Copacabana

Copacabana, Bolivien

Erstmal sorry dass mir mit de Blogs so im Verzug sind. Es Internet do usse isch zum Teil recht… mmmmh wie söllemers sege… Beschisse.

Mir hend am Morge früeh de Bus richtig Copacabana müese neh, zum Glück hetz nid zviel Alkohol geh am Silvesterobig. Mir sind us de Stadt gfahre. Mir hend die letzte paar Überlebende vo de Silversternacht gseh uf de Stross umetorkle und hend den La Paz via El Alto verloh. Nach eme Zitli hend mir scho s erstmol de Titicacasee erblickt. En mega schöne Ablick. 

Mir hend den irgendwen müese de See überquere, für das hends de Bus uf alti, verlottereti Flössli verlade. 

Het so gar nid usgseh als ob da wür funktioniere, mir hend jedoch mit eme chline Böötli dörfe as andere Ufer, isch mir glich gsi.

 Nach 4 h wunderschönem, bolivianischem Hochland sind mir in Copacabana acho. Es isch sozege e Feriemetropole für d Bolivianer. Es het en Sandstrand (sehr dreckig) und uf em Seeufer fahred Jetski, Pedalos, Böötli wo Banane mit Lüt umeziend, Standup Paddle und so Luftblose wo me cha drin stoh und wie en Hamster umerenne. Die fahred alli ohni Regle so schnell und nöch wie möglich anenand verbi, s reinste Chaos a dem Seeufer, sehr unterhaltsam. 

Mir hend euses Gepäck de Hügel duruf gschleppt, wo sich euses Hostel befunde het. Bim Ihchecke het de Rezeptionist den gseit „Ah ja, sie hend eusi Suite für 1 Nacht“! Mir hend eus beid aglueget und glichzitig gseit „SUITE“? Ich ha es gmischts Gfühlt gha, einersits Freud, andersits hani Angscht gha das die Suite ca. 200 Franke kostet. Sie het jedoch nur 22 Franke kostet und sie isch mega gsi. Mir hend de best Blick uf Copacabana gha, riese Duschi, es Cheminee und es hammer Restaurant. Es isch alles chli im griechische Stil baue gsi. 

Mir hend fein z Nacht gesse und sind zimli gli zruck id Unterkunft. Da es uf 3800 Meter isch, wird’s zimlich kalt. Mir hend denn das Cheminee agfüret, wen me scho eis het.

Am nöchste Morge hend mir früeh use müese, weret em packe hend mir jedoch Bsuech übercho und es isch alles dopplet solang gange. 

Mir hend eusi Rucksäck bim Busunternehme wo eus spöter nach Puno brocht het abgeh und sind ufs Boot. Mir hend en Tagesusflug gmacht uf die grösste Insle uf bolivianischer Site. Isla de la Luna und Isla del Sol.

 S Schiff isch los ghötterelet und ich ha mich schnell mol gfroget ob sie eus veräpplet. Da Schiff isch biz schneller wie Schritttempo gfahre. Zum Glück ischs mega eng gsi well z dritte uf eme chline Bänkli hesch müese hocke. Ah ja, die wo nebet mir ghocket isch het natürlich au die meist Zit probiert die schrege Tön wo sie gsunge het z verbessere, het jedoch nid funktioniert. Nach lange 2 h sind mir den bi de erste Insle acho. Het es paar Ruine gha und mir sind uf de Spitz vo dere Insle gloffe. Echt mega Ussicht gha. 

D Insle selber isch relativ Touri mässig gsi. Mir sind zruck ufs Boot und es isch witer gange, nach 2 Minute heter jedoch gmerkt das er 1 vo dene 2 Motore vergesse het zum Volltanke und mir sind NO langsämer mit nur 1 Motor uf die ander Insle. Rundume hend eus all überholt und hend gwunke. Dur da das nurno 1 Motor gloffe isch hend mir au en dementsprechend meh Wellegang gha. D Lüt hend agfange kotze, super. Irgendwen sind mir denhalt glich acho. Isla del Sol isch riesig, mir hend jedoch nur 2 h Zit gha. Aso zum richtig erkundige hesch kei Zit gha und a dem Hafe hets nurso vo Tourisache gwimmlet. Mir hend was gesse und sind wieder richtig Copacabana. Zerst hend mir jedoch müese uf de Trottel vo „Capitän“ warte well er lieber 2 h lang gschlofe het und wichtiger gfunde het am Handy umetrucke. Ufsmol isch er nervös worde isch vo Schiff zu Schiff gfahre zum Most sueche. Nach dere ewige Schiffahrt sind mir in Copacabana acho und entlich isch de Usflug fertig gsi. Ich has biz en Seich gfunde. Het zwar scho 2-3 schöne Örter gha aber jo, defintiv z langwilig mit dem doofe Boot. Aber es het nur 4 Franke kostet, vo dem her..

 Mir sind mit em Bus den is 4 h entfernti Puno gfahre, wo mir mit de Muriel ihrne Eltere abgmacht hend. Mir werdet die nächste 2 ½ Wuche mit ihne durch Peru reise. De Zoll isch wiedermol ultra lästig gsi. Mir hend über e Stund gwartet bis mir de Stämpfel becho hend, zuesätzlich hend mir euse Pass no müese selber kopiere für 1 Stutz. Mir sind den acho und direkt is Hotel. Mir hend den d Andrea und de Reto troffe und no öbbis gesse und die erste Gschichtli verzellt. Meh über Puno im nächste Blog.

Bis Bald

Ernesto Y Muriel