Buenos Aires

Mir sind vo Colonia del Sacramento mit em Schiff ca 1 h noch Buenos Aires gfahre. Wo mir abgfahre sind hend mir no nüt gseh vo de Stadt. Doch scho nach 20 min fahre hend mir langsam d'Skyline vo Buenos Aires gseh. 

Mir sind mit em Taxi Sevice Uber is Hostel. Es isch strahlend blaue Himmel gsi & mir hend schnell eusi Sache deponiert und sind schowieder us em Hostel. Mir sind z Fuess los um üs chli en erste Idruck z'verschaffe. Es isch namal recht grösser wie Montevideo. Blöd isch, das nur 2000Pesos chasch abhebe, das sind ca 60 CHF. Und me mues jedesmol 5 CHF Wechselkurs zahle. Mir hend mit eusem chline Stadtplänli d Stadt abgsuecht noch de historische Gebäude, Pärks ect. Und es het einigi mega schöni drunder gha. 

Das isch Kongresszentrum vo Argentinie. Unteranderem sind mir au zu eme Monument gange. Det isch quasi de Time Square vo Buenos Aires. 

D Muriel het ca 10 min lang müese det stoh bis die Fahne mol einigermasse schön ersichtlich gsi isch! Ich ha ih dere Zit bizeli umeglueget und mir isch gad es Hotel is Aug gstoche. Es älters Gebäude, höcher wie all rundume. Panamericana Hotel het das gheisse. Uf em Dach hetz den wie e Therasse gha mit ere Glaskupple. Es sogenannts Rooftop. Ich ha de Muriel den gseit "chum ezt müemer det ue, vo det hend mir e riese Ussicht"! Sie het nur glachet und gseit "probieremers". Üs het en Typ mit em Azug bi de Igangstüre den d Türe ufgmacht (mit eme strenge Blick) mir hend natürli kurzi Hose agha, de Tagesrucksack ect! Ide goldige Lobby hetz nur so gwimmlet vo Schlippsträger. Mir sind den so schnell wie möglich richtig Lift gloffe. Det han ich ca 50 mol de Knopf druckt bis de Lift entlich cho isch. Mir hend beid s Lache müese verkneife wo mir igstige sind well eus ali so gmusteret hend. Dobe acho sind mir direkt e witeri Stege duruf gloffe. Ufsmol ghöremer öbber uf Spanisch sege "hallloooo, cha ich ihne helfe? Was suechet sie"? Mir sind stoh blibe und ich ha überleit was ich ez söll sege.. Ich ha den gseit mit wellet was go trinke. Het sie eus mit ernestem Blick den gfroget ob mir Gäst seget. Ich ha den relativ innerlich nervös gseit "Sicher, Zimmernr. 421"! Sie het agfange lache, het sich entschuldiget und het gseit "Bienvenia a Panamaricana" jo danke gell, haha! Dobe hend mir e mega Ussicht gha. 

Irgendwen sind mir den wieder abe und wieder richtig Hostel. Mir hend selber kochet und somit sehr guet gesse. Am Abig sind mir den zemme aneghocket und hend eus mal notiert was mir no alles mached bis mir am 2 Januar de Muriel ihri Eltere in Puno, Peru treffet. Und mir hend gmerkt das mir gar nid soviel Destiantione hend. Mir hend jedoch s Glück gha en Spanier bi eus im Dorm z ha wo in Santiago de Chile wohnt. Nebst dem das er eus zu sich iglade het, het er eus au na ca 10 schöni Destinatione gseit in Chile & Bolivie. Am nächste Tag hend mir mit de Muriel ihrem Arbetskolleg abgmacht. Mir sind zemme en Kaffi go trinke und hend chli eusi Erlebniss ustuschet. Am Namittag sind mir den inen Park. Wo mer anschinend mega viel Tier gseht. De Schissdreck, es isch ca 40 Grad gsi, beid kei Käppli agha. Mir sind ca 7 km dur de Park gloffe, hesch müese so en Rundgang laufe. Mir hend 2-3 Seerattene gseh und ein Leguan. Meh nid, und mir hend beid nid möge laufe. Janu, biz Pech gha eventuell, aber isch gad biz Training gsi. Mir hend insgesamt 30 Km z Fuess gmacht die gsammt Zit do. Isch den scho ordentlich. Aber schön isch de Park gsi.

Mir hend eus den entschide zum namal e Nacht z blibe da mir beid unbedingt hend welle e Tango Show luege. Mir hend eus den am Abig mit eusne Kollege vo Florianopolis troffe (es Päärli vo Manchester, UK). Am 7ni isch es los gange. 1 h Tango Tanzschuel. Ohjeee am Afang ischs gar nid gloffe, den hets ufsmol funktioniert. Aber ich glaub da han ich de Muriel z verdanke, sie het eidütig meh Rhytmus im Bluet we ich. Nach dem hend mir den en 3 Gänger übercho (Natürlich es guet Stuck Fleisch) und nacher hend mir den 1 h Show dörfe gnüsse. Es mega Erlebniss. Das het sich eidütig glohnt. Hend zwar 65 CHF zahlt für alles aber das isch nüt. Zuesätzlich hesch chöne soviel trinke wied hesch welle. Sehr feine Rotwii gsi!

Zum Abschluss hets für die wo am beste tanzt hend natürlich no es Sieger Foti geh. 

Jetzt wartet mir im Hostel bis euse Bus eus richtig Cordoba is Landesinnere vo Argentinie bringt. Mir sind beid sehr begeistert vo dere Stadt. Ah ja, zimlich sicher treffemer das Päärli vo Manchester wieder an Silvester in La Paz, das wird ufallfäll lustig. 

Bis bald 

Ernesto&Muriel

Next Stop: Cordoba