Valparaiso

Veröffentlicht: 15.11.2017

Valparaiso

Mir hend vo Santiago us en Tagesusflig nach Valparaiso gmacht. Das isch eh Stadt wos vor vielne hundert Johr fälschlicherwis mit de Schiff acho sind, eigentlich hends uf Santiago welle. Sie hend den halt en Hafe det baue. Isch es Zitli lang de grösst Hafe vo Südamerika gsi. Hüt ischs hauptsächlich nur no Import. Und die ganz Stadt isch farblich gstaltet, es mega Erlebnis gsi.

Mir sind acho bi bedecktem Himmel. Müri het sich scho Gedanke gmacht, wells den kei gueti Föteli git. Ich bi jedoch optimistisch gsi, da s Wetter do no schnell wendet. Mir sind richtig Startpunkt vo de Freewalking Tour gloffe. Uf em weg hend mir natürlich ca 100 mol aghalte bi verschidene Hünd.

Under anderem hend mir eis ganz lustigs Kätzli gfunde. Sie het de Name Schmuusebusi namal anderst gschribe. Sie het es 3 Phase Konzept vo schmuuse.

Abchecke obs es guets Fraueli isch!

Langsam druf ue klettere!

Und d Stellig sichere uf em Rugge!

Uf em Platz acho hend mir gseh das es 2-3 blaui Fätze im Himmel geh het. Es het langsam ufgrisse. Mir sind den ines Kaffi ghocket und hend gwartet bis d Tour los gaht. Wos den sowit gsi isch, hend mir en strahlend blaue Himmel gha und alli sind glücklich gsi. :-D Mir hend lustigerwis öpper bi eus die Gruppe gha, wo scho in Rio mit eus e Tour gmacht het. Mir sind dur d Gasse gloffe und hend all die Wandmalereie/Graffitis bewunderet.

Zum de Teil erreiche sind mir mit some komische Bähnli de Berg uf gfahre.

Mir hend aber au meheri Stäge müese duruf laufe, aber au die sind nid eifach normal gsi.

Nach de Tour sind mir na für 3 Franke mit eme Boot eimol um de Hafe gfahre zum die aktive Marine Boot go aluege und all die Seeleue/Robbene wo sich ide Sunne entspannt hend.

Nach dem sind mir na bizeli umegschländeret. S lustige isch, die Stadt het mega viel Kolonie gha. Unteranderem, Kroatischi, Dütschi und au Schwizer. Darum hetz au Fürwehrautos wo mit „Feuerwehr“ agschribe sind. D Trolleybüs sind die vo Luzern, Jahrgang 1960-1980. Sind au agschribe mit „Obwalde, Niedwalde & Luzern“. Lustig.