ninanesto
ninanesto
vakantio.de/ninanesto

Cusco, Peru

Veröffentlicht: 17.01.2018

Cusco, Peru

Mir sind im verregnete Cusco acho und sind mit em Taxi is Zentrum gfahre. Mir hend es mega schös Hotel verwütscht. Alles im alte Stil jedoch uf modern gmacht. Mir hend eus biz igrichtet und sind aschlüssend is Zentrum zum d Machu Picchu Tickets z löse. Es het ganz viel Büros wo Toure abietet, ezt müend mir nurno en guete verwütsche. Mir hend uf euses Buchgfühl gloset und sind den ih das Büro iegloffe. Mir hend mit em Verchäufer biz gredet und en guete Pris usghandlet. Mir hend für de Machu Picchu Itrit, de Transport is 6 h entfernte Aguas Calientes (letzte Dorf vorem Machu Picchu) und de Itrit zum Machu Picchu Montana 80 Franke zahlt. Es git einigi die zahlet das nur scho für de Itritt, je nach dem wo mer das Züg buecht. Het au chöne si das es für de Machu Picchu kei Platz gha het, ganz vieli machet eim Angst und seged me mues de Itrit 3-4 Mönet im Vorrus bueche well sie nur 2500 Bsuecher pro Tag ie lönd, ha jedoch no nie ghört das effektiv usbuechet gsi isch. Mir sind happy gsi das mir eusi Tickets gha hend und hend eus denn entspannt uf de Weg zum öbbis esse gmacht. Mir sind ines super Restaurant und ich han mir den es Alpaca Fillet uf em heisse Stei bstellt. Mhhhh chume gad wieder Hunger über, butterzart. Es het au nid dörfe zäch sie well die Messer derart stumpf gsi sind.

Am Tag druf sind mir den uf die 10ni is Zentrum zum d Freewalking Tour z mache. D Muriel und ich hend vorher scho gseit das Cusco eini vo de schönere Städt isch wo mir bis jetzt bsuecht hend in Südamerika aber nach dere Tour ischs defintiv die schönst. 

Es het ganz viel alti Gebäude (spanische Baustil) wo den modern renoviert worde sind.

 Au traditionelli Gebäude und ganz viel mit eme Innehof. 

Mir sind losgloffe und schowieder sind eus 2 Hünd nogloffe. Mir sind inen Innehof und det hetz en Musiker gha wo agleit gsi isch wie en Inka vo früener. Er het ganz viel ussergwöhnlichi Instrument gha wo er eus den vorgspielt het. D Hünd sind au dezue ghocket und het gspannt zuegloset. Er het meh „Natur“ grüsch nogmacht und dezue no irgendwie trommlet, ganz speziell. 

Ich han den derwil no es Föteli mit mim Kolleg, em Fredy gmacht. 

De nächst Stopp isch den e Inka Ruine gsi. Mir hend dur e Kontrolle dure müesse, natürlich isch de Hund det nid dure cho, mir hend tschau gseit. Wo mir dinne gsi sind rennt er ufsmol quer dur de Platz zu eus. Er isch irgendwo dur en Hinterigang iecho wo offe gsi isch. Er het schön gwartet, wo mir jedoch zum nächste Platz hend müese het en de Securitas verschücht… Villicht nid s beste wenn er a die alte Ruine ane seicht, haha. Er isch ab wie e Ragete und leider isch er den au nüme zrugg cho. Er het gmerkt das es ernst isch . 

Mir sind den quer dur d Stadt dure, hend die speziell Bauwis vo de Inkas bewunderet, wie präzis sie die Steimure baue hend, wie gfräset.

Am Endi vo de Tour sind mir ame Ussichtspunkt acho zimlich wit obe. Mir hend Cusco bewunderet, hend jedoch gseh das na biz witer obe e Christus Statue het, wo mer sicherlich die besser Ussicht het. Mir hend eus den vo de Gruppe usklinkt und sind den det ue gloffe, will mir scho ide Häflti gsi sind. Es isch en chline Vorgschmack uf de de Machu Picchu gsi wells nur Stägetritt gha het.

 Dobe acho hend mir den en super Usblick gha und es het sich also glohnt. 

Bizeli hine dra hend mir denn no en riesige alte Steihufe vo de Inkas gseh.

Mir sind den langsam retour richtig Hotel. Mir hend welle früeh is Bett da es am nächste Morge früeh los gange isch richtig Aguas Calientes. De nächsti Blog isch über Machu Picchu und zuglich na die letzte zwei Täg vo Cusco. Also, witers im nächste Blog.

Bis bald

Ernesto Y Muriel

Next Stopp: Aguas Calientes, Machu Picchu

Antworten

Peru
Reiseberichte Peru