Mendoza / Uspallata

Mendoza

Mir sind überd Nacht vo Cordoba uf Mendoza gfahre. Scho vom Bus us het me die mächtige Ande gseh. Sehr es idrücklichs Bild gsi. Am Sunntig Vormittag hend mir eus den chli erkundiget, wa me do so mache chan. S einzig was zitlich no drinn gläge isch; de RIESIG Stadtpark go bsueche. Ih de Mittagssunne hend mir eus den uf de Weg richtig Park gmacht. Es isch es herzigs chlises ruhigs Städtli. Im Park acho heds aber kei versprocheni Velos gha wie die vo de Reception eus verzellt het, Doofi. Das heisst no meh laufe. Mir sind den langsam dur de Park gschländeret. Eimol quer dure. 

Nach ca. 2 h laufe hend mir den en Ussichtspunkt erreicht wo mer en super Blick überd Landschaft rund um Mendoza gha hend. 

Aber mir sind fix und fertig gsi. Es isch heiss gsi, mir sind ewigs gloffe und hend z wenig z trinke debi gha. Mir hend eus den entschide zum en Bus neh, wen denn mol eine wür fahre uf dem schiss Hügel. Kein Bus cho. Nach ca 20 min isch mol en Taxifahrer verbi bloset, ich han em pfiffe und er het aghalte. Er het mir erklärt vowege kein Taxometer, er nöd schaffe. Egal bring eus zum Hostel. Ohje, gfahre wie en Geisteskranke. Us irgend eme Grund het ers grausam pressant gha. Hauptsach „dehai“. Am Abig sind mir den is Zentrum, ufd suechi noch eme guete Steakhouse. Und mir hends au gfunde, ich ha es guets T-Bone Steak gha, und d Muriel en feine Risotto. 

Uf em Retourweg sind mir ame riesige Flohmark verbi gloffe. Musig hends gspielt, tanzet hends und ganz viele Strossekünstler hets gha.

Am zweite Tag sind mir bezite ufsgstande da mir mit em Bus chli us Juhee usegfahre sind. Ca zwei Stund ischs gange. Nur scho d Landschaft wer d Zit und s Geld wert gsi. Under anderem sind mir vo dem wunderschöne See überrascht worde.

In Uspallata acho sind mir den is Touriste Büro. Leider isch es scho ca 2 am Nomittag gsi, also biz spot dra für die grosse Toure. Sie hend eus den aber empfole es Mountainbike z miete und dete hine de Berg duruf fahre. Mich hetz nid gross gstört, d Muriel hetz eher weniger lustig gfunde mit mir & eme Mountainbike duruf z fahre, da ich jo de böösi Trainer bin wo immer schimpfe duet….ich meins jo nur guet :-P. Mir hend ufd Velos gwartet wo ufsmol eh Hündin eusi Ufmerksamkeit uf sich zoge het, eimol meh jo. Sie isch zuckersüess gsi und sie het grausam Schwein gha, hend mir sie nid eifach ihpackt.

Mit de Velos gsattlet hend mir eus uf de Weg gmacht. Die Landschaft isch unglaublich gsi. Berge so farbig wie en Regeboge. 

Ich ha die ganz Zit gseit „lueg mol det, oder lueg mol det“ D Muriel isch jedoch anderst beschäftiget gsi, de saublöd blöd blöd doof Hügel duruf fahre. Uiiiii het sie gschumpfe mit mir. Dobe acho sind jedoch alli böse Wörter verschwunde und sie hetz au chöne gnüsse. Mir hend die schö Landschaft gnosse, hend uf em Rückweg 3-4 mol aghalte und hend chli gfötelet.

Am dritte Tag hend mir eus uf de gross berüchtigt Wii-Tour gmacht. Freude herrscht, scho sit paar Mönet red ich vo dere. Mir hend z Morge gesse, ich bi bizli nervös gsi. Mir sind mit de ÖV ca 40 min is Dörfli Maipu gfahre. Dete acho hend mir Velos gmietet. Mir sind ca am 11i die erste Wii-Farm acho und ich ha mini erste 3 Gläser beste Rotwii vo Mendoza degustiert. En Malbec, Merlot und Syrah. Ich bi begeisteret gsi und has au gad direkt gmerkt ih dere Mittagssunne. 

Mir sind zude zweite gradlet, isch scho biz lustiger gsi zum Velo fahre. Mir sind anere Hippie Farm acho, wos alttraditionell Wii herstellet. Wieder 3 sind mir zum Opfer gfalle. Termpranillio, Cabernet Sauv. und namal en Merlot. 

Hoppla ufpasse, öbbis esse wer kein Seich. Mir sind zude nächste Farm im Slalom gfahre. Mir sind jedoch vo de Gäst im letzte Degustationsort gwarnt worde, essed det nüt. Mir sind aber doch biz beschwipst gsi und hungrig das mirs nid hend chöne loh. Janu, de Wii isch guet gsi (weiss nüme was ich gha han, aber sicher 2 vo dene 3 Gläser sind Wiiswi gsi. S Esse jedoch zum vergesse. Mir sind nochher zruck zum Bike Vermieter, hend d Velos abgeh und er het gseit „heeeey ezt gits Happy Hour ih minere Bar“. Mir sind id Bar ie und vo 17:00-18:00 hets Wii geh soviel wied hesch möge trinke. Haha, das isch den biz z viel Wii gsi. Relativ lustig sind mir mit em Stadtbus zruck uf Mendoza, d Hälfti vom Bus isch bsoffe gsi.

Am zweit letzte Tag sind mir mit Rege und Kopfweh gweckt gworde. Mir hend eus den entschide is Natur Thermalbad z go. Es isch ca 1 h weg vo de Stadt gsi. Zwüsched Felse ime Taal isch das Spa Hotel gsi.

 En Traum. Die Ussicht wo mir hend dörfe gnüsse, en Traum. Mir hend dezue no z Mittag becho, es mega Buffet und no 1 h Full Body Massage

Ja, mir hend eus öbbis gönnt.

Tag der Abreise. Mir sind so positiv überrascht vo Mendoza, hend so viel Sache gse wie mir nie denkt hetet. Mir sind uf de Bus und sind richtig Santiago gfahre. Genau de glich Weg wie uf Uspallata. De Weg hend mir jo kennt, noher ischs doch no es Stuck wit idrücklicher worde. Die Landschaft, eimolig. Felse wie Regeböge. Riesigi, Schnee überzocheni Berge. Mir sind bis 3300 M.ü.M gsi. Z Oberst obe hend mir den die chilianischi Grenze übertrette. 

Nacher ischs schnell wieder Berg abwerts gange. Uf de Chile-Site ischs den wieder sehr grüen worde. Schöni Dörfli wo ide Mitti de Fluss dure gange isch mit em frische Schmelzwasser. Wunderschön. Ezt sind mir in Santiago acho wo mir euse guet Kolleg de Marco treffet. Und de Carlos wo mini Wanderschue vo Buenos Aires mitbringt.

Bis Bald

Ernesto&Muriel

Next Stop: Santiago de Chile