ninanesto

vakantio.de/ninanesto

La Paz / El Alto

Veröffentlicht: 05.01.2018

La Paz

Nach dem mir eues super Hostel verloh hend, het eus es Taxi an Busbahnhof brocht. Mir hend schwer ghofft, das mir en super Bus verwütschet. Biz komisch isch gsi das mir hend müese euses Gepäck ihchecke wie am Flughafe. Mir hend den nacher zwei Stockwerk müese abe laufe, zu de Plattforme. Kurz nachdem mir dusse bi üsere Plattform acho sind hends euses Gepäck agliferet. Wie? Sie hend d Koffere ame S-Hogge ighenkt und hends via Fläschezug vom zweite Stock abe geh. Het zimlich lustig usgseh, all paar Sekunde hends fast en Mensch am Kopf verwütscht wo une dure gloffe isch. Euse Bus wer am 20:00 gange. Am 19:10 isch den en Bus ane gfahre und mir hend eus entschiede zum direkt izstige. Als er jedoch am 19:30 de Rückwertsgang igleit het sind mir schnell wieder ufgstande und zum Fahrer grennt. Jo, es isch de falsch Bus gsi. Gad namal Glück gha. Kurz vor de achti isch den de Richtig ane gfahre und mir hend Platz gno. De Bus isch echt guet gsi. Die erste 2 Stund sind jedoch zimlich unruhig gsi. Nach ca. 8000 Kurvene ischs den jedoch besser worde und mir hend au chöne pfuse. Pünktlich 30 Minute vor de Akunft sind mir den verwachet. Mir sind dur El Alto gfahre, das isch d „Ahangsstadt“ vo La Paz. Es isch e zweispurigi Stross und links und rechts hetz Schotterstrosse wo voll mit Strosseständ, Läde, Automechanikerbudene, WC Schüssle Verkäufer u.v.m. Zu 90% sind d Hüser nid fertig baue. Das het de eifachi Grund: Sobald es Hus komplett fertig isch, muess mer die volle Stüre zahle. Solang me jedoch am baue isch nid, so eifach goht das do. Drum gseht me ganz viel wie de ersti Stock vom Hus eifach es Muurwerk vo Rüm isch und obe druf isch den s fertige Hus druf baue worde.

Es biz witer vorne hend mir den s erstmol La Paz zGsicht becho. Unglaublich, en riiiiiieeeesige Talkessel voll mit dene halbfertige, bachsteifarbige Hüser, sowit me cha luege. Mir sind ade Schibe klebet und hend gstunet wie das alles funktionert. Überall het mer au scho die typische Seilbahne gse, es super System.

Nach dem mir mit em Taxi im Hostel acho sind hend mir bereits eusi „Familie“ für euses Wiehnachtsdinner kenneglernt. Mir sind e super Gruppe gsi. Vo Arbeiter vom Hostel bis zu de Reisende, mir hend eus alli gad super verstande. De Marco, euse Koch, het eus es super Wiehnachtsdinner anezauberet am 24igste Dezember. Mir sind ca 14 Persone gsi, alli ame riese Tisch. Im Hintergrund isch den die typischi Wiehnachtsmusik gloffe, Kerze hend brennt und mir hend Platz gno. Es het es traditionells, bolivianischs Wiehnachtsesse geh. En junge Bolivianische Koch het alles geh zum eus en guete z'Nacht zbüte, de Marco.

Zur Vorspies hetz e Erdnuss-Suppe mit Pasta und Gmües geh. Zur Hauptspies e Art vo Pouletbrote/Roulade gfüllt mit Käs, Ei und Bärlauch. Dezue isch üs Süessherdöpfel, Rüebli, Zuchheti, Tomate und Spinat serviert worde. Als Dessert hents den Schoggimouse geh. Mhhhh isch das fein gsi, für 10 Franke.

Am zweite Tag sind mir den gege de Obig as berüehmte „Cholitas Wrestling“ gange. Fraue wo sich im Wrestlingring Saures gänd.

Mir hend natürlich ide erste Reihe müesse Platz ne. Es het den agfange mit zwei rechte Amateure, quasi d Vorband. Nach jedem Kampf ischs Niveau höcher worde.

