ninanesto
ninanesto
vakantio.de/ninanesto

Itajaí - Beto Carrero World

Veröffentlicht: 22.10.2017

Itajaí

Noch em Nachtesse hend eus üsi Brasilianerfründe an Busbahnhof brocht. Ich ha fest ghofft das es chli en guete Bus isch.. Und den isch en nigelnagelneue doppelstöckige Car ane gfahre. Mir hend eus verabschidet und sind igstige. En super Car, würklich, ich ha Freud gha. Am Morge am 7ni sind mir den in Itajaí acho und sind direkt via Taxi zum Hotel. Dete het eus den de Receptionist en Transfer in Vergnüegigspark organisiert. En Retner wo sus nünt bessers ztue het  und gern alles verzellt was ihm gad so ifallt, au wen me kei Portugisisch chan, das isch ihm glich. Eventuell well sis Auto kein Radio gha het. Er het eus vor em Park abglade und eusi Vorfreud isch gstige.

49 Franke het de Itritt kostet. Eher tür für Südamerika. Es isch bewölkt gsi, Fritig. Daher eher wenig Lüt. D Muriel het mich vor d Wahl gstellt. Entweder zerst z Morge esse und den ufd Bahne oder zerst ufd Bahne und noh..........und scho han ich sie ade Hand richtig ersti Achterbahn gschleickt. 

Mir hend den paar Bahne gmacht und um die 12i sind mir den in e Show gange. Für 20 CHF hesch 1 h Show becho plus Mittagesse. D Show het Excalibur gheisse und isch würkli Actionrich gsi und d Müri het au gstrahlet bim Ablick vo de Rössli.

Jo, chli de Buch voll schloh und zueluege wie anderi kämpfet, guet gsi. Noher hend mir no de parkinterni Zoo agluegt, er isch echt guet gsi. Het zimlich jedes Vich gha wo so in en Zoo ie ghört. 

Den isch den öbbe 16:00 gsi und ich ha blöderwis am Fahrer gseit das er eus erst am 18:30 söll hole. Es het halt weniger Bahne defür meh Shows und Zoo. Jo dank em warte hani d Muriel glich no chöne überrede das sie über ihri Höheangst springt und mit mir uf de 93 Meter höchi Frei Fall mitchunt. 

Irgendwen ischs denn glich no Zit worde und de Opi isch eus cho go hole. Fazit vom Park: Me chan würklich viel mache für das Geld. Zoo, Shows, Bahne, Schüssbudene, Sache zum aluege ect. Aber Achterbahn Fans weret evt biz entüscht, wells nid halb soviel Bahne het wie im Europapark. Trotzdem en super Tag gsi. 

Am zweite Tag hend mir eus den entschlosse namal e Nacht z'blibe und mir hend en Gammel-TV Tag gmacht. Eifach mol nüt mache, im Bett ligge, Film luege und paar Sache bueche, s Wetter isch eh nid de Hit gsi. Am Abig hend mit den glich a die frisch Luft müese, zum paar Sache poste und en chline Happe z Nacht esse. Plus hend mir im Rege glich na schnell s Städtli agluegt, obwohl mir in Itajaí eigentlich nur aghalte hend weg em Freizitpark. Es het e umwerfend schöni Kirche dete. 

Noher hend mir no kurzes Karte spiel gmacht, ich bi verruckt worde (chlini Ahmerkig vode Muriel; ja, er hett verlore) und den sind mir is Bett. Ezt sind mir uf em Weg nach Florianopolis. Mir fahred 2 h mit em Bus. Vo det us müend mir namal 70 min mit em ÖV Bus fahre bis mir zu eusem Hostel chömet. Bi guetem Wetter wönd mir eusi erste Surf Versüech mache. Worschindlich de letzt halt für Brasilie und das blöde unverständliche komplizierte komische doofe Portugisisch. Noher gönd mir uf Uruguay, wo mir ENTLICH chönd probiere Spanisch rede. 


Next Stop: Florianopolis

Antworten

Brasilien
Reiseberichte Brasilien
#brasilien#penha#itajaí#südamerika#southamerica#florianopolis