ninanesto
ninanesto
vakantio.de/ninanesto

Puno, Titicacasee

Veröffentlicht: 15.01.2018

Puno

Mir hends sehr gnosse wiedermol ime Hotel chöne zsi. 

Ja ich weiss, die letzt Zit hend mir 1-2 Hotels gha, aber das in La Paz hend mir scho ganz lang buechet gha. Jedoch werdemer die nächste 2 ½ Wuche meistens es Hotel ha. In Lima werdet mir den wiedermol es Air BnB Appartement neh. Am erste Morge sind mir bereits los uf die ersti Tour. Mir sind die berüehmte schwimmende Insle uf em Titicacasee go aluege und zuesätzlich no e Insle. Jo, schowieder en Bootsusflug, bi jedoch recht zueversichtlich gsi weg dene schwimmende Inslene. Mir hend schomol es grössers Boot gha mit me Komfort. Mir sind los gfahre und ich ha fast chli Angst becho, es isch es Speedboot gsi. 

Wo mir de Hafe verloh hend mit Schirttempo hend mir denn de Andrea und am Reto erklärt das da maximum Gschwindigkeit gsi seg vom andere Boot. Er het den mol ufd Tube druckt und den hend mir entlich mol e aständigi Gschwindigkeit gha, das het mir schomol passt. 

Mir sind den durch s’Schilf gfahre wo 80% vom Hafe verdeckt. Mir hend jensti Tier im Schilf gse. Ob Saue, Vögel oder Hünd. Mir hend eus langsam de schwimmende Insle vo de Uros Indianer gnäheret. Es sind halbi Dörfer wos uf dene selberbaute schwimmende Insle bauet. Es het grossi Insle wos Schuelhüser, Arzthüser ect hend und den gitz au die chline Familie Insle wos meistens 4-5 Hüttli hend. 

Mir hend den a de einte Insle agleit und sind uf die Insle. Es het 5 Hüttli gha. Zum Zitpunkt sind nur 4 Fraue uf de Insle gsi und sozege de „Bürgermeister“ oder de „Chef“ vo dere Insle. Die chline Kind sind ide Primarschuel gsi (e anderi Insle) die grössere sind id Sekundarschuel in Puno am Festland. Die sebe sind jedoch nur am Wuchenend dehai. Mir sind den all im Kreis ghocket und sie hend sehr interessant erklärt wie sie uf dere Insle lebet, wie sie die Insle ufbauet ect. 

Was no praktisch isch, wend Strit mit em Nochbur hesch, chasch ame Motorboot alüte (En Schlepper) und er schiebt dich kurzerhand anen neue Platz, wie praktisch. Komisch isch das sich die ganz Insle bewegt weg de Wälle oder wenn eine dure lauft. Isch gwöhnigsbedürftig aber glich irgendwie cool.


Nach de Besichtigung hends eus abote ih dene tradionelle, selberbaute Schiffli mitzfahre. Aso jo, sie hend gseit „wer will cha mit eus mitfahre und mir bringet eu zu de nächste Insle, für 10 Soles (3 Franke)“! mir hend denn denkt „jojo mol luege“! Wos gheisse het das mir witer gönd het euse Guide nogruefe „Mir gsehnd eus uf de nächste Insle“! und isch mit em grosse Schiff devo gfahre. Aso hend mir gar kei Wahl gha, haha. 

Es isch jedoch lustig gsi. De „Bürgermeister“ isch am einte Rueder gsi und e Frau am andere. Sie isch jedoch nid so nocho. Ich ha sie gfroget obi helfe söll, sie het natürlich nid nei gseit. Ich bi den aneghocket und ha mit em Captain zemme gruederet. Er het den 2-3 mol müese sege ich söll mol chli langsamer ruedere, ich hegi z viel Kraft. 

Mir hend den namal en Stopp gmacht det hetz den Kaffi und z Nüni geh. Nach dem sind mir den richtig Insle Taquile. Mir hend den en Rundgang gmacht und sind ca 4 Km quer über d Insle gloffe und hend verschideni Stops gmacht. Es het ganz schöni Wägli gha und viel Blueme ect. 

Jo, mir seit das amel nid soviel aber das isch echt schön gsi uf dere Insle. Mir hend die berüehmte, strickende Männer gseh. D Manne stricket und d Fraue spinnet. Gar nid mol so verkehrt, nei Spass. Nach dem sind mir den go z Mittag esse binere Familie. Es het Forelle us em See geh, und sie isch mega guet gsi. 

Denoch sind mir den wieder langsam retour as Festland. Mir sind no biz dur Puno gloffe und het d Stadt besichtiget. Am Abig sind mir den recht fertig gsi. Mir hend was gesse und es Kartespiel gmacht und sind denoch tot is Bett glege. Am früehne Morge ischs den witer gange. Mir sind am 7:00 an Busbahnhof, jedoch hett de biz anderst usgseh wie mir üs da normalerwis gwöhnt sind.


 Mir hend 9 h gha bis uf Cusco jedoch mit 5 Stopps, het eus guet gfalle will den d Busfahrt nid so langwilig isch. 

Mir hend die schönst Kirche agluegt wo mir bis ezt in Südamerika gseh hend, gaaaanz viel Gold. Mir hend es alts Inka Dorf aglueget wo no d Grundstei gstande sind, leider hetz gregnet und mir sind relativ zügig wieder witer. Uf de höchste Stell vo de Busfahrt uf 4300 M.ü.M simmer anen schöne Ussichtspunkt, es Museum go ahluege und z Mittag hetz au no geh inklusiv Live Musik, typisch peruanisch.

 Am Abig bi Rege sind mir den in Cusco acho. Me vo Cusco im nächste Blog.

Bis Bald

Ernesto Y Muriel

Next Stopp: Cusco

Antworten

Peru
Reiseberichte Peru