D Stimmig isch gstige, vorallem bi de Iheimische. Sie hend agfange leeri Pettfläschene abe rüere, Popkorn, Cola ect wenns eine nid hend möge. Die eint wo kämpft het han ich überhaupt nid möge, well sie unfair kämpft het. Klar es isch alles Show gsi. Sie het den d Ehrerundi ums Publikum gmacht und ich ha ihre „Buuuh“ nogruefe. Sie het sich umtrüllt und isch zu mir anecho, ca 5 cm vor mis Gsicht. Sie isch dick gsi, het nurno zwei Zäh gha und hessig dri glueget. Sie het gfroget:“Wiessoo“? Ich ha wieder „Buuh“ gseit. Kurz drufabe hetz klöpft. Sie het usgholt und mir e Flättere geh. Es isch zimlich schnell zimlich Warm worde uf minere linke Bagge. Natürlich het die ganz Halle tobet und alli hend glachet. Sie hetz natürlich au nid bös gmeint, sie hetz eifach nid gad so zeiget.. jedoch hetz de nebet mir viel schlechter troffe, de het nämlich en Kuss ufs Muhl vo ihre becho. Do bini also mit de Flättere eidütig besser gfahre, haha. Nach ca. 1 h ischs den langsam usgartet. Sie sind z vierte im Ring gstande und sind sich usserhalb vom Ring nogseklet. Wend e zTrinke Fläsche vor de Bei gha hesch, hends sie die klaut und de andere aglärt oder trunke und aschlüssend agspuckt. Stüehl sind gfolge und s Publikum isch usgrastet und hend au agfange Waar ume rüere.

Nach 2ehalb Stund hend mir den chöne goh, isch gnueg lang gsi. Mir hend den de Talkessel vo La Paz i de Nacht gseh, immer wieder idrücklich.

Am nächste Tag isch den en es befründets Päärli vo Brasilie zu eus is Hostel cho. Die hend mir in Brasilie, Florianopolis kenne glernt (Matei&Rachel). Mir hend de Julito vom Hostel gfroget ob er mit eus e Tour chan mache. Mir sind den 8 Persone gsi und sind losgloffe. Zerst chli dur d Stadt, s Presidentshus, verschideni Pärk und d Altstadt. Nach dem sind mir den mit de Gondle richtig El Alto. Die neue Östrichische/Schwizer Gondle sind echt konfortabel. Es passt so gar nid i die Stadt, so moderni Waar. Usserdem ischs au komisch ohni Ski die Gondle z hocke. Vo de „Bergstation“ hend mir wieder en super usblick gha.

Aschlüssend sind mir richtig „Hexe-Markt“. Dete verkaufets Sache für Ritual, unteranderem Lama und Alpaca Fötus, verschideni Krüter und au Schrumpfköpf.

Es het den au chlini Hüsli gha wo die Hexe Zuekunft vorher seged. Mit ganz viel verschidene Methodene. D Fraue vo eusere Gruppe hend den umsverrecke det ie welle. Mir sind den bi me Hexer glandet. Er het Zuekunft mit Coca Blätter vorher gseit, indem er sie irgendwie uf de Tisch klöpft het und den e Coca Stross gse het. Mir hend beid gseit „De Seich machet mir nid“! Nach de zweite Vorhersag heds eus den aber glich greizt, eifach us Spass. Mir hend e super Zuekunft vor eus, en sichere Tripp und es gäbi i de nächste Jahre en Bueb, haha. De nächst isch euse Kolleg vo Neuseeland gsi. Nachdem er die Blätter anegworfe het, isch er stumm blibe. Er het agfange de Kopf schüttle.. Er hegi uf de Reis nid viel Glück, und die Liebe gsehts au schlecht us für die nächste Jahr. Aber wen er ihm en Hase und en rote Güggel bringt macht er es Ritual mit ihm und den loht er de Hase und Güggel frei und sie träget den s Pech mit. Er isch würklich niedergschlage gsi nach dem und het verzwiflet umegfroget wo er die Vicher cha kaufe.

A de folgende Täg sind mir immer wieder chli i de Stadt umetorklet, hend d Freewalking Tour gmacht. Am einte Tag sind mir den is Valle de la Luna. Zum irgendwo ane cho ischs eigentlich relativ simple. Me stoht mit zemmekniffne Auge an Strosserand, und luegt ufd Frontschibe vo de Minibüssli und probiert den zwüsched dene 20 verschidene Schilder z erkenne, welle devo a de Ort anefahrt wo me will.

Mir hends gschafft und hend ca 50 Rappe zahlt für e knappi Stund Bus fahre. Uf em Weg is Valley het sich den La Paz vo sinere schönschte Site zeiget.

Mir hend das Moon Valley nach 2 h besichtiget und sind wieder retour.

