Salar de Uyuni

Uyuni

Mir sind via Nachtbus vo San Pedro de Atacama nach Uyuni gfahre. Am Morge am 3 ischs los gange. Es isch bitterchalt worde im Bus, heize kennets do nid. Stattdesse leit sich jede a als ob me wür go skifahre. Es het jedoch gnüegend Deckene geh zum sich zuedecke. Mir sind den irgendwenn a de Grenze acho und ab do isch nüt me gange. Mir hend sicher 1 h gwartet das mir hend chöne s Gepäck kontrolliere und de Pass abstämpfle loh. Nach lästigem warte sind mir den irgendwen witer gfahre, 1 h spöter isch aber de nächst Halt agstande. Militärpolizei het Stichprobe vom Gepäck gmacht und alli Päss aglueget. Es isch wieder e gfühlti Ewigkeit gange. Die alte Lüt hend alli agfange rüefe "Vamooooos", alli sind ungeduldig worde. Ja, irgendwen sind mir den au mal acho in Uyuni. Mir hend den es paar Hostels abchecket und hend schnell gmerkt das die Hostels i dere Stadt nid würkli zuemuetbar sind. Dunkel, stinkig und übertüret. Mir hend eus den entschide es Hotelzimmer zneh. Glücklicherwis hend mir eis gfunde für 12 CHF ide Nacht. Mir sind nach em ihchecke richtig Reisebüros, was es ca. 20-30 i dere Stadt het. Alli sammt bütet die Uyuni Salzsee Tour a. Mir hend eus jedoch im vorhinein informiert und hend eigentlich gwüsst weli Tour mir wönd. Mir sind den is Büro und hend die au buechet, für 105 CHF, 3 Täg inkl Esse, Trinke, Transport & Übernachtig. Es isch jedoch Samschtig gsi & da am Sunntig Wahle ide Stadt gsi sind hend mir erst am Mentig morge los chöne, was nid witerhin schlimm gsi isch, so hend mir eus na ad Höchi chöne gwöhne. Uyuni isch nämlich 3600 M.ü.M hoch! Mir hend den die "Wartezit" mit entspanne verbrocht.

Am Mentigmorge sind mir den as Büro gloffe wo scho 10 Reisendi gwartet hend. Mir hend enand begrüesst und gwartet bis euse Guide mit sim Jeep ane fahrt. Er isch den au cho, en chline 26 jöhrige Bolivianer namens Alberto. Er isch eus vo de erste Minute a mit sinere fründliche, humorvolle und gelassene Art sympathisch gsi. Mir hend den s Gepäck ufs Dach gschnallet und sind los gfahre. 

Mir sind 6 Reisendi gsi. De Steve, en 38 jöhrige Franzos (im Chopf isch er lang nonig 38 gsi), d'Denise, e 27 jöhrigi Dütschi & eme Päärli vo Irland, er het Päddy gheisse und ihren Name hani zum 100ste mol vergesse well er so komisch isch

Mir sind als ersts an en "Lokomotive-Friedhof" gfahre. Det sind die alte Lokene wo s Salz vo Uyuni nach Antofagasta (Chile) an Hafe gfahre hend.

Das gäbt recht ztue für de Stadler

Z Mittag hend mir ih dem Salz Gebäude übercho. Es isch s meiste us Salz gsi. S Esse isch echt guet gsi

Nach em z Mittag sind mir witergfahre und hend z mitzt ide Salzwüesti aghalte und hend lustigi Perspektive-Föteli gmacht. Es isch gar nid so eifach wie me sichs vorstellt. Mir hend die gross Kamera & d GoPro im Auto loh, am beste gohts nämlich mit em Handy. De Alberto het eus ca 20 Min lang zueglueget & het den glücklicherwis ihgriffe, es isch nämlich gar nüt gange.

So hetz vo usse usgseh, komisch oder?

Da isch debi use cho. Ich ha da mir aber nid lang gfalle loh:

Ha d Muriel a de Hand gno und mir sind witer gange!

Witer gohts richtig zu enere "Insle" ide Wüesti. Es gseht nämlich so us, da es en grosse Felsbrocke isch mit 1000ige vo Kaktee druf. Rundume e topfebeni Salzflächi.

Mir hend den uf em Weg zum erste Hostel de Sunneuntergang glueget, es isch gad zimlich chalt worde wo d Sunne weg gsi isch.

Im Hostel acho hend mir gmerkt das ALLES us Salz isch. De Bode, D Wänd, de Tisch & d Stüehl & sogar s Bett, natürlich mit ere Matratze druf. Zum guete Glück isch s Esse nid au nur us Salz gsi. Es isch au relativ chalt worde ide Nacht. Also hend mir s erstmol eusi Schlofsäck usprobiert, die chan me nämlich zemme hänke mit em Rissverschluss. Jo das machet mir glaubs nie meh, da ich en zimliche fägnästi bin. Müri bös.

