ninanesto
ninanesto
vakantio.de/ninanesto

Huacachina

Veröffentlicht: 29.01.2018

Huacachina

Mir sind sit langem wiedermol mit eme Bus zu de nächste Destination gfahre. Mir sind richtig Wüesti vo Peru gfahre. Das Dorf het Huacachina gheisse und isch e Oase z mitzt ide Wüesti gsi. Guet 5 h isch d Busfahrt gange. Eh super Busgsellschaft hend mir verwütscht. Isch eigentlich wie en Businessflug eifach im Bus. Vor jedem Sitz hets en Fernseh, grossi bequemi Ledersitz und en Service mit Snacks. 


Mir sind den uf de letzte Stross richtig Huacachina gfahre, rundume nüt meh. Ufsmol taucht ime Sanddünekessel die Oase uf. En zimlich spektakuläre Ablick. Mir hend es super Hotel gfunde. Nigelnagelneui 4er Zimmer inklusiv Sanitäralag (nöd selbstverständlich). En Pool hetz au gha, zimlich wertvoll gsi in dere heisse Wüesti wos schnell mal bis zu 35 Grad heiss wird.

 Das Ganze für 20 Franke, inklusiv 1 Aktivität am Tag. Am Obig hend mir den scho gratis es recht grosses BBQ becho mit eme kalte Bier. D Nacht isch zimlich heiss gsi i dene Zimmer. 

Ich Fuchs han jedoch vo minere Schwöster es Mosquitonetz becho fürd Reis. Ich han das ad Zimmertüre bastlet und somit hend mir d Türe chöne offe loh und es isch schön frische, küehle Wind ie cho. Wo den aber die andere zwei Bsoffne vo eusem Zimmer retour cho sind ca am 24:00 (Mir hend gschlofe) hends irgendwie die Konturktion kaputt gmacht und das Netz isch am Bode glege. D’Mosquito Bar „All you can drink“ isch eröffnet gsi und kurz durfabe han ich ca 20-30 Stich gha. De Kampf isch los gange. Es isch mir e Lehr gsi, wend anderi im Zimmer hesch chasch das vergesse, janu.

De nächsti Tag hend mir mit relaxe am Pool verbrocht. Sünnele, chli Esse, trinke und eifach mal guet go loh isch agseit gsi. Mir hends mega gnosse. Am 16:00 sind mir den uf die ersti Tour. Mit eme Strandbuggy, belade mit Sandboard sind mir den dur die Wüesti gheizt. Selbster bastelti Gfährt sind das gsi.

D Muriel het vor de Abfahrt de Fahrer gfroget obs gföhrlich seg (Sie het biz Angst gha). Er het den ganz lässig gseit „Nei eigentlich nid, aber wenn mir den Saltos machet wird’s scho biz gföhrlich“! D’Muriel het ihn den agluegt und schweigend gradus gluegt. Ich ha nu glachet näbet dra, hetz no glatt gfunde paar Saltos z mache. 

Mir sind den losgfahre und er isch zimlich verhalte gfahre. Bis mir weg vo de Lüt gsi sind und mir s Dörfli nüme gseh hend, den het er mol richtig uf dTube druckt. Immer wieder het er abbremst und es isch mehreri Meter s’Loch ab gange. Mir hend kei Ahnig gha wo das es dure goht, er hetz kennt wie sini Hosetäsche. Umso meh sind mir amel verschrocke wens ufsmol wieder abe gange isch. Irgendwenn hend mir den aghalte und mir hend uf ere hoche Düne müese usstige. Er het den die Holzbrätter usglade und het gseit „So ezt chönder abe düse“! Er het eus schnell zeiget wie. Entweder hesch es Snowboard gno oder öbbis chliners wie es Snowboard. Eifach es Brett mit so Klettverschluss-Schlaufe. Ich ha s Holzbrett gno, me seg anschinend schneller. Meh isch uf em Buch gläge, Kopfvora und den Hobla s Loch ab. Me wird erstunlich schnell. Mir ischs jedoch z wenig schnell gsi. Ich ha dunne denn das Holzbrett biz meh gwachset. Es sind 3 Düne hindernand gsi, vo det us het er eus den wieder ufglade um zu de nächste Düne z fahre. Die Düne hend sich immer gsteigeret, immer biz höcher. Mir sind zu de nächste gfahre, die letzte 2. Die erst isch den scho es rechts Stuck höcher gsi als vo de letzte die höchst. Er het den nur gmeint „die letzt isch den riesig“! Ich han mir es anders Brett gschnappt ide Hoffnig das es biz schneller isch wies letzte. Und es isch au schneller gsi, einiges schneller sogar. Ich han als ersts müese abe und es isch mega gsi, Adrenalinkützel pur. 

Vo det us het den de Guide obe abe gschraue wohi mir müend laufe für die letzt Düne. Mir sind det acho und ich segs eu, tschuldigung für de Usdruck aber es isch e uh huere Düne gsi. Dopplet so höch wie die andere. Um die 150 Höhemeter hesch gmacht und ca im 40 Grad Winkel. Mir sind z dritte nebet enand ane glege und hend den es Renne gstartet. 3, 2, 1 und los. Mir sind wenigi Zentimeter nebet enand mit eme Affezah det abe gsaust. Kei Ahnig wie aber de wo gwunne het isch wie mit eme Raketeatrieb vorrusgschosse. Ich ha kei Chance gha, bi aber au mit Abstand zweite worde. Ich glaub mir hend en guete 60er druf gha. Une ide Kompression bevors wieder die ander Düne durufgange isch hetz grausami Bodewelle gha und es het eim fast abem Board abe gjasset. Das isch richtig cool gsi, ich ha alles gfilmet mit de Gopro. Nacher hend mir wieder e rasanti Fahrt zruck id Stadt gha und sind zruck is Hostel.

Am Tag druf hend mir d Glegeheit gnutzt und hend natürlich badet, gsünnelet, d’Muriel het sit langem wiedermol ihri Bilder bearbeitet und ich ha Blogg gschribe und alli Gopro Videos sortiert und agfange en Teil z schnide. Am Abig sind mir den ufd Sanddüne ue kletteret (die isch richtig höch gsi) und hend de Sunneuntergang welle gnüsse und fötele. Es isch jedoch zu bewölkt gsi. Mir sind jedoch glich erstunt gsi, wie schön das da vo dene Düne usgseht ide Nacht. 

Es het hammer Föteli ge.

Das isch d Stadt Ica, ca 10 Minute entfernt vo  HuacachinaAm letzte Tag sind mir am Morge früeh ufgstande. Mir sind die Düne duruf gloffe und sind ganz ellei unterwegs gsi. Es isch sehr steil duruf gange. 1 Schritt füre und 1 1/2 retour....

Mir hend probiert de Sunneufgang z fötele. 

Mir hend gwartet und gwartet, es het aber erneut z viel Wolke gha. 

D Bilder sind jedoch glich cool worde, au ohni Sunneufgang.
 Janu, hend mir wenigstens gad früeh chöne z Morge esse. 

Gege de Mittag sind mir den wieder uf de Busbahnhof und sind richtig Norde gfahre. Mir gönd uf Mancora, d Karibik vo Peru. Dezwüsched machet mir en Zwüschestopp in Trujillo.

Next Stopp: Trujillo & Mancora

Bis bald

Ernesto Y Muriel

Antworten

Peru
Reiseberichte Peru
#huacachina#peru#dunes#sand#sandboarding#sandbord#bananahostal#pool#hike