ninanesto
ninanesto
vakantio.de/ninanesto

Cordoba coronel

Veröffentlicht: 07.11.2017

Cordoba

Wo mir in Cordoba acho sind, händ mir eus gad direkt z Fuess richtig Hostel gmacht. Dete acho hend mir z Morge gesse & besproche was mit mache chöntet. Mir hend eus den entschiede zum eh Free Walking Tour z'mache. Das isch immer guet, det lernsch Lüt kenne & gsesch Virteli ide Stadt wod sus nid würsch gseh. Mir sind losgloffe und ca nach 2 min het eus den en Hund überholt wie en Blitz. Mir hend ihre natürlich müese pfiffe als obs euse Hund wer. Sie trüllt sich um & fangt a schwänzle. Mir sind den sicher 20 min bis zum Treffpunkt gloffe und de Hund isch eus immer schö nogloffe. Uf em Platz acho hend mir eus zude Gruppe dezuegschlosse. Nach 15 min sind mir den losgloffe. Jep, de Hund isch mit eus mitcho. Nach dem mir a de erste Chille acho sind het de Hund natürli nid ie dörfe.

Nach 10 min Chille Besichtigung isch sie dusse schwänzelnd dete ghocket & het uf eus gwartet. Sie het mit eus die ganz Tour mitgmacht. Fast 3 h lang isch sie eus nogloffe, het vor de Gebäude gwartet und het zum Teil sogar dörfe mit ie cho. Mega herzig, echt! 

Lustigs Detail isch no, das irgend en Heini vo Cordoba, het de Stadt welle e Gschenk mache. Er het mit dere Statue welle d Antarktis ehre, demit au d Ishäre wo det lebet. Jo nur s blöde isch, ide Antarktis gitz gar kei Isbäre. Sie hend en den aber glich stoh loh.

Nach de Tour sind mir na ines Kaffi ghocket und hend mit eme Päärli us Amsterdam bizli über eusi Reise gredet, de Hund natürlich underem Tisch. Nach dem sind mir richtig Hostel retour, de Hund hend mir leider erfolgrich chöne abwimmle. Sie het en schöne Nomittag gha & het sogar e Free Walking Tour gmacht.

 Am Abig hend mir den selber z'Nacht kochet. Isch also e rechti zuemuetig gsi, die Pfanne hend usgseh als ob öbber mit eme Nashorn het müese kämpfe und die Pfannene sini einzig Waffe gsi wer. Verbület und Verbrennt bis an Haag abe. Aber es isch den gange.

Am nächste Tag hend mir welle packe. Ich has zimlich komisch gfunde, das ich soviel Platz im Koffe ha. Ufsmol hani mir eis an Kopf ghaue "Ich Vollidiot han mini Nigelnagel neue Wanderschue im 12 h entfernte Buenos Aires vergesse"! Ich ha gad sofort mit em Hostel kontakt ufgno. Ca am 11i han ich den de Besitzerin vom Hostel gschribe, sie het gseit sie luegt sofort sie mues nur schnell use. Jo ich ha gwartet & gwartet & nomol gwartet. Ca am 3 han ich ihre den gschribe und sie het gmeint sie seg am 6i im Hostel. Guet, irgendöbbis hend mir ja na müese mache. Mir sind id Stadt & hend no e anderi Tour gmacht. I de hälfti vo de Tour isch wieder en Hund mit eus mitgloffe. De chli wahnsinnig, en junge Labrador, hets gliebt de verbifahrende Autos quasi in Hinterpneu z'bisse. Man het da nerve brucht. Es het en recht moderne Stadtteil, ali junge Lüt sind do gsi. Aber es isch ja die gröst Universität vo Argentinie dete.

Nach de Tour sind mir denn all zemme eis go trinke & hend no z Nacht gesse. 

Nach dem sind mir zruck is Hostel. Ich ha es Foti vo mine Wanderschue uf em Handy gha. Leck, schwein gha. Ich ha den kurzerhand öbberem gschribe, wo mir in Buenos Aires kenne glern hend. Deseb wohnt in Santiago de Chile und mir hend eus e no welle treffe ih sinnere Heimatstadt. Er het den gseit er gechis go hole und gits mir den bi ihm Dehai. Perfekt, so viel Glück. Die Schueh vergiss ich nüme so schnell. Nach dem alles klärt gsi isch hend mir eus au scho uf de Weg richtig Busbahnhof gmacht, da mir a dem Obig no witer nach Mendoza zoge sind.

Bis bald

Ernesto&Muriel

Next Stop: Mendoza (Die Wein-Stadt von Argentinien, Ernesto freuts) 

Antworten

Argentinien
Reiseberichte Argentinien
#cordoba#argentinien#südamerika#southamerica