ninanesto
ninanesto
vakantio.de/ninanesto

Lima, Peru

Veröffentlicht: 25.01.2018

Lima

Nach dem mir s Cockpit vo eusem Flugzüg wieder verloh hend, sind mir richtig Miraflores gfahre, wo sich euses Appartement befunde het. Es isch es mega schös Appartement gsi mit Blick ufs Meer und d Skyline vo Lima. Aschlüssend sind mir den na was go z’Nacht esse und den au scho gli id Federe. Am erste volle Tag händ mir sit langem wiedermol usgschlofe. Aschlüssend z mörgelet, mit Meerblick und denoch hend mir en Uber richtig Stadt gno. Eifach mol is Zentrum, hetz gheisse. Isch jedoch schwierig will Lima extrem gross isch. Ich glaub es het ca 3-4 Zentre, jedoch isch do in Südamerika de „Plaza de Armas“ immer s Hauptzentrum. Mir sind irgnedwo inen grosse Park gfahre, sind chli umherspatziert und hend eus denn uf de Weg richtig Plaza de Armas gmacht. Die Plätz sind meistens zimlich schön gmacht. 

Mir sind eigentlich uf de Suechi nacheme Touristebüro gsi, da mir uf e bestimmti Insle hend welle, das hend mir denn au bi dem Platz gfunde. Mir hend eus informiert, erfahre das me mit de Seerobbene und Seelöwe cha schwimme und hend den direkt buechet. Entlich hetz mis langersehnte Ceviche geh und es isch perfekt gsi. Was isch Ceviche? Rohe wissä Fisch mit peruanischem Mais, Zwible, Zitronedressing und Chili, richtig erfrischend.

 Dezue es feins ischalts Bier, s’Beste wenns heiss isch.

Am nächste Tag hend mir zerst nid gwüsst was mache, ich ha chli recherchiert und ha au prommt e Überraschig fürd Muriel und ihri Eltere gfunde. Mir sind in John F Kennedy Park, au bekannt als Katze Park. Dete lebet über 70 streunendi Katze, perfekt fürd Muriel. Nach em 500e mol froge „wo gönd mir ane?“ sind mir den schliesslich acho und mir hend bereits die erste Katze gse umeligge.

 Da es jedoch Mittag gsi isch und recht heiss sind d Katze uf de Bäum, under de Bänkli, im Gebüsch ect. ghocket und me hetz regelrecht müesse sueche. Es sind jedoch richtig viel gsi. D’Muriel isch jedoch nonig z friede gsi will sich z viel versteckt hend.

Mir sind den was go z Mittag esse und nachher zume spezielle Ihkaufszentrum, direkt a de Felswand bim Strand. Speziell und mega schön, obwohl mir kei Geld gha hend zum pöstele, en Bsuech ischs Wert gsi. 

Mittlerwile isch es au scho 17:00 gsi und es het langsam abküehlt. Mir sind zruck in Katze Park und me het den viel meh Katze gseh umespiele und tobe. D’Muriel het vo jedere Katz wo sie gstreichlet het es Foti gmacht und ihr chönd mir glaube das es öppe es Foti geh het. Die einte hends jedoch nid lustig gfunde und die hend den ab und zue s Gfühl gha sie müeset mit de Pfote eus eis tätsche. Uf jedem Baum hetz minimum 2-3 Katze gha, wie chlini Affe sinds ume ghanged.


Am Tag druf sind mir richtig Hafe gfahre wo euses Boot uf eus gwartet het. Mir sind d Insle Palomino go bsueche, so was ähnlichs hend mir jedoch in La Serena scho mol gmacht, jedoch de Reto und d Andrea nonig. Wenns öppis gha het den Welle. 100'000 Wälle, eini grösser we die ander. Nach 1 h ischs den au em Hinderste und am Letzte schlecht gsi. Sogar de Captain het e „Reisetablette“ müesse neh. Bi mir, wie au bi vielne Andere het den de z Morge glich no welle is Meer go schwimme. Nach 1 ½ h sind mir bi de Insle acho und mir hend de Neoprenazug agleit und sind is 15 Grad kalte Wasser gumpet. De ganz Felse voll mit 1000ige vo Seelöwe und Seerobbene. 

