entspanne ide Hängematte. Ich bi kurzdrufabe igschlofe. Nach 30 Minute hetz mich aber fast hinderschi zu de Hängematte use gjaggt. Es het en riese Chlapf geh, ich ha i mim ganze Lebe nanie so en Donner ghört. D Muriel het mich mit riesige Auge agluegt. Es het nämlich immer chli um die glich Zit gregnet für nur öppe e Stund lang, defür aber richtig. Kurz drufab jedoch wieder blaue Himmel, biz wie s'Aprilwetter.

 Bide Dämmerig hend mir eus parat gmacht für die ersti Tour, es het mega gstunke im Zimmer und niemert het gwüsst wieso, me hend e halb Stund spöter jedoch usegfunde was de Grund gsi isch. Mir sind wiedermol losgloffe und hend kei Ahnig gha was mir werdet gseh. Nach 2 Minute hend mir scho die erste Spider Monkeys gseh. Erstunlich wie mir ihne hend chöne zueluege wies uf dene Bäum umegumpet sind mit de Babys uf em Rugge. 

Nach 20 Minute hetz ufsmol wieder so gstunke wie im Zimmer. Mir sind wortwörtlich de Nase noh. Mir sind ufsmol umzinglet gsi vo ca 100 Wildsäu. Erstunlicherwis isch de Guide immer nöcher ane und het gseit mir söller ruhig si und nid schnelli Bewegige mache. Was bi eus aggressiv sind, sinds do schüch. Bi de klinste Bewegig sinds devo gseklet. Mir sind e halb Stund lang am beobachte gsi wies de Bode umtüend, umeseklet und mitenand kämpfet.

 Uf em Weg retour hend mir denn au die erst riese Tarantle innere Höhli gse. Sprich nur d Füess und de Guide het sie denn mit eme Blatt krüzelet und sie isch use cho, igitt.. 

Was ich do nonig gwüsst han isch das ich paar Täg spöter eso e Spinne no viel nöcher bi mir ha als das mir wohl isch. 
Am nächste Tag sind mir ca am halbi 5i mit de Forscher richtig Insle gfahre. Vo det us hends mir eus bequem gmacht und hend gwartet bis d Papagaie chömet. Eine nach em Andere isch ane gfloge und het sich a dere Mineraliewand fest ghebet. Vo witem hesch d Brüllaffe ghört majestätisch dur de Dschungel brülle. 

Am Abig hend mir den na binere Präsentation vome Forsche dörfe debi si. Er het über sis Projekt verzellt wie er sit 4 Mönet do isch und die Papagaie betreut. D Babys gsehnd jedoch komisch us.

Spöter hend mir den no en "Pisco Sour" kurs becho. Das isch en Peruanische Drink wo sehr sehr beliebt isch und au mega fein. De Reto het sich würklich super gmacht, mine isch aber glaubs bizeli besser gsi

Nach unzählige Usflüg isch den au de letzt Abig cho und mir hend packt. Wo ich us em Wc chum stoht d Muriel det und seit „Ich glaub du gosch nid is Bett“! Uf em Rahme isch e riese Spinne gsi, hoorig und dick. 

De Reto het sie den igfange, ich het das echt nid chöne mache. 

Mir hend eus den no umeglueget ob villicht no en Brüeder vo dere Spinne do isch und promt hetz namal eini im Egge gha. Wo sie de Reto het welle de Balkon abe werfe het sie sich na a sinere Hand fest ghebet und er het sie schnell abe gschüttlet. Zum Glück hend mir es Moskitonetz ums Bett gha, da het eim biz Sicherheit geh. Am Morge am 6:00 sind mir den richtig Flughafe brocht worde. Es het gad knapp glanget das mer lut Plan rechtzitig det gsi sind. Jedoch ischs es biz es Chaos gsi. De Flüger het selle am 13:00 abflüge. Eusi Gsellschaft isch jedoch nid glandet. De Flughafe isch chliner gsi wie de Bahnhof vome Schwizerdörfli, meh het also jede Flüger gse wo glandet isch. Nach 1 ½ h hets ufsmol gheisse istige. Isch zwor nid eusi Gsellschaft gsi aber isch eus egal gsi, drus cho isch eigentlich niemert me. Mir sind 35 Minute uf Cusco gfloge wo mir den en zwüsche Stopp gmacht hend. Mir hend dörfe hocke blibe und zu eusem Glück hends eus gfroget ob mir wellet id Business Klass wechsle.

S’Erstmol sind mir Business gfloge und es isch super gsi. D Muriel und ich hend gfroget ob mir en Blick is Cockpit dörfet werfe und nach de Landig hend mir den dörfe füre. 

Zwei mega sympathischi, jungi Pilote hend eus s Cockpit erklärt und mir hend dörfe Platz neh. Jetzt sind mir in Lima, me erfahreder im nöchste Blog.

Bis Bald

Ernesto Y Muriel

Next Stopp: Lima

Antworten

Peru
Reiseberichte Peru
#amazonas#tambopata#tambopataresearchcenter#puertomaldonado#peru#southamerica#südamerika