Am folgende Tag het eus den de Julito, de wo au die Tour mit eus gmacht het zum Geburtstag iglade. Mir sind den ca 2 h is Land use gfahre. Nach 10 Minute hend mir aghalte zum en Hund izlade. Die Bsitzerin het im neue Appartement kein Hund dörfe ha und drum het sie de Hund am Julito gschenkt und de het en den mit is Buurehus vo sine Eltere gno. En riese Tollpatsch, de Hund. Er isch über all eifach drüber kletteret, hindere- füre, ufe abe. Es isch es zimlichs Kalb gsi und sehr kräftig.

Nach 2 lange Stunde sind mir den acho. De Vater vom Julito het eus herzlich Willkomme gheisse. Als Begrüessigsdrink hetz öppis speziells geh. Er het zwei Küeh gholt. Mir hend is Glas biz Schnapps due und aschlüssend het er d Milch direkt vo de Kueh is Glas gfüllt.

Dezue hetz selber gmachte Weichkäs geh. Mir hend den am Roco Loco (De Hund) sis Hundehüsli ufbaue.

Mit ere Leine und eme Hering im Bode hend mir denkt das er gnueg agmacht isch. Wo jedoch die erst Kueh duregloffe isch het er Ahlauf gholt und die Leine het schnell de Geist ufgeh.

Nach dem hend mir en Strick gholt, wie für en Muni. De Strick hetti scho ghebet, HETTI.. Jedoch hets den halt s Halsband putzt. Jop, er mues sich no as Landlebe gwöhne. Mir hend den Grilliert, Trunke und chli Räubergschichtli verzellt.

Mega interessant gsi mol das Landlebe kenne z lerne. Mir hend natürlich nix für de Julito gha, da mir ihn zwenig guet kennt hend. Mir hend jedoch gwüsst das er mega uf die selber gmachte Armbändeli abfahrt. Mir hend eus den nach em Geburtsatag ufd suechi nach Schnur gmacht. Das glaubt eine ellei nid wie kompliziert das da i dem La Paz cha si. JEDE aber würkli jede wo mir gfroget hend, het mit einere Überzügig gseit „Ah Fade, jo sicher gad do vorne, nu no biz witer“! Mir sind den glaubs eimol um ganz La Paz gschickt worde. Ich bi uf 180 obe gsi well eus immer jede witer gschickt het. Nach eme halbe Tag umelaufe, froge, flueche und halbe brüele sind mir denn dere Sach immer nöcher cho. En riese Markt wos wiedermol vo Wc Schüssle bis Schuflene alles verkauft hend. Wend jedoch det noch Schnur gfroget hesch, hends de Kopf gschüttlet und verneint als ob noch Kokain gfroget hesch. Schlussendlich sind mir den aber fündig worde, mit viel Glück. Halleluja, öppis vom kompiziertischte wo mir in Südmaerika bis jetzt erlebt hend!!!!!!

En Tag spöter isch au schowieder de letzt Tag i dem Hostel cho. Es isch wiedermol es super Hostel gsi. Suber, mega tolli Arbeiter wo mir is Herz gschlosse hend und e super Lag. Mir hend au jede Abig dete super z Nacht gesse, für jewils 4 Franke. Usserdem het de Nochbur en „Garte“ agrenzend a euses Zimmer gha. Mir hend den immer wiedermol die beide Hündli zu eus is Zimmer ie gschmuglet und hend echli kuschlet mit dene. Wo mir sie s erstmol ieloh hend (isch für sie glaubs würklich au s erstmol gsi) hetz den eint vor Freud fast putzt.

Mir hend den uschecket und hend den ines 5 Stern Hotel ihchecket. Mir hend eus öppis gönnt für Silvester.

Es isch eifach nur grandios gsi. Mir hend es XXL Kingsize Bett mit ere Ussicht über La Paz gha.

Mir hend den eigentich au de ganz Tag im Zimmer verbrocht und hend eifach mal nüt gmacht. En Tag spöter, an Silvester sind mir den zum z’Nacht iglade gsi in üsem alte Hostel. D Stimmig isch aber leider nid gad mega guet gsi, mir wüssed au nid wieso. Sind halt alles neui Gäst gsi und die hend es eiges chlises Grüppli bildet. Sie sind den nachem zNacht au ufsmol ufgstande und gange, keine weiss wo ane. Mir hends jedoch lustig gha mit de Hostel Mitarbeiter. Am Julito hemmer denn no euses selbergmachte Armbändeli/Geburtstagsgschenk geh. Nid normal wie fest er sich gfreut het, isch halbe ad Decki gsprunge 

Mir hend eus den am 23:30 dezue entschide zum zruck zum Hotel goh und eventuell vo det us s Führwerk luege. Das hend mir den au gmacht und es isch eifach nur MEGA gsi.