Langsam ischs kalte Wasser de Arm hindere und em Bei no gflosse. Zudem ischs au extrem Salzhaltig gsi. Z’erst sind alli Robbene uf em Felse ghocket und hend obe abe gschraue. Jo, gschraue, en unglaubliche Lärm hends gmacht. Mir sind richtig Felse gschwumme und ufsmol isch Eine noch em Andere zu eus is Wasser gumpet. Gstunke hends, öppis vom schlimmste wo ich mich glaubs dra mag erinnere. Wie ganz ganz alte Fisch, würklich alt, wo au nüme lebt. Aber das het richtig guet due nachdems eim so schlecht gsi isch. Ich ha mit de GoPro gfilmet und die Viecher sind ziemlich nöch anecho. Sie sind richtig gwunderig gsi, eimol dra schmöcke het ezt jede müesse. 

Es sind rund 100 Seerobbene um eus gschwumme, hend umegschraue, vor sich her gstunke und allpot a de Füess umeknabberet, jedoch würklich mega fin. Isch erstunlich gsi wie fin und rücksichtsvoll sie gegeüber eus gsi sind, wie Hünd eigentlich. 

Nach 30 Minute sind mir wieder zruck ufs Boot, hend de Neoprenazug abdue und s’Erbreche isch witer gange… Nid bi allne aber doch no bim einte oder andere. Mir hend uf em Weg au na riesigi Pelikan gse und Pinguin. Mir sind den zimlich gli wieder uf festem Bode gsi und wieder richtig Appartement. Die ganz Zit hend mir Plakat vom Papst gse, er segi anschinend 3 Täg ide Stadt. Lustigerwis isch er a dem Obig am Flughafe acho und isch 100 Meter vo eusem Appartement mit em Helikopter glandet und is „Papamobil“ igstige. Hunderti vo Mensche sind uf de Stross am warte gsi. Mir sind uf em Balkon gstande mit em Feldstecher und hend das ganze VIP mässig beobachtet.

Am Folgetag händ mir nöd viel gmacht. Mir hend na die letzte Kleider gwäsche, bizli Film glueget und sind den fein go z’Nacht esse. Nach em Esse sind mir inen Springbrunne Park gange. Es isch mega schön gsi. Es het sogar e 20 Minute lange Wasser-Laser Show geh. 

Über 25 Springbrünne sind mir go aluege und d Muriel het ganz schön cooli Föteli gmacht.

Es isch den au scho de letzt Tag abroche. An dem Tag hend mir den die beide Patekind vo de Familie Egger und de Gmeind Fürthale bsuecht. Mir hend ide erste Schuel abgmacht. En Schwizer, de Sebastian wo für Pateschaft in Lima zueständig isch het eus begrüesst. En sympathische Bündner wo mit sine 2 Kind und sinere Frau usgwanderet isch. 1600 Kind im Alter zwüsched 3 & 17 bsuechet die Schuel. Es isch en riesigi Schuel, Kindergarte, Primar, Sekundar und au Werkstatt befindet sich det. 

Es isch echt es super System. Nur die Kind wo d’Eltere au wönd witercho werdet gförderet. Es bringt nüt Strossekind id Schuel neh, die meiste kömmet nid devo Weg, das isch s’Problem. Die letzte 3 Jahr müends sogar en Bruef uswähle. Entweder sie bereitet sich fürd Universität vor, sie machet e Lehr in Elektrotechnik, Polymechaniker, Anlage und Apparatenbauer, s’KV oder im Textilbereich. Mir hend d Werkstatt besichtiget und ich han mich gfühlt wie dozmol wo ich ide Lehr gsi bin im AZW Winterthur. 

Sie machet den gemeinsami Projekt und stellet unteranderem so Sache her
En funktionierendi Popkorn Maschine. 
Nach dem Bsuech isch den s erste Patekind cho, das vom Reto & de Andrea. De 11 jöhrig Jean Pierre Leon. Er het sich am Ahfang no hinder de Muetter versteckt. Mir sind den gmeinsam zum Auto gloffe und sind richtig Dihai vom Jean gfahre. Chum im Auto gsi het er gredet wie es Buech. D Muriel het fast zu de Ohre us blüetet. Mega herzig de chli, wie schnell er sich wohl gfühlt het bi eus. Mir sind am Hus acho und sie het eus id Wohnig ieloh. Eis Zimmer, sie sind zwor nur zu zweit gsi isch jedoch echt eng gsi. Sie hetz defür zimlich herzig igrichtet gha. Mir hend me übers Lebe vo dere Familie erfahre. Die Gschicht isch mir tüf under d Hut. So Lüt hend jedi Hilf verdient, sie schätzet das au unglaublich. Nach guet 1 ½ h, 4 Partie Schach (het de Jean alli gnadelos verlohre) 

und anere Keyboard Vorfüerig hend mir na es Gruppeföteli gmacht. 

De Jean het de Muriel na sis Käppli gschänkt, will er sich Sorge gmacht het „Du bisch so Wis und d Sunne isch gföhrlich, nimm mis Käppli“! Tränli sind gflosse und mir hend eus uf de Weg zum nächste Kind gmacht.

De David het ca 50 Minute witer weg gwohnt. Er goht ine anderi Schuel jedoch vo de gliche Organisation. Mir hend schnell en Rundgang umd Schuel gmacht und de Sebastian het den gseit „Passed uf, dihine hetz en Zwinger mit eme ganz böse Rottweiler dine“! De sind mir natürlich go aluege, en mega herzige Wauzi isch det ghocket und het nid gwüsst ob er ezt eus söll abälle oder Freud ha.

 Nocher isch den scho am David sini Muetter azlaufe cho und mir hend eus begrüesst. Sehr e sympathischi und bodeständigi Frau. Sie het im Gegesatz zum Jean sinere Muetter glücklichere Idruck gmacht. Mir sind bim Hus acho, wo ihrem Vater ghört. Die Familie het eis Hus gha und es isch e dütlich gelasseneri Stimmig gsi. Die Familie het jedoch au nid so es schwers Schicksal wie de ander Familie. De David isch d’Stäge abe cho, het glachet und jedem vo eus en Kuss ufd Bagge geh. Er het sich riesig gfreut. Er isch wie au de Jean sehr informiert gsi über eusi Familie. Nach 1 h kennenlerne und enand usfroge sind mir au schowieder witer gange. Es letzt Gruppefoti und ab richtig Lima City. 

Vo det us hend mir vom Sebastian abschied gno und hend eigentlich es Taxi wölle. S’Problem isch gsi das alli Strosse gsperrt gsi sind, es Taxi z’verwütsche isch fast unmöglich gsi. Überall Lüt, Militär, Polizei und Sicherheitslüt. Meh en Popstar als sus öppis, de Papst. Jo, er het eus bizeli gnervt. Irgendwen sind mir jedoch glich no acho im Appartement. Mir hend mit schwerem Herze müesse packe und hend den aschlüssend es Abschiedsesse zemme gnosse, da de Reto und d’Andrea schowieder hei hend müese. Es het es sehr feins Stuck Fleisch geh. Am Morge sind mir früeh uf, hend es letztsmol zemme z’mörgelet und sind den uf verschiedeni Taxis. Sie richtig Flughafe und mir an Busbahnhof. Fertig Luxuslebe, zruck im Backpackerlebe. Büs, 4er oder 8er Schlofschläg und Hostels. Mir hends aber ehrlichgseit au biz vermisst, will mer halt richtig cooli Lüt kennelernt.

A dere Stell es riese Dankeschön an Reto und ad Andrea, mir hend die Zit mega gnosse, es isch cool gsi!

Next Stopp: Huachachina

Bis bald

Ernesto y Muriel

Antworten (1)

TOUPI-GROUP
Schöne Artikel über Lima. Ich hätte eine frage, wie heisst die Schule die Ihr Besuch habt.? Viele Grüße aus Deutschland.

Peru
Reiseberichte Peru
#lima#peru#südamerika#southamerica