Am Morge sind mir witer gfahre und hend jensti Stops gmacht, Wüestene, verschideni Lagune und Felslandschafte. 

A dere Lagune hetz aber no zwei nid gwöhnlichi Wüestebewohner gha:

De verschmusti Goldi

Und au es Büsi hetz gha.

Unteranderem hend mir ganz viel anderi Tier gseh, Vicuñas, Viscachas, Flamingos, Lamas, en Struss, verschiedeni Vögel und sogar en Wüste Fuchs.

Do hend mir ihm de reste vom z Mittag geh.

En Struss, anschinend gang selte das me de gseht!

Vicuñas, vo de Familie vo de Lamas.

Das isch en Bolivianische Flamingo.

Das isch en Viscasha, e Mischig zwüsched Hase, Meersäuli und sus no was. 

Und natürlich die traditionelle Lamas.

 De Guide het eus au gseit mir söllet gfasst si well mir a dem Tag vo dene 3600 M.ü.M bis uf 4800 gönd und den aschlüssend uf 4300 M.ü.M au schlofe werdet. Das heisst viel trinke, Snacks esse und au die Koka-Blätter chaue wo helfet d Höchi z verarbeite.

Wie goht da? Me nimmt ca 30-40 Blätter nochanend is Mul, verbissts und lagerets ide Backe wie en Hamster. Immer wieder füre neh und druf ume bisse zums uflockere. Ja me fühlt sich würklich wie e Kueh bim wiederchäue, komisch. Aber es het super gholfe. Jedoch verlürt mer für en Augeblick s Gfühl ide Backe, das chunt jedoch wieder sobald mer d Blätter usspuckt.

Unteranderem hend mir no es Naturspektakel gse, en "Kreisregeboge"

Im Auto ischs immer lustiger worde, d Stimmig isch echt guet gsi. De letzt Stop sind no Geysir gsi. Heisse, noch fuhle Eier stinkende Dampf wo us de Erde bloset. Es het grausam gstunke.

Am Abig sind mir den im nächste Hostel acho. Es isch eis vo de schönste Hostel gsi wo mir je gsi sind. Nid weg de Suberkeit oder de Usstattig. Nei, d Natur rundume und de Charme vom Hostel. Mir hend en Blick uf e Lagoone mit ganz viel Flamingos gha wo bi tüfer Sunne no det gstande sind und die letze Sunnestrahle gnosse hend. Zuesätzlich hetz no e natürlichi Hot Spring gha. En Tümpel wo durch de Vulkan gheizt wird uf agnehmi 35-38 Grad. Nach em z Nachtesse hend mir den d Badhose agleit und sind abe grennt. Binere Ussetemparatur vo 4 grad und enere Wassertemparatur vo 36 grad sind mir is Wasser gumpet. Am Himmel hend mir en gigantische Sternehimmel gse. Es sind sogar 2 Meteorite vom Himmel abe gfloge mit riesigem Fürstreife hine noh, so was hend mir no nie gseh. Und de Mond het sich au vo sinnere Schoggisite zeiget wo er langsam hinderem Horizont ufgstige isch. Mir het d Spieglig über die ganz Lagoone gse, wahnsinn. Mir sind ca 20 Persone gsi, hend es Bierli trunke und en Guide het no mit em Laserpointer d Sterne erklärt. Üs cha er jedoch nüt vormache, mir wüsset langsam guet Bscheid. Weniger lustig isch s usegoh gsi, mir sind fast igfrohre. Schnell schnell sind mir zum Hostel gspeedet und sind in warme Schlofsack. Wells so schön gsi isch sind mir am morge bi Sunneufgang nomol id Hot Springs ine ghüpft. Erneut es Spektakel. Langsam isch d Lagoone vo de Sunnestrahle gweckt worde und somit au d Flamingos. Nach em z Morge sind mir den witergfahre. Mir hend na ein Steihuufe ide Wüesti aglueget und namal e Lagoone. 

Danach hend mir den die einte vo üsere Gruppe ade chilianische Grenze use grüert, die sind witer richtig San Pedro. Mir hend eus den uf de Heiweg gmacht und de het sich zoge. Mir hend jedoch na 1-2 Stopps gmacht.

Alles in allem hend mir 995 Kilometer gmacht und ganz viel schöni Idrück vo Bolivie übercho, neui Fründschafte gschlosse und sehr gueti Fotis und Videos gmacht. Eifach nur Super.

Danke viel mol Alberto für die unvergesslich Tour.

De Links ich de Alberto gsi.

Nachdem mir bim Büro in Uyuni wieder acho sind hend mir üs vom Alberto verabschidet und hend de Bus richig Potosí gno. Das isch dazumals die riichsti Stadt vo de Welt gsi weg ihrene Silber Minene, die au hüt no aktiv sind. Genau die gönd mir go aluege.

Next Stop : Potosí

Bis bald

Ernesto&